1 PETRUS 2

1Bedobed el chemoit a ikel rokui el mekngit el ngar kemiu; le mereko blulak ma cheleblad, ma chelechei ma omelekoi el mekngit el melemall a chisir a re chad. 2Bo mua re dirk mlechell el tolechoi, el di blechoel el songerenger el kirel a bliochel el milk er a reng, me molim er ngii e bo le sebechiu el mukeroul e msobel. 3Ng di ua lolekoi a Chedaol Llechukl el kmo: “Kom mla mo medengelii a blekokuii er a Rubak.” 4Mei el mer a Rubak el ngii a ngar el bad, el mle chetirir a re chad el ua lak a ultutelel, e ngdi Dios a ngileltii el klou a ultutelel. 5Me bo mua ngar el bad, el kongei me lousbech er kemiu el meleketek er a templo er a reng, el cho mngar ngii e kom chedaol prist el melenget a ungilbesul el uldars er a reng el mor a Dios el oeak a Jesus Kristus. 6Ele Chedaol Llechukl a kmo, “Ak ngileltii a klou a ultutelel el bad, el bo klia me ng saus el bad er a Sion; e ngikel mo oumerang er ngii a diak bo louuchel er a rengul.” 7Tial bad a klou a ultutelel el kiriu a ruumerang; ngdi le bor tirkel diak loumerang e ng ua tiakid: “Sel bad el le chilitii a rumekedechor a blai el leko ng diak a ultutelel a bai seikid a mlo kot el klou a ultutelel er a ikel rokui.” 8E a lmuut el tar a tekoi er a Chedaol Llechukl a kmo, “Tiakid sel bad el mo rulleterir a re chad me te mesibas, e risois el mo rulleterir me te ruebet.” Te milsibas, ele ng dimlak loume-rang er a tekoi; ng meltib el kirir el mo ua isei. 9E ngdi kemiu a ngellitel el chad, el prist er a king, el chedal a Dios, el mlengilt el kirel mo omerk a chisel a ungil el urerel a Dios, el milkedongemiu el otebedemiu er a ilkolk el mor a mengasireng el llemesel. 10A ngar a mong e ng dimlak mchedal a Dios, e ngdi chelechang e kom mla mo chedal; a ngar a mong e ng dimlak modengelii a klechubechub er a Dios, e ngdi chelechang e kom mla mo medengelii. 11Kemiu el betik er a renguk, ak mengelechel er kemiu el ua cho mchad er a ngodech el beluu e ultechakl er tial beluulchad me lak mrebet el mo meruul a ikel ngelbesel a bedengel a chad el di blechoel el okoad el omtok a reng er kemiu. 12A blekerdeliu er mederir tirkel diak loumerang er a Dios a kirel kmal mo ungil me sel loltelechakl er kemiu er a mekngit el omeruul, e te mo mes a ungil el omerelliu e mo oldanges er a Dios er sel le mei er ngii el Sils. 13Bo mungil el oltirakl er tirkel olab a dereder; moltirakl er tir el kirel a Rubak, a Emperor, el kot el ngarbab el merreder, 14ma re kabernor, el mlengilt er ngii el mo omals er a re meruul a mekngit e mo chemat er tirkel meruul a ungil. 15Ele ng soal a Dios a ikel ungil tekoi el moruul bo longusem a ngerir tirkel mekebelung el chad el di diak luldasu a tekingir. 16Mngar el mimokl el chad, e ngdi lak mousbech er a ilmokl el mngar ngii el omart a mekngit, e bai mngar el sibil a Dios. 17Mongull er a rokui el chad, e bo le betik a rengmiu er a re chedal a Dios el mdak el oumerang, e mongull el medakt er a Dios, e mongull er a Emperor. 18Kemiu el mesiou morrenges a tekingir a re merreder er kemiu e bo mungil mengull er tir; el diak di le tirkel ungil a tekingir; tirkel meringel a tekingir me kom dirrek el mengull er tir. 19A Dios a mo omekngeltengat er kemiu el kirel itiang a lsekum kom outekangel a ringel el dimlak le kiriu, ele kemiu el kerekikl el meruul a soal a Dios. 20Ng ngera klungiolel a cho mlechelebed el kirel a telemelliu? Ngdi lsekum kom outekangel a ringel e dimlak a ngeral mtemellii, e a Dios a mo omekngeltengat er kemiu el kirel itiang. 21Tiaikid a cho mlokedong el mor ngii, ele Kristus a dirrek el mlo chuarm el kiriu, e milechere kerebai el kiriu el mesuub er ngii. 22Ng dimlak a tal le bor a klengit, ma dimlak a blulak el tuobed er a ngerel. 23Ser a le motuub e ng dimlak lolaitechei el oltuub; me ser a bo lecharm, me ng dimlak lorrouk er a ngii di le chad, e bai di ultuil omeltkel er a Dios el melemalt a loukerrekeriil. 24A Kristus ingii a ngilai a kngtid el otour er a bo le mad er a kerus, me kid de mad el kirel a klengit e bo de ngar el kirel a llemalt. Ng oeak a telemellel a bedengel e kom mla mo ungil. 25Kom mle ua sib el milecheuid er a rolel, e ngdi chelechang e kom mla lmuut el mengai el me oltirakl er a Mengkerngiu el Tebechelel a rengmiu.

will be added

X\