1 THESALONIKA 3

1Ma lekea le sebecham el outekangel el di diak kim mesekemiu, e aki tilbir el kmo, aki di ngar a Athens el di mo kemam el tang, 2e oderchii a tar kid er a Timothy, el kimdak el mesiou er a Dios el omerk er a Ungil Chais er a Kristus me ng eko olengeseu er kemiu me kom mo mesisiich el oumerang, 3me lak a tar kemiu el touchakl er cho moumera er ngii el tekoi. Kemiu a medengei el kmo, kid a kired el mo chuarm a doltirakl er a Dios. 4Sei ia uchul ma kim ngar tilechang e aki di mla subedemiu el kmo, kid a kired el mo modechelakl; me kid tial mlo chuarm, me kom medengei. 5Tiakid a uchul mak ulderchii a Timothy el ekor kemiu, ele ng mlo diak el sebechek el meketeket el di diak kudenge chisiu, mak ulderchii el ekong me bo lodengei el kmo, kom dirk oumerang. Ele ng mle suebek a renguk a cho mlechetikaik er a Diabelong me di blo lak a belkul a ureram! 6Ngdi chelechang e ng mla lmuut el mei a Timothy el ouchais er kemam er a meral ungil chisiu el kmo kom dirk oumera er a Dios e dirk kaubltikerreng. Ng dirrek el uluuchais el kmo sel mletkemam e ng dmeu a rengmiu er kemam, e oureng el somiu a deluut el mo kasoues, el kmal di ua omeltkam er kemiu. 7Kemiu el odam er kemam, sel ki bo betik a rokui el chelebulam ma ringelam e kemiu a mle uchul a klisichel a rengmam. Ng kemiu el oumera er a Kristus a uchul me ng mo mesisiich a rengmam. 8Me chelechal lesal meduch a rengmiu el obengkel a Rubak e ng mla mo meklou a rengmam. 9Ng mla mo sebecham el ngar medal a Dios e mereng a sulel er a klou el deuil a rengmam. 10Aki kmal di meluluuch er a llomes ma klebesei me bo le sebeched el mo kasoues, ma le ngar ngii a ikel dirk mousbech el mo mesisiich el oumera er a Dios e kim ngesukemiu er ngii. 11A Dios er kid el Demad ma Rubak er kid el Jesus Kristus le beskemam a techellam el ekong! 12A Rubak le ngesukemiu el kmal mo kaubltikerreng, e bo le klou a bltikerreng er kemiu el mor a rokui el chad el mo ua bltikerreng er kemam el ekor kemiu. 13Ele cho bo mua isei, e ng mo melisiich a rengmiu e kemiu a mo diak a telemelliu, e chedaol el ngar medal a Dios er kid el Demad, sel le mei a Jesus el Rubak er kid el obengterir a rokui el chedal.

will be added

X\