1 TIMOTHY 1

1Ngak el Paulus, el apostol er a Kristus Jesus el oeak a uldesuel a Dios el Osebeled ma Kristus Jesus el dolatk e mengiil er ngii, a meluches er tial babier 2el mor a Timothy el ngelekek, el ngak a uchul e ng mlo oumerang. A Dios el Chedam ma Kristus Jesus el Rubak er kid le beskau a krasia, ma klechubechub, ma budech. 3Ng soak cho mkiei er a Efesus, el oltirakl ongtik er kau er a kngar a omerolek el mor a Masedonia. Ele re bebil er a re chad a olisechakl a diak le meral tekoi me ng kirem el merrob er tir. 4Mdu er tir me le bechei a ikal betok el delbochel el cheldecheduch ma mekemangel el beldeklel a uldidellel a rsechir a ruchelir, ele ng di omuchel a klaititekangel, e diak a ngeral le rellii er a uldesuel a Dios el dodengei ele kid el oumerang. 5A belkul tial omengelechel a kirel el olekiis er sel bltikerreng el mei el ngar a klikiid el reng, ma mededaes el ukltkel a reng. 6A re bebil er a re chad a mla mo cheroid er a ikang me te mla touchakl er a rolir el mor a klebelung el klaititekangel. 7Ng sorir el mo chad er osisecheklel a llechul a Dios, e diak lodenge belkul a tekoi el tuobed er a ngerir ma lechub a ikel tekoi el kmal mesisiich a ngerir er ngii. 8Kid a medenge Llach el kmo ng ungil, a lsekum kede ousbech el ngar a meral rolel. 9Ng kired el medengei el kmo, a llach a dimlak le meruul el kirir a re melemalt el chad, e ng bai kirir tirkel melemall a llach, ma re mekngit, ma re diak loluu er a Dios, ma re dengerenger el chad, me tirkel diak longull er a chelid ma chedaol tekoi, me tirkel omekoad er a re demerir ma re derrir, me tirkel omekoad er a re chad, 10ma mekngit el omeruul er a delongelel a sechal ma redil, ma re menguchet a raod, me tirkel omdechem e merechorech er a re chad, me tirkel omulak e diak lolekoi a klemerang el kirir a re chad, ma lechub e ng ngii di le ngeral loruul el omtok a meral osisechakl. 11Ngiil osisechakl a de betik er ngii er a Ebangkelio el mloterekokl er ngak mak umerk er ngii. Tial Ungil Chais a mlar a kebkall e odengesall el Dios el mei. 12Ak mereng a sulel a Kristus Jesus el Rubak er kid, el silisichii a renguk er a urerek. Ak mereng a sulel, ele ng di mle ungil er a rengul a tutkak el mo mesiou er ngii. 13A ngar a mong e ak millekoi a mekngit el kirel, e uleldechelakl, e uleltuub er ngii. E ngdi Dios a mlo chubkak ele seikid e ng dirkak bo kuumerang e dimlak kudenge kuruul. 14Ma Rubak er kid a milskak a kmal klou el krasia er ngii, e rirellak el mo oumerang, e milskak a bltikerreng el de nguu a doltirakl er a Kristus Jesus. 15Tial bo kdelii el tekoi a kmal klemerang me ng kired el oumerang er ngii, ng kmo: A Kristus Jesus a mlei er a beluulchad el me olsobel er a re chad er a klengit. E ngak ngikel kot el tkul a mekngit er tir el rokui, 16e ngdi Dios a mlo chubkak, me bo le sebechel a Kristus Jesus el ochotii el kmo ng meral klou a rengul er ngak el kot el mekngit el chad. A Dios a mle ua isei er ngak el kirel lolecholt el kmo, ng dirrek el mo ua isei el mor tirkel mo oeak ullek el mo oumerang er a Kristus e nguu a diak a ulebengelel klengar. 17Ng kired el rokui el chemat e mengebkall er a King el diak a uchelel ma ulebengelel, el mo cherechar. Ngii a di tal Dios, el diak le moues e diak le mad! Amen. 18Timothy, rungalek, ak uterkeklii er kau tial ngerachel el oltirakl a ikel dirk lulemlaoch a re profet el kirem. Me mousbech ngiil tekoi el klekedellem me bo bekeu el oldechelakl a mekngit. 19Bo mesisiich el oumerang e moltirakl er a rengum a lorrael er kau me lak mtuchakl. A re bebil er a re chad a diak loltirakl a rengrir a lorrael er tir me te mla mo diak loumerang. 20A Himeneus ma Alexander a mla mo teloi er tirkal chad. Ak ulemals er tir mak milechititerir ma Satan a mlo mengedereder er tir el kelebsengir; tia mo mellach a rengrir me ng diak lluut el melekoi a mekngit el tekoi el kirel a Dios.

will be added

X\