1 KORINTH 8

1Chelecha e kuk de bor sel tekoi el kirel a kall el mlodars er a bleob el chelid. Kede medengelii a omelekoi el kmo, “Kid el rokui a ngar ngii a ngeral dodengei.” A ikel lodenge chad a koididiur a rengul, e ngdi bltikerreng a bai meleketek. 2A lsekum a chad a omdasu el kmo ng medenge ngerang, e ng bai dirkak bo lodengei a ikel kirel el medengei. 3E ngdi lsekum a chad a betik a rengul er a Dios, e ngii el chad a lodengelii a Dios. 4Ma de bor sel tekoi el kirel a kall el mlodars er a bleob el chelid, e kede medenge el kmo a bleob el chelid a diak le ngerang el ngar ngii a klengar er ngii er a beluulchad, ma diak a chelid el ngar ngii el kuk ngodech er a di tal Dios. 5Ma lta e a re chad a kmo ng ngar ngii a chelid el ngar a eanged ma ngar a beluulchad, e meral betok a leko ng chelid ma leko te rubak, 6e ngdi kid a kmo ng di tal Dios a ngar ngii, el Chedam, el mlar ngii el mei a rokui el tekoi ma kirel ngii a uchul e kede chad; ma ngar ngii a di tal Rubak, el Jesus Krisrus, el luleak ngii a rokui el tekoi el me duubech, me kid me kede chad el oeak ngii. 7E ngdi diak le bek el chad a medengelii tial tekoi. A re bebil a mla mo smau er a bleob el chelid el me lmuut er chelechang, ma longa uldars, e te dirk omdasu el kmo ng kelel a bleob el chelid, e diak lesal meduch el tirterii a ungil ma mekngit, me te melebedebek el kmo te mla mo chelsechusem er a mekngit el ngii el kall a uchul. 8A kall a diak a le rellii er a delongeled kid ma Dios. A lak dongang, me ng ka ngeral bo le temellii er kid; ma dongang, me ng ka ngeral bo le rellii er kid. 9E ngdi bo mkerekikl me sel cho mimokl el meruul er ngii lak bo luchul e a re mechitechut el oumerang bo le rebet er a klengit. 10Ele lsekum a chad el mechitechut e diak lesal meduch el merriter er a ungil ma mekngit a mesekau, kau el leko ng ngar ngii a ngeral modengei el mo menga kall el ngar a templo er a bleob el chelid, e tiang ng diak bo losisecheklii me bo longa kall el mlodars er a bleob el chelid? 11Ma bo le ua isei, e ngikal mechitechut el chad a riedang, ele uchul e kau el leko ng ngar ngii a ngeral modengei, e ngii a tar kemiu, el dirrek el blo le mad el kirel a Jesus Kristus. 12Ma cho mua isei el mor a klengit el kirir a re bebil er kemiu el mengal choitechut a tebechelel a rengrir er a otireklel a ungil ma mekngit, e kom mor a klengit el kirel a Kristus. 13Ma le ua isei, e a lsekum a kall a rullii a tar ngak me ng mo ruebet er a klengit, e ng diak kluut el mo menga tech, me ng diak bo luchul e a tar ngak le rebet er a klengit.

will be added

X\