1 TIMOTHY 2

1A kmal klou a ultutelel el tekoi el kurrimel er kemiu er ngii a kmo, a re Kristiano bo loldars a nglunguuch er ongit ma odanges ma omerengelsaul er a Dios el kirir a rokui el chad; 2e kirir a re king me tirkel rokui el ngar a ngarbab el deruchall, me bo le sebeched el chelellakl el kiei el ngar a budech. Ng kired el kmal kerekikl el mengull er a Dios, e melemalt omerelled el mor a re chad. 3Ele tia ungil tekoi e odeuir a rengul a Dios el Osebeled, 4el soal a rokui el chad a bo le sobel e bo lodengelii a klemerang. 5Ngdi ta Dios, ma di ta ngikel oldak er a Dios ma rokui el chad el mo dmak, el ngii el chad a Kristus Jesus. 6Ngii ngikel uldersii a klengar er ngii el mo olsobel er a rokui el chad. A uldersel a klengar er a Kristus a mlo ochotel er ser a bo le belsechel a kmo, a Dios a soal a lolsobel er a rokui el chad. 7Isei ia uchul ma Dios a rirellak el mo apostol el olisechakl er a re Chisentael, er a klemera er a doumera er ngii el tekoi. Ngak a melekoi a klemerang el diak kumulak! 8Me ng soak a re sechal a loluluuch el ngar a bek el ongdibel er a ikelesia, el tir a diak a telemellir, me ng sebechir el odars a chimorir e meluluuch, el diak lolengasech a rengrir ma ka longaititekangel. 9Ng dirrek el soak a redil a bo lulengeasek a teletelel a bilir; lak lesal omesiich a bderrir, ma lechub e lomesiich er tir el olab a kolt ma ngisel a chesiuch, ma lechub e loubail a meringel a cheral el bail, 10e bai bo lomesiich er tir er a ungil el omerellir, ele tiaikid a ungil el blekerdelir a redil el oltirakl er a Dios. 11A redil a kirir el mo chelellakl e orrenges osisechakl el oba ngariourreng. 12Ng diak kkengei er tir me lolisechakl ma lechub e longedereder er a re sechal; ng bai kirir el di lmuk. 13Ele Adam a mle kot el obeob, e ng obeob ku Eva. 14Ng dimlak le Adam a milecheblad, e ng bai redil, e tomellii a llechul a Dios. 15E ngdi redil a mo suobel a lomechell er a re ngalek, a lsekum ng outekangel, el oumerang, e oubltikerreng, e lak a telemellel e lulengeasek a blekerdelel.

will be added

X\