1 PETRUS 3

1Me kemiu el bechiil el redil me ng kiriu el dirrek el ua isei, el mo orrenges a tekingir a re bechemiu, ma le ngar ngii er tir a diak loumerang a tekingel a Dios, e lak a ngeral molekoi, e bai di bo loeak a ungil el blekerdeliu el obult el mo oumerang, 2ele te mo omes el kmo kom meral mengull e ungil Omerelliu. 3Lak momesiich a ikriu el menglebokel er kemiu er omeruul el chui, ma lechub e momesiich er kemiu er a kolt ma ungil bail. 4A klebekeliu bai bo lecholt er sel meral kau el ngar a chelsem, el medemedemek e chelellakl reng, el ngii a klou a ultutelel er medal a Dios. 5Ele tirkel redil el mle blak a rengrir e ultuil omeltkir er a Dios er a ngar a mong a ulerrenges a tekingir a re becherir e tiaikid a mle besichir, 6el ua ia Sara el ulerrenges a tekingel a Abraham, e ulemekedong er ngii el kmo rubak. Me kemiu a ngelekel er chelechang a lsekum kom meruul a melemalt el tekoi e diak bo medakt er a ngii di le ngerang. 7Me kemiu el bechiil el sechal me ng ngar ngii a tekoi el kiriu. Bo mkerekikl el omekerreu er a re bechemiu, e mungil e mongull er tir ele te mechitechut er kemiu; e chelechal bla bo mdak el mo melai er a diak a ulebengelel klengar, e mungil er tir me bo le sebechel morenges a nglunguchiu. 8Sel mo ulebengelel a tekingek a kmo, kemiu el rokui bo le ta rengmiu, e bo mchubechubchad, e bo mkaubltikerreng el odam, e bo bekokuii e moba ngariourreng er a delongeliu. 9Lak momtechei a mekngit el oba mekngit el ka momtechei a mekngit el omelekoi el oba mekngit el omelekoi; bai momekngeltengat, ele klengeltengat a le dilu Dios el kmo ng mo omeskemiu er ser a lomekedong er kemiu. 10Ng ua ia lolekoi a Chedaol Llechukl el kmo, “Ngikel soal el oldeu er a rengul er a klengar e oureng a ungil sils er a klengar er ngii, a kirel el mengeroid er ngii er omelekoi el mekngit e mo diak lomulak. 11Ng kirel el obult el mo cheroid er a mekngit e mo meruul a ungil; ng kirel el oba rengul el rokir el meruul a budech. 12Ele Rubak a mengkar er a re melemalt e orrenges a nglunguchir; e ngdi ng omtok er tirkel meruul a mekngit.” 13Ng techa ngikel mo melemall er kemiu a cho msemeriar el meruul a ungil? 14Ngdi kuk bo le kiriu el mo chuarm, ele kom meruul a melemalt el tekoi, e kom di mo ngeltengat. Lak kom medakt er a ngii di le chad, e lak ko bekikl. 15Di bo mongull er a Kristus er a rengmiu el kmo ng Rubak. Bo blechoel el di kldmokl el smodii er a ngii di le chad el oker er kemiu er a omeltkiu el ngar a rengmiu. 16Kom mesaod er ngii el oba delemedemekerreng ma omengull. Mkerekikl ma ukltkel a rengmiu di le bliochel, me sel loltuub er kemiu a re chad, e tirkeikid el melekoi a mekngit el kirel a ungil omerelliu a rultirakl er a Kristus, e di le tir el mo merur er a ikel lolekoi. 17Ele ng bai ungil a bo decharm el kirel omerellel a ungil, a lsekum ng soal a Dios, er a bai doruul a mekngit. 18Ele Kristus a di mle tal le mad el kirel a klengit e dikea lluut; a melemalt el chad el diak a telemellel a mlad el kirir a re diak le melemalt, me bo lengikid el mor a Dios. A re chad a milekodir, e ngdi Dios a ulekisii er a kodall, 19misei e ng mlo olsisechakl a delebengir tirkel mle chelsimer, 20el delebengir tirkel dimlak loltirakl a tekingel a Dios, er a lesal mle klou a rengul el mengiil er tir er ser a le chad a Noah, e lolasech er a arhe. Te di mle mekesai, el di mle teai el chad a silobel el okiu a ralm. 21Ma techolbchelid, el lullutk er ngii itiang, a osebelemiu er chelechang, el diak lolai a dechudech er a bedengiu; ng bai rolel a uldersiu el mor a Dios el kirel a klikiid el ukltkel a reng, el oeak a okisel a Jesus Kristus, 22el ngii a mla mor a eanged e ngar a kadekmel a Dios, e mengedereder er a re anghel, ma re mengedereder er a melidiul, ma rulab a klisiich el ngar eungel.

will be added

X\