1 THESALONIKA 5

1Ng diak a belkul a kimoluches el ouchais er kemiu el odam er kemam er a belsechel, ma mo blekerdelel a le mei er ngii a Rubak. 2Ele kom ungil el medengei el kmo, a Sils er a Rubak sel le mei, e ng ua tal merechorech a le mei er a klebesei. 3Me sel ledu re chad el kmo, “Ng budech ma rokui el tekoi a di ungilbesul,” e seikid e ng di mereched el mer tir a kloul tellemall! Ng di mereched el mei el ua rengelel a ngeuil a cheroll el mor a redil el omechell el diak el sebeched el chemiis er ngii. 4Ngdi kemiu el odam er kemam a diak kom ngar a ilkolk, ma le mei sel Sils e ng diak kom kibetiekl el ua merechorech a lokibeteklau. 5Ele kemiu el rokui a di chad er a llomes e chad er a cheldecheos; ng diak de chad er a klebesei ma ka de chad er a ilkolk. 6Misei, e lak leiit a medad el ua re bebil er a re chad; e bai di de mekar e lulterekokl a rengud. 7Ele re chad a mechiuaiu a le klebesei, ma re chetelaol a mechetelaol a le klebesei. 8Ngdi kid a chad er a cheldecheos, me ng kired el ultebechel a uldesued el oumerang e betik a rengud er a Dios, el ua le tekerngel a ulud me ng kired el bliull er ngii, e melatk e mengiil er a osebechekled el ua helmet, el ngar a bdelud. 9A Dios a dimlak le ngiltid me bo lomals er kid, e ng bai ngileltid me bo le sebeched el nguu osobel el oeak a Rubak er kid el Jesus Kristus, 10el ngikel mlo mad el kired, me bo luchul e bo le sebeched el mo kiei el obengkel sel lluut el mei, a dirk de chad ma lechub e bla de mad. 11Me molemolem el kasisiich a rengmiu e mkaingeseu el ua ikal blekerdeliu er chelechang. 12Aki kmal olengit er kemiu el odam er kemam me bo mongull er a re mengetekliu el oureor el ngar a delongeliu, el tir olisechakl er kemiu er a rolel a de chedal a Rubak. 13Bo mungil el mengull e le betik a rengmiu er tir el urerir a uchul. E bo le budech a delongeliu. 14Aki mengelechel er kemiu el odam er kemam, me mollach er a re mesaik, e molisiich a rengrir a re medakt, e mngesuterir a re mechitechut a rengrir e bo le klou a rengmiu el kirir el rokui. 15Bo mkerekikl me lak a chad el omtechei a mekngit er a mekngit, e bo le blechoel el teleteliu el meruul a ungil el mor a re bebil er kemiu ma rokui el chad. 16Di le blechoel el ungil a rengmiu, 17e moluluuch el di blechoel, 18e moreng a sulel a Dios er a ngii di le ngerang ele tiaikid a soal a Dios el kiriu kemiu el chedal a Kristus Jesus. 19Lak morrob er a Chedaol Reng; 20lak mongoit a osisechakl el mlar a Dios el mei. 21Morriter a rokui el tekoi, e moreked a ungil 22e mchoit a bek el bedengel a mekngit. 23A Dios el ngii a omeskid a budech bo le rellemiu el mo cherrungel el chedaol; e le kekar a rengmiu ma klengar er kemiu ma bedengiu el rokui, el mo diak a terchedel sel le mei a Rubak er kid el Jesus Kristus. 24Ngikel omekedong er kemiu el mo chedal a ulterekokl el mo oltaut a telbilel. 25Kemiu el odam er kemam, mdirrek el meluluuch el kiram. 26Mkautkeu el oba omelungelmad el odam. 27Ak mengelechel er kemiu el oba ngklel a Rubak me mchieuii tial babier el mor a rokui el oumerang. 28A krasia er a Rubak er kid el Jesus Kristus bo lobengkemiu.

will be added

X\