1 THESALONIKA 4

1E orekil, kemiu el odam er kemam, e kom silubii er kemam a blekerdelel a klengar er kemiu el oldeu er a rengul a Dios. E kemiu itia er cho mua isei el mer chelechang, maki oba ngklel a Rubak el Jesus e olengit e mengelechel er kemiu el kmo bo le meduch a rengmiu el melemolem el ua isei. 2Ele kom medengei a ikel kim ulsisecheklemiu el tekoi el ki bilskemiu el mlar a Rubak el Jesus el mei. 3A Dios a soal cho bo mchedaol e lak mngar a deleboes. 4Ma derta er kemiu el sechal, a kirel medengei el kmo ng mekerang a le kiei el obengkel a bechil el chedaol e kuoll, 5el diak di molamet a rengmiu er a deleboes el ua diak loumerang er a Dios. 6E dirrek el lak a sechal el meruul a mekngit e loba bdelul er a tar ngii er a tekoi er a deleboes. A ika di bla kimsbedemiu er ngii. Aki mle mesisiich el omeklatk er kemiu el kmo a Rubak a mo omals er a re meruul a ua isel tekoi. 7Ele Dios a dimlak lomekedong er kid el mor a mengelengalek el tekoi, e ng bai ulemekedong er kid el mo chedaol. 8Misei e ngikel chetil tial osisechakl a diak le chetil a chad; ng bai chetil a Dios el ngikel milskemiu a Chedaol Reng er ngii. 9Ng dikea belkul a kimoluches el ekor kemiu el kmo ng mekera cho moubltikerreng er a re bebil er kemiu el Kristiano, ele Dios a mla osisecheklemiu el mo kaubltikerreng. 10Kemiu a meral di mle ua isei el mor a re Kristiano el ngar a Masedonia el rokir. Ngdi ki lmuut el mengelechel er kemiu e rudam el kmo, mluut el mengal mo ua isei. 11Moruul er kemiu el mo chelellakl a delengchekliu, e lak moltoech a ngeriu er a tekingir a re bebil er a re chad. Di le kemiu el mengereker a siungiu, el ua ikel kim dilu er kemiu. 12Cho mua isei, e te mo mengull er kemiu a re chad el diak loumera er a Dios, me kemiu a mo diak di mulsirs er a re chad er a ikel mousbech. 13Kemiu el odam er kemam, ng kmal somam a lesal selaod er a rengmiu a kirir a re mla mad el chad me lak le mekngit a rengmiu er tir el ua itirkel chad el diak a omeltkir el mengiil el mo obengkel a Dios. 14Kid oumera el kmo a Jesus a mlad e milekiis er a kodall, me kedoumera el kmo a Dios a mo ngoititerir el mo obengkel a Jesus tirkel mla mad el oumera er ngii. 15A ikal kimolsisechakl er kemiu er chelechang a tekingel a Rubak el kmo, kid el di chad sel le mei a Rubak, a diak de bor uchei er a re mla mad. 16Ele sel le bor ngii a klou el kedul a Rubak, ma klou el ngor er a ngarbab el anghel, ma klou el ngerel a trombetang er a Rubak, e seikid e a Rubak a ngar a eanged el me metengel. E tirkel mlad el uluumerang er a Kristus a ma kot el mekiis; 17e sola e kid a re dirk chad a mochu mekider el mo obengterir er a eabed el mo osiueklii a Rubak er a melidiul. Me kede mo obengkel a Rubak el di blechoel. 18Ma le ua isei e mkaingeseu el melisiich a rengmiu el olab a ikal tekoi.

will be added

X\