1 PETRUS 5

1Ngak a mengelechel er a re mechuodel er a ikelesia el ngar a delongeliu, ele ktar tir. Ak ulemes a ringel el blo lecharm a Kristus, e ngak a dirrek el mo ngma dikesek er a klebkall el kirel mei. 2Momekerreu er a delebechel el sib er a Dios el mla moterekokl er kemiu, el diak louuesarech a rengmiu e bai lungil a rengmiu. Lak moureor el di kirel a udoud el mongerker, e bai bo le meral ngar ngii er a rengmiu a mesiou. 3Lak molasem el oumerreder er kemiu er tirkel mla moterekokl er kemiu el kiriu el omekerreu er tir, e bai bo mungil el ocholt el mor a delebechel el sib. 4E sel le mei a Bderrir a re Mengkerngel a sib, e kom mo ngma krone er a klebkall el diak bo lak a dichel. 5Me kemiu el mekekerel chad bo morrenges er a re mekloul chad. E kemiu el rokui a milemiu er a klengariourreng, e mo kesiou; ele Chedaol Llechukl a kmo, “A Dios omtok er a re ngarbab a rengrir, e ungil a tekingel er a re ngariou a rengrir.” 6Mnga rengmiu el mor iou, er cheungel a mesisiich el chimal a Dios, me bo longesecheklemiu er sel ungil el belsechel er ngii. 7Moterekokl a ikel rokui el tekoi el suebek a rengmiu er ngii, ele ng kerekikl el omekerreu er kemiu. 8Bo lultebechel a rengmiu e di mklekar! A cherrouiu, el Diabelong, a omibais el mol mei el ua ongumk el laion el osiik er a bo lomerkakl er ngii. 9Bo mesisiich el oumerang e momtok er ngii, ele kom medengei el kmo a re bebil er kemiu el oumerang el ngar a beluulchad el rokui a dirrek el chuarm osisiu el ringel el cho mngar ngii. 10Ngdi uriul er cho bla mcharm er a ringel el telkib, e a Dios er a rokui el krasia, el omekedong er kemiu el mo oudiukes er a diak a ulebengelel klebkall el mo obengkel a Kristus, ingii a mo sumechokl a rokui el tekoi el kiriu, e mo mtebechelemiu, e mo smisichemiu, e mo dolemii a klengar er kemiu er a meduch el omekedecheraol. 11Le bor ingii a klisiich el diak a ulebengelel! Amen. 12Ak meluches er tial kedeb el babier el lolengeseu er ngak el meluches er ngii a Silas el kumasech er ngii el blak a rengul el odam er ngak el Kristiano. Ng soak el melisiich a rengmiu e ouchais er kemiu el kmo, a ikel tekingek a meral olechotel a krasia er a Dios er kemiu. Me bo mkerekikl el diak kom tuchakl er ngii. 13A ikelesia el ngar a Babilon, el di ua ikemiu el dirrek el mlengilt er a Dios, a melekoi a yorosku el ekor kemiu, ma ngelekek er a Markus me ng dirrek el melekoi a yorosku er ngii. 14Mkautkeu el oba omelungelmad er a bltikerreng. A budech lekor kemiu el rokui el chedal a Kristus.

will be added

X\