1 KORINTH 5

1Ng ngar ngii er orengesek er chelechang er ker me ker er a chisel a deleboes el delengerenger el ngar ngii er a delongeliu, el kmal mekngit el ka le ngar ngii er a delongelir a re chad el diak lodengelii a meral Dios. Ele orengesek a kmo ng ngar ngii a chad el bad el obengkel a bechil a demal. 2Ng mekera e sebechiu el meruul a chisiu? Ng diak bai le kiriu el lmangel, e ngikel chad el mlor tial tekoi le modik er a delongeliu? 3E ngak a di cheroid a bedengek er kemiu, e ngdi renguk obengkemiu me ng di ua ia kngar bitar kemiu mak uba ngklel a Rubak er kid el Jesus 4e mla oterkeklii er a renguk a belsel ngikel chad el mlor tial mekngit el tekoi. Me sel cho bo mkldibel, e a renguk obengkemiu, me ng okiu sel klisichel a Rubak er kid el Jesus el obengked a de kldibel, 5e ng kiriu el nguu ngikel chad el oterkeklii er a Satan me bo le temellii a bedengel el rokir, e ngii bo le sobel er sel sils el le mer ngii a Rubak. 6Ng diak lungil a cho moleomel er kemiu. Bo mungil el medengei el kmo a omkukel a blauang a di kekerei e mkukii a klou el klalo. 7Mcheroid er kemiu a mekngit el mechut el omkukel a blauang, me bo le klikiid a klechad er kemiu, el ua ia rremotel el blauang el diak a omkukel. Ele Kristus el Ngelekel a Sib er a Baskua er kid a mla metenget. 8De ngar a Chedaol Sils er a Baskua, el diak dousbech a blauang el ngar ngii a mechut el omkukel, el klengit ma delengerenger, e bai dousbech a diak a omkukel el blauang, el ultebechel e klikiid el klechad er kid. 9Ak milluches er a babier er ngak el ekor kemiu el kmo lak mobengterir tirkel ngar a deleboes el delengerenger. 10Ng dimlak kulekoi el kirir tirkel diak lodengelii a Dios me te ngar a deleboes el delengerenger, ma lechub e ng merechorech a rengrir ma blekerdelir, ma lechub e te mengull el meluluuch a bleob el chelid. Ng diak le tirkang, ele ng diak el sebechiu el tuobed er a chelsel tial beluulchad el mo diak mobengterir. 11A kulekoi er ngii a kmo ng diak bo mobengkel a chad el kmo ng odam e ngar a deleboes el delengerenger, ma lechub e ng ngemokel a rengul, ma lechub e ng mengull el meluluuch a bleob el chelid, ma lechub e ng melekoi a mekngit el kirir a re chad, ma lechub e ng di cheltelaol, ma lechub e ng merechorech; el mo lmuut er a blengur me ng diak bo mobengkel. 12Ng diak le ngerchelek a oukerrekeriil er a re diak le bebil er kid. E kemiu, ng diak bai le kiriu el oukerrekeriil er a re bebil er kemiu? 13Bechititerir a re diak le bebil er kid me le Dios a omdasu a blekerdelir. A Chedaol Llechukl a kmo, “Mcheridii er a delongeliu ngikel chad el ngar a deleboes el delengerenger”

will be added

X\