1 KORINTH 7

1Chelechang, e bo dosaod a ikel tekoi el mulluches el mer ngak el kirel. Ng ungil er a sechal a lak bo le bechiil. 2E ngdi ongetikaik el mor a deleboes a uchul, e a re bek el sechal bo lechur er a re becherir, ma re bek el redil me bo lechur er a re becherir. 3A sechal a kirel el olengesenges er a bechil e mo obengkel, ma redil me ng kirel el olengesenges er a bechil e mo obengkel. 4A redil a diak di le ngii el mengedereder er a bedengel; ng chederdellel a bechil. Ma sechal me ng dirrek el diak di le ngii el mengedereder er a bedengel; ng chederdellel a bechil. 5Kele mongreos er a tekoi er a chebechiil er a delongeliu. E ngdi cho mtilbir er a delongeliu el diak bo mdak el telkib me bo mededaes el kirel a nglunguuch, e ng di ungil. E a uriul er itiang, e mluut el mo dmak, me lak kom mechetakl er a Satan a bo lak le mekelmekl a rengmiu. 6Ng diak kuldurech er kemiu el mor tiang; ak di kongei er kemiu er tial rolel a mo chacheroid e lmuut el mo dmak. 7A meral soak a di bo le ua ingak a re chad el rokui. E ngdi kid a re chad a kakerous a dikesed er a Dios, ma tang a sebechel tiang, ma kuk tang a kuk ngodech a sebechel. 8A kuk tekingek el mor tirkel diak le bechiil me tirkel melakl dil a kmo ng ungil a lolemolem el diak le bechiil el ua ingak. 9E ngdi lak el sebechir el osarech a rengrir, e bo le bechiil kung. Ele ng bai ungil a bo le bechiil er a lomichoech a rengrir er a ngibes er a deleboes. 10E tirkel kuk bechiil a kungelechel er tir er a tekoi el diak le tekingek, ng tekingel a Rubak, el kmo a redil kele longoit ku er a bechil, 11(e ngdi le chitii, e ng kirel el melemolem el diak le bechiil, ma lechub e ng mo sumechii a delongelel ngii ma bechil e lmuut er ngii,) ma sechal me kele lorort er a chebechielel. 12E tirkel kuk bebil er a re chad a kdu er tir (a tekoi el di tekingek e diak le tekingel a Rubak) el kmo, a lsekum a Kristiano el chad a bechil a diak le Kristiano el dil, e ngii el dil a di ungil er a rengul a kie el obengkel, e kele lorort ku er a chebechielel. 13Ma lsekum a Kristiano el dil a bechil a chad el diak le Kristiano, e ngii el chad a di ungil er a rengul a kie el obengkel, e kele lorort ku er a chebechielel. 14Ele ngikel diak le Kristiano el chad a mla mechedaol el okiu a bechil, me ngikel diak le Kristiano el dil me ng mla mechedaol el okiu a bechil. Ele lak, e a re ngelekir a mo diak le ngar a belsachel er a re chedal a Dios, e ngdi mera er ngii e te ngar a belsachel. 15E ngdi lsekum ngikel diak le Kristiano a soal el mo cheroid, e bechere me bo le cheroid. E a bocha le ua isei, e ngikel sechal ma lechub e ngikel dil el Kristiano a mededesa er a chebechielel. Ele Dios a mla mekedongemiu el mo kiei el ngar a budech. 16Ke mekera e mo medengei, kau el Kristiano el dil el kmo ke mo osebelii a bechim; me kau el Kristiano el sechal, ke mekera e mo medenge el kmo ke mo osebelii a bechim? 17A re bek el chad a kirir el melemolem a klengar er tir el oltirakl a ikel kirir er a Rubak, me sel le mlokedong er a Dios el mo kirel. Tiaikid a llach el kulisechakl er ngii er a rokui el ikelesia. 18Ma le ngar ngii a mle blotk er ser a le mokedong, e lak bo losuld er a ultil a botk er ngii. Ma le ngar ngii a dimlak le blotk er ser a le mokedong, e lak le bor a botk. 19Ele ng diak le klou a belkul a kmo a chad ng blotk ng diak. A bai klou a belkul a kmo ng oltirakl a llechul a Dios. 20Ma re bek el chad di lolemolem a klengar er tir el ngar a ikel mle blekerdelir er a le mokedong el mo Kristiano. 