1 PETRUS 1

1Ngak a Petrus el apostol er a Jesus Kristus, el meluches el ekor a re ngellitel el chedal a Dios el kiei el cheroid er a belumiu el berberiid er a beluu er a Pontus, ma Galatia, ma Kapadosia, ma Asia, ma Bithinia. 2Kom mlengilt el kirel a lomdasu er ngii a Dios el Chedam e meakl el mo chedaol chad el oeak a Chedaol Reng er ngii, el mo oltirakl a tekingel a Jesus Kristus e mo mekikiid el oeak a rsechel. A krasia ma budech bo lobdois el ekor kemiu. 3Doreng a sulel a Dios el Demal a Rubak er kid el Jesus Kristus! Ng klou el klechubechub er ngii a uchul me ng milskid a beches el klengar er a lokisii a Jesus Kristus er a kodall. Tia meskid a di ngar el omeltked el kirel a klungiaol el dongiil, 4me kede mengiil a ikel mekreos el dikesed er a klengeltengat el longedmokl el kired er a eanged, el diak le metemall, ma ka bo le kikiongel ma ka le mokngemed. 5Ng kldmokl el kiriu, ele kom oumerang ma klisichel a Dios a mengeluolu er kemiu el kirel osobel el mo chemolt er a ulebongel er a beluulchad. 6Kom chuarm a bek el bedengel a ringel ma lta e ng kor a mo mekngit a rengmiu el telkib, ngdi bai bo ledeu a rengmiu. 7A ultutelel a ikel ringel a mo melasem er kemiu el kmo kom meral oumera er a Dios. A kolt el sebechel el metemall el klalo a kirel el mo measem er a ngau; e a rolel cho moumerang er a Dios, el kuk klou a belkul er a kolt, a mekera e diak bo le measem? Ng kirel measem, me bo le sebechel mo kltukl el di melemolem el mesisiich. E seikid, e kom mo modanges, e mongesechekl, e mukebkall er sel Sils el be ledum er ngii a Rubak el Jesus Kristus. 8Ng dirkak mesang e betik a rengmiu er ngii, e diak mesang er chelechang e oumerang er ngii. Me ng kmal klou e mengasireng a deuil a rengmiu el diak a tekoi el sebechel el smodii ngiil deurreng. 9Kom oumerang a uchul ma Dios a olsobel er kemiu. 10A re profet el ulemlaoch el kirel itial osobel el ngar a Dios el ekor kemiu, a mle meringel el okerker e osiik er ngii. 11Ser a lomlaoch el kirel a rengelel a Kristus ma klebkall el mei el okiu ullel a ringel, e tulekerker el kmo ng techang, e oingerang e ng mei. Tia ia lolutk el kirel a Chedaol Reng el ullecholt a ikal tekoi er tir. 12A Dios a mileketeklii er tir el kmo a ikal tekoi a dimlak bo le kirir, ng bai kiriu, er ser a lolekoi a ikaikid el tekoi el meldu er kemiu el mlar tirkel uluuchais er a Ungil Chais el okiu a Chedaol Reng el mlar a eanged el mer tir. Ngii el tekoi a luluureng el mo medengei a re anghel. 13Ma le ua isei, e di mkedmeklemiu, el di ultebechel a rengmiu, e di luldalem a rengmiu el kirel a klungiaol el bla le kedmeklii a Dios el kiriu el mo nguu sel be ledum a Jesus Kristus. 14Bo moltirakl a tekingel a Dios, e lak bechei a klengar er kemiu ma blekerdeliu me bo loltirakl a ikel di mla somiu el mekngit el tekoi er ser a dirkak bo moumerang. 15E bai bo mchedaol el diak a telemelliu er a ikel rokui el moruul, el di ua ia Dios el ulemekedo er kemiu el chedaol el diak a telemellel. 16A Chedaol Llechukl a kmo, “Bo mchedaol ele ngak a chedaol.” 17Ma lsekum kom ouchedam er ngikel ousbech er osisiu el olkael el oukerrekeriil er a rokui el chad el kirel a chad ma omerellel, e momtebechel a klengar er kemiu er tial beluulchad el medakt e mengull er ngii. 18Kemiu a medengei el kmo kom mlochar er a meringel char el millubet er kemiu er a ikel chelsengsang el blekerdelel a klechad el mle uldelid el mer kemiu, el mlochar er a diak di bo le ngemed el klalo el ua silber ma kolt; 19ko bai mlochar er a meringel char el rsechel a Kristus, el ua ngelekel a sib el diak a tal klsakl er ngii. 20Ng meltib er uche er a lobeob a beluulchad e kol chemota el kiriu er chelechal uriul sils. 21Kom oeak ngii el oumera er a Dios, el ulekisii er a kodall e kobkellii; me kom oumerang er a Dios el ultuil omeltkiu e mengiil er ngii. 22Me chelechal cho bla mongikiid er kemiu ele kom oltirakl er a klemerang me kom mocha meral oubltikerreng er a ruumerang el ua kemiu, e bo meral kaubltikerreng er a rengmiu el rokir. 23Ele kom uleak a di ngar e diak a ulebengelel tekingel a Dios el lmuut el mechell el ua cho mngelekir a re chad el diak le mad, el diak le tirkel chad el mo mad. 24Ng di ua ikel lolekoi a Chedaol Llechukl el kmo, “A rokui el chad a ua ia chudel, ma klebkellir a di ua ia bung er a oreomel. A chudel a mo moalech, ma bung a ruebet, 25e ngdi tekingel a Rubak a di melemolem el diak a ulebengelel.” Itial tekoi a sel Ungil Chais el di bla louchais er ngii er kemiu.

will be added

X\