1 KORINTH 9

1Ngak ng diak kmimokl el chad? Ng diak ktar a apostol? Ng diak bla kusa Jesus el Rubak er kid? E kemiu ng diak mcheltekllek er a urerek el kirel a Rubak? 2Chomko re bebil er a re chad a diak er a rengrir a kmo ngak a apostol, e ngdi kemiu a ulterekokl el ngar ngii er a rengmiu! Ele blekerdelel a klengar er kemiu el oltirakl er a Rubak a ochotii el kmo ngak a apostol. 3Me tiakid a rolel a kusaod er ngak er tirkel melechedech er ngak: 4Ngak, ng diak le kirel el lomeskak a kelek ma imelek el kirel a urerek? 5Ng diak le kirel el kultirakl a ikel le ngar ngii a re bebil er a re apostol, ma re tar a Rubak, ma Petrus, el mo bechil a Kristiano e nguu el obengkek er omerolek? 6Ada ng di ngak ma Barnabas a kiram el mengereker el kirel a ikel kim ousbech? 7Ng techal chad a mo soldau e di ngii el oungerachel a ikel lousbech? Ng techa melalem a dellomel el bilong er a sers, e diak bo le kelii a di chimo er a redechel? Ng techa oungerachel a delebechel el sib, e diak bo lengim a bebil er a milk el mengai er ngii el charm? 8A ika ng di tekingek? A Llach ng kor a dirrek el melekoi el ua isei? 9Ele Llach el mlar a Moses el mei a kmo, “Kele molechet er a ngerel a kerbou, sel lorderd a dellomel el merrars a redechel.” A ika ng tekingel a Dios el kirel a kerbou? 10Ng diak bai le tekoi el kired? A ikal tekoi a ulterekokl el melluches el kired. Ele ngikel mesib me ngikel merrars a redechel a dellomel a meruul a urerir el melatk a mo ngma dikesir er a redechel a dellomel. 11Ma lsekum aki dillemii a tekoi er a reng er a chelsiu, e ng kol metacherbesul a kim ousbech er kemiu er a ikel kirel a bedenged? 12A lsekum ng sebechir a re bebil er a re chad el ousbech er kemiu er a ikang, e kemam ng diak bai lesal kiram el ousbech er kemiu? E ngdi dimlak kim ultuil er kemiu er a ngii di le ngerang. Aki bai di uluutekangel er a rokui el tekoi, me lak bo kim uchul a olibesongel er a berkel a Ebangkelio er a Kristus. 13Kemiu a medengei el kmo tirkel oureor er a Templo a mela kelir er a Templo, me tirkel meruul a uldars er a olengetongel me te melai a dikesir er a uldars. 14Ng dirrek el di osisiu el tekoi a le dilu Rubak el kmo tirkel omerk er a Ebangkelio a kirir el ngmai er ngii a ikel lousbech. 15E ngdi ngak a dirkak kula ikel kuusbech el ngar sel kmal kirel, ma ka kuluches a ikal tekoi el mengerechir a ngera er kemiu. Ng bai soak el mad er a kbechere ngii di le chad me le nguu er ngak a uchul omeruul chisek. 16Ele lsekum ak umerk er a Ebangkelio, e tia diak bo luchul omeruul chisek. Ele tiang a kirek el meruul er ngii el tekoi. Ak di kmal mo chebuul a lsekum ng diak kumerk er a Ebangkelio. 17Ele lsekum ng telbilel a renguk el omerk er ngii, e ak mo ngma omeksullek er ngii, ma lak le telbilel a renguk, me ngii a di ngerchelek er a Dios. 18Me ng ngera mo omeksullek? A mo omeksullek a omerk er a Ebangkelio e diak kulai a udoud el kirel, ma ka kungerchir a ngerang el kirel a urerek er a Ebangkelio. 19Ngak a mededaes el chad el diak ksibil a ngii di le chad. Ak di rirellak el mo sibrir a rokui el chad, me ng mo sebechek el ngoititerir a re betok el chad, el tirkel mo sebechek, e mekrolterir el mor a Kristus. 20Me sel kngar a delongelir a re chad er a Judea, e ak meruul er ngak el mo oltirakl a blekerdelel a klengar er a re chad er a Judea, me ng mo sebechek el ngoititerir el mor a Kristus. E a kngar a delongelir tirkel rrengodel er otireklel a Llach el mlar a Moses el mei, e ng diak krrengodel el ua itir, e ak di meruul er ngak el mo ua itir, me ng mo sebechek el ngoititerir. 21E a kngar a delongelir a re Chisentael, e ak meruul er ngak el mo ua ia re Chisentael, el diak kultirakl a Llecherir a re chad er a Judea, me ng mo sebechek el ngoititerir a re Chisentael el mor a Kristus. Ng diak le belkul a kmo ng diak kultirakl a llechul a Dios; a kultirakl er ngii a llechul a Kristus. 22E a kngar a delongelir tirkel dirkak bo le mesisiich el oumerang, e ak meruul er ngak el mor a deruchellir, me ng dirrek el mo sebechek el ngoititerir el mor a Kristus. Mak ua isei el meruul er ngak el ngar a rokui el bedengel a tekoi el kirir a rokui el chad, me ng mo sebechek el mor a bek el bedengel a ongedechuul el osebelterir a re bebil er tir. 23A kuruul el tekoi el rokui a di kirel a Ebangkelio, me ng mo sebechek el ngma dikesek er a klengeltengat er ngii. 24Kemiu a ulterekokl el medenge el kmo tirkel kaidesachel er a rurt a di tar tir a mo melai er a nguked. Me mrurt el kirel a mo meloched er a teb. 25Tirkel mor a klaidesachel a omekiai a betok el tekoi. Te ua isei el meruul er tir el mo sebechir el mo nguu a besiich el di mo mechut, e ngdi kid a mo melai er a diak bo le mechut el besiich. 26Isei ia uchul mak remurt el di melemalt el mo meloched er a teb, ma diak kkor ngikel melik el di mengesengsang. 27Ma bedengek a kulik er ngii el omtebechel er ngii; ele ng mekngit a kusisecheklterir a re bebil er a re chad, e ngak bo krebet er a belsachel.

will be added

X\