1 TIMOTHY 3

1Tial omelekoi a meral tekoi el kmo: A lsekum a chad a semeriar el mo mengeteklel a ikelesia, e ng soal el osiik er a kot el ungil el ureor. 2A mengeteklel a ikelesia a kirel el diak a telemellel; e di ta bechil, e ultebechel e ulserechakl a rengul, e sebechel kuoll, e mengedmokl er a re merael el mor a blil; e mo meduch el olisechakl. 3Ng diak le kirel el sekengim er a mesisiich el ilumel, ma lechub e le debsochel a blekerdelel, e bai medemedemek, e chad er a budech, e diak le ngemokel a rengul er a udoud; 4e kirel el sebechel el ungil el mtebechelii a telungalek er ngii ma re kie er a blil, ma re ngelekel a mengull er ngii e orrenges a tekingel. 5Ele lsekum a chad a diak el sebechel el mtebechelii a telungalek er ngii ma re kie er a blil, e ng mekerang e sebechel el oungerachel er a ikelesia er a Dios? 6Ng kirel el diak le chad el dirk mlo oumerang, ele ng mekngit a bo le kedidai a rengul me bo lobals el di ua Diabelong. 7Ng kirel el ungil a chisel el chad me te mengull er ngii a re chad el diak loumerang, me lak le metemall a chisel, e loberius el mo chederdellel a Diabelong. 8A re mesiou er a ikelesia a kirir el ungil a blekerdelir e diak lobelebult a chururir; ng kirir el diak le sekengim er a bilong, el ka le ngemokel a rengrir er a udoud; 9ng kirel el mo meduch a rengrir el oumerang a ikel mla mocholt er tir el klemerang, el oba mededaes el ukltkel a reng er tir. 10E a uchei er a bo le nguu tial ngerachel, e tir me te dirrek el kirir el ma meteriter el kmo ng ungil a blekerdelir e mochu mesiou. 11A re becherir me ng dirrek el kirir el mo ungil a blekerdelir e ulserechakl a rengrir, e diak lolaes er a re chad e ka loutingaol. 12A chad el mesiou er a ikelesia a kirel el di ta bechil, e ungil el omtebechel er a re ngelekel ma telungalek er ngii ma re chad el kie er a blil; 13ele tirkel mesiou er a ikelesia el mo ungil er a ngerchelir a mo ungil a chisir er mederir a re chad, e mo mimokl el ouchais el kmo toumerang er a Kristus Jesus. 14Chelechal kuluches er tial babier el ekor kau, e a leko di le ngera me kmereched el eko mesekau. 15E ngdi lsekum ak mo meoud el ekong, e tial babier a mo ochotii er kau el kmo ng kirel ua ngera blekerdelel a klechad er kid a ruumerang. Kid a bebil er a re chad er a telungalek er a Dios, el ikelesia er Ngii, el di ngar el diak a ulebengelel. Ng ikelesia ia oltekau e omtebechel er a klemerang el kirel a Dios. 16Ng diak oumededenger er sel klou el bertelel a tekoi el chelid er kid: A Kristus a mlei el teletelel a chad, e mlocholt el melemalt el oeak a Reng, e mloues er a re anghel. Ng ulberk a chisel er a bek el beluu, me te mlo oumera er ngii er a beluulchad el rokir, e ngii a mlengai el mor a eanged.

will be added

X\