1 KORINTH 4

1Ng kiriu el melebedebek el kmo kemam a mesiungel a Krisrus e oungerachel el omerk a klemerang el bertelel a Dios. 2E a re chad el oungerachel a tekoi a kirir el sebeched el ultuil er tir er a ngerchelir. 3Me ng diak a ultutelel er ngak a le kemiu, ma lechub e le tar a kerrekeriil er a re chad a merriter a blekerdelek. Ng di ngak e diak