1 THESALONIKA 2

1Kemiu el odam er kemam, kom kmal ungil medengei el kmo odngelam el ekong a kmal dimlak lak a belkuk 2Ele kemiu a ungil medengei el kmo aki di mla mo chuarm er a ringel er a kim ngar a Filipi er uchei er a kim eko er a Thesalonika. Te betok el chad a ulemtok er kemam e ngdi Dios er kid a silisiich a rengmam maki di uluuchais er kemiu er tial Ungil Chais el mlar a Dios el mei. 3A ikal tekoi el kimsal ullengit er kemiu el meruul a diak le cheleuid a omesodel, ma ka le blar a mekngit el uldasu el mei, ma lechub e ki mongeblad er a re chad. 4Ng bai di ikel soal a Dios a kimolekoi, ele ngii a milskemam tial ngerchelel a berkel a Ungil Chais. Kemam a diak kimolasem el meruul a sorir a re chad, ng bai di ikel soal a Dios a kimoruul el ngikel kmal ungil medengei a ngar a chelsel a rengmam. 5Kom medengei el kmo, ng dimlak kimomekord a cheldechedechemam el ekor kemiu el kor a somam el melad er kemiu, ma ka kim uluusbech a tekoi el omart a recherchel a rengmam. E a Dios me ng medenge el kmo a ikal tekoi el kimolekoi a merang. 6Kemam a dimlak kimosiik a chetengam er a delongliu ma lechub a delongelir a re bebil er a re chad, 7e mle sebecham el olecholt er kemiu a klisicham ma deruchellam ele kemam a apostol er a Kristus; ngdi dimlak kim ua isei, aki bai mle medemedemek el ekor kemiu el ua tal chedil a lomekeroul er a re ngelekel. 8A bltikerreng er kemam el ekor kemiu a uchul e aki rruul el diak di kim ouchais er kemiu er a Ungil Chais el mlar a Dios el mei e le merekong, ng dirrek a klengar er kemam a bla kimodars el kiriu, ele ko betik er a rengmam! 9Kemiu el odam er kemam, kom melatk a rengelel ma berredel a ureram er a kim ngar tilechang; aki uluureor er a llomes ma klebesei me lak bo kimongesang er kemiu er a kirel a siungam. 10Kemiu a medengei, ma Dios me ng medengei el kmo a blekerdelam el ekor kemiu a ruumerang a mle klikiid, e melemalt, e diak a mekngit er ngii. 11Kemiu a medengei el kmo aki ulemekerreu er a ta ma tar kemiu el ua demal a ngalek a lomekerreu er a ngelekel. 12Aki millisiich a rengmiu e milengelaod er kemiu, e di mle blechoel el mengelechel er kemiu ma klengar er kemiu lodeuir a rengul a Dios el omekedong er kemiu el mo melai a dikesiu er a Rengedel ma klebkellel. 13Ng ngar ngii a tar a uchul e aki blechoel el mereng a sulel a Dios el kiriu. Ser a kimngai a tekingel a Dios, el eko olisechakl er kemiu, e kom rirenges e ngmai el diak el leko ng tekingel a chad, e bai ngilai el kmal meral tekingel a Dios. A Dios a meral oureor el ngar a chelsiu a ruumerang. 14Kemiu el odam er kemam, a tekoi el dilubech el ekor kemiu a di osisiu ngii ma ikel dilubech el mor a ikel ikelesia er a Dios el ngar a Judea, el tirkel chedal a Jesus Kristus el ngar isei. Kom mlo chuarm er a odechelakl er a re chad er a belumiu el ua itir el mlodechelakl er a re chad er a Judea, 15el tir el chad er a Judea a milekodir a Rubak el Jesus ma re profet, e dirrek el uleldechelakl er kemam. Ng meral dimlak lodeuir a rengul a Dios e te mlo cherrouir a re bek el chad. 16Tulsiik a rolel e merrob er kemam me lak kimolisechakl er a re Chisentael me bo le sobel. A ikakid el omerellir a mla churrungel a telkelel a ikel rokui el klengit el bla leruul. Me chelechang e te mo meringel el obals er a Dios! 17Kemiu el odam er kemam, ser a kim telkib el cheroid er kemiu e ng di mle bedengam e a rengmam a dimlak bo le cheroid er kemiu; ng meral mla mo somam el lmuut el mesekemiu, e mle betok el kimolasem el eko omes er kemiu. 18Ng mle somam el lmuut el ekong, e ngak a mla mo telal leko kikong e di diak, ele Satan a millenget er kemam. 19Ng kemiu tirkel di kimolatk er tir, e dmeu a rengmam er tir, e uchul a chetengam er medal a Rubak er kid el Jesus sel le mei. 20Ele kemiu a meral chetengam e deuil a rengmam.

will be added

X\