1 PETRUS 4

1Me chelechal le ua isei el mlo chuarm a Kristus er a bo le mad er a kerus, me kemiu me ng dirrek el kiriu el kudmeklemiu el mo ua uldesuel, ele ngikel mla mo chuarm a bedengel a mla mo diak el soal el ngar a klengit. 2Chelechal mong e ng dikea di mngar sel somiu, e bai oterkokl a klengar er kemiu er a Dios me ng mengedereder el ngar sel soal. 3A ngar a mong e kom mirruul a ikel di sorir a re Chisentael el meruul. Kom mle kelekall el meruul a de merur er ngii el tekoi, e di blekall er a deleboes, e di cheltelaol, e ngar a ulekeangel el omilil, ma omilil el omelim, ma mekull el omengull el bleob el chelid. 4E chelechang e a re diak loumerang er a Dios a mechese rengrir er kemiu ele ng dikea bo mteloi er tir er osisiu el diak luldasu el terrekakl el rolel a klechad, me te melekoi a mekngit el kiriu. 5E ngdi ng kirir el mo mesaod er tir er a Dios el ngii a mo oukerrekeriil er a re dirk chad ma re mla mad. 6Isei ia uchul ma Ungil Chais a mluchais el mor a re mla mad, el mor tirkel mlukerrekeriil er a dirk le chad el ua ia re bek el chad a le mukerrekeriil; ng mluchais er tir me bo le sebechir el nguu a klengar er a reng el ua ia Dios. 7A ulebongel er a rokui el tekoi a di kmedang; ng kiriu el mo ultebechel a rengmiu e di klekar, me bo le sebechiu el meluluuch. 8E a ngar uchei er a rokui el tekoi, e bo meral kaubltikerreng, ele bltikerreng a dokedek a betok el klengit. 9Mnga chesmerel a blimiu e mkauetechakl el diak mongeremrum. 10A ta ma tar kemiu bo lungil el ousbech a ikel le meduch er ngii el tekoi el le ngilai er a Dios, el mo klungiolir a re bek el chad. 11Ngikel olsisechakl a kirel el olsisechakl a klmechel a Dios; me ngikel mesiou a kirel el mesiou el olab a klisichel el le bsa Dios, me bo le modanges a Dios el ngar a rokui el tekoi el oeak a Jesus Kristus, el klebkall ma klisiich a kloklel el mo cherechar. Amen. 12Kemiu el betik er a renguk, lak bo le mechas a rengmiu er a ikel ringel el bo mcharm er ngii el kirel el melasem er kemiu, el ua le ngodech el tekoi a mla mer kemiu. 13Bai bo lungil a rengmiu ele kom chuarm er a rengelel a Kristus, me lesal mo klou a deuil a rengmiu sel be lecholt a klebkellel. 14A lsekum kom motuub el ngklel a Kristus a uchul, e bo lungil a rengmiu, ele kebkall el Reng, el Reng er a Dios, a ngar kemiu. 15Ngdi lak bo mcharm ele kau el omekoad er a re chad, ma lechub e ke merechorech, ma lechub e ng ngar ngii a telemellem, ma lechub e ke oltoech er kau el mesaod a diak le ngerchelem el tekingir a re chad. 16Ngdi lsekum ke chuarm ele ng kau el Kristiano, e lak ke merur, e bai moreng a sulel a Dios, ele ke oungakl er a ngklel a Kristus. 17Ng merma belsechel a kerrekeriil el omuchel er a re chedal a Dios; ma le ua isei el omuchel er kid, e ng kol mo ua ngerang a le bor tirkel diak loltirakl er a Ebangkelio er a Dios? 18Ng di ua ikel lolekoi a Chedaol Llechukl el kmo, “Ng meringel er a re ungil chad el mo suobel; a le ua isei e ng kol mo ua ngerang a re diak loumerang er a Dios el mekngit el chad?” 19Ma le ua isei, e tirkel chuarm ele seikid ia soal a Dios el kirir, lokiu a ungil omerellir e loterkeklterir er a Dios el Ulemeob er tir el diak lechoit a telbilel.

will be added

X\