1 KORINTH 6

1Ngera uchul ma le ngar ngii a ultuteklel a tar kemiu el kirel a delongelel ngii ma tar a Kristiano, e ng nguu ngii el tekoi el mor mederir a re chad er a kerrekeriil el diak le chedal a Dios, e diak le nguu el mor mederir a re chedal a Dios? 2Ng diak modengei el kmo a re chedal a Dios a mo oukerrekeriil er a beluulchad? Ma lsekum ng kemiu a mo oukerrekeriil er a beluulchad, e ng diak el sebechiu el smaod a mekekerei el tekoi? 3Ng diak modengei el kmo kid a mo oukerrekeriil er a re anghel? Ma le ua isei, e ng lmuut el kmal kired a oukerrekeriil a tekoi er tial beluulchad! 4Ma le dubech a choua isel tekoi er a delongeliu, e ngera me kom olab el mor a mederir a re chad el diak le ngar a belsachel er a ikelesia me te mesaod? 5Ak kmal merur er kemiu! Ng kol diak a di tal chad er a delongeliu el mellomes a rengul me ng sebechel el smaod a tekoi er a delongelir a re Kristiano, 6ma Kristiano a mocha olengasech er a tar a Kristiano er mederir a re chad el diak el Kristiano? 7A klaiuengasech el ngar ngii er a delongeliu a ochotii el kmo kom mla touchakl er a rolel a doltirakl er a Kristus. Ng diak bai lungil a di berekakl a mekngit el ekor kemiu? Ng diak bai lungil a cho bechititerir a re chad me le chebeldkemiu? 8Ng bai kemiu a meruul a mekngit e mengeblad, e meruul a choua isel tekoi el mor a re bebil er kemiu el Kristiano. 9Ng diak modengei el kmo a re mengebirukel el chad a diak bo le siseb er a Rengedel a Dios? Alii ng diak el sebechir el mo soiseb er a Rengedel a Dios a re ngar a deleboes el delengerenger, ma re mengull el meluluuch a bleob el chelid, ma re ngar a laokreng, ma re menguchet a raod, 10ma re merechorech, ma re bechelechelingaol a rengrir, ma re di cheltelaol, ma re melemall a chisir a re chad, ma re mengeblad e mela kloklir a re chad. 11A re bebil er kemiu a ua isei a blekerdelir. E ngdi kemiu a chad el mlekikiid er a klengit e mechedaol, ma Dios a silmechii a delongeliu kemiu me ngii el okiu a Rubak el Jesus Kristus ma Chedaol Reng er a Dios er kid. 12Ng sebechel a chad el kmo, “Ng di subed er ngak a rokui el tekoi.” Ng ua isei, e ngdi diak el rokuil tekoi a ungil er kau. Ng sebechek el kmo, “Ng di subed er ngak a rokui el tekoi,” e ngdi diak kbechikak me bo lorreder er ngak a ngii di le ngerang. 13A kuk tar a chad a sebechel el kmo, “A kall a kirel a diil, ma diil a kirel a kall.” Ng ua isei, e ngdi Dios a mo okngemed a klengar er a ikal erung. Ma bedenged a diak le kirel a deleboes el delengerenger; ng kired el ousbech er ngii el mesiou er a Rubak, ma Rubak a oungerachel a kirel a bedenged. 14A Dios a ulekisii a Rubak er a kodall, me ng dirrek el mo okisid el oba klisichel. 15Ng diak modenge el kmo a bedengiu a telkib er a bedengel a Kristus? Ma le ua isei, e ng di ungil a knguu a telkib er a bedengel a Kristus el mo telkib er a bedengel a redil el olterau er a bedengel? Ng kmal diak! 16Ada ng diak modenge el kmo ngikel mo obengkel a redil el olterau er a bedengel a mla mo tal chelechad ngii me ngii? Ng di ua isel lolekoi er ngii a Chedaol Llechukl el kmo, “Tir el terung a di mo tal chelechad.” 17Me ngikel mo bereked er a Rubak a mo ta rengul ngii ma Rubak. 18Mongeroid er kemiu er a deleboes el delengerenger. A ikel rokui el bebil er a klengit el le bor ngii a chad a di ngar a ikrel a bedengel; e ngdi ngikel mor a deleboes el delengerenger a mo rullii a klengit el kirel a bedengel. 19Ng diak modenge el kmo a bedengiu a chedaol el templo el le kiei er ngii a Chedaol Reng el ngar a chelsiu, el le bilskemiu a Dios? Kemiu a diak di le kemiu el merreder er kemiu, ele kom chederdellel a Dios. 20Ng milechar a klengar er kemiu, me mousbech a bedengiu el kirel a odengesel a Dios.

will be added

X\