21Me kau el chad, ke mle sibai er ser a cho mokedong? A le ua isei, e lak bo louedikel a rengum. E ngdi le ngar ngii a techellem el mo diak msibai, e mnguu ngii el techall. 22Ele sibai el chad el mlokedo er a Rubak a mededesa el chedal a Rubak; ng dirrek el ua isei, me ngikel diak le sibai el chad e mokedong a mocha sibil a Kristus. 23A Dios a milechar a klengar er kemiu e ngoikemiu me lak bo msibrir a re chad. 24Ma le ua isei e kemiu el odam, a re bek el chad di lolemolem el oltirakl er a Dios el ngar a ikel blekerdelir er a le mokedong. 25Chelechang, e kuk de bor tirkel ekebil el dirkak bo le bechiil. Ng diak a llechul a Rubak el bla knguu el kirir, mak mo dmu di uldesuek, ngak el rredemelel a doumera er ngii el chad, el klechubechub er a Rubak a uchul. 26Sel dolebedebek a ringel el de chelebangel, e a kumdasu e ng bai ungil a chad a di lolemolem el ngar sel le ngar ngii er chelechang. 27Me kau el sechal, ke bechiil? Kele mongeroid ku er kau er a bechim. Ada ng diak ke bechiil? Kele mosiik er a redil ku el mo bechil. 28E ngdi lsekum ke mo bechiil, e ng diak bor a klengit, ma lsekum a ekebil el dirkak bo le bechiil a mo bechiil, e ng diak le bor a klengit. E ngdi tirkel mo bechiil a mo metik a rengelel a klechad, e ngak a bai soak el ngosukemiu me ng diak bo mcharm. 29A kulekoi er ngii el tekoi kemiu el odam a kmo, ng olekeda ulebongel, me chelechal mor medad, e tirkel sechal el bechiil loruul er tir el ua ia lak le bechiil; 30me tirkel mekngit a rengrir loruul er tir el ua ia lak le mekngit a rengrir; me tirkel oldeu a rengrir loruul er tir el ua ia lak le deu a rengrir; me tirkel omechar a klalo loruul er tir el ua ia lak a ngera er tir; 31me tirkel ousbech a kloklel tial beluulchad loruul er tir el ua ia lak le mechesang er ngii. Ele blekeradel er tial beluulchad a di merael el mo nguemed. 32Ng soak a lak louedikel a rengmiu. A chad el diak le bechiil a ouedikel el kirel a tekingel a Rubak, e a di le mechesang er ngii a di oldeu er a rengul a Rubak. 33E a chad el bechiil a ouedikel el kirel a tekingel a beluulchad, e mechesang el oldeu er a rengul a bechil, 34me ng teloadel a rengul. Ma redil el diak le bechiil ma lechub e ng dirkak le bechiil a ouedikel el kirel a tekingel a Rubak, e a di le mechesang er ngii a oldars er a bedengel ma rengul er a Rubak; e a redil el bechiil a ouedikel el kirel a tekingel a beluulchad, e mechesang el oldeu er a rengul a bechil. 35Tial kulekoi er ngii a kirel a klungioliu, e diak kulekebai er kemiu er a ngii di le ngerang. Ng bai soak el ngosukemiu er a ungil rolel a tekoi, me kom mo mesiou er a Rubak el diak le teloadel a rengmiu. 36A lsekum a chad a omdasu el kmo ng diak lungil a blekerdelel el mor a ekebil el telbiil a delongelir el mo kaubuch, ele ngii el dikea loserchii a rengul el kirel, me ng omdasu el kmo ng mla mo kirel el mo bechiil, e le bor sel soal me bo le kaubuch, e ng diak le klengit. 37E ngdi lsekum a chad a diak a orrimel er ngii, e sebechel el mtebechelii a rengul, e mla tibir er a rengul a mechere ngikel ekebil me ng diak bo le kaubuch, e ng ungil el tekoi a le bor ngii el diak bo le bechil ngikel dil. 38Ma le ua isei, e ngikel mo bechiil a mor a ungil tekoi, e ngikel diak bo le bechiil a mor a lmuut el ungil tekoi. 39A bechiil el dil a diak le mededaes a dirk le kie bechil; e ngdi sel le mede bechil, e ng mededesa el mo bechil a ngii di le chad el soal, e ngdi kirel el mo oltirakl er a Rubak. 40E ngdi de bor a uldesuek, e ng bai lmuut el klou a deuil a rengul a lolemolem el di ua isei el diak bo le bechiil. Tia ia uldesuek e ak umdasu e a Reng er a Dios a dirrek el omesiur er ngak.

will be added

X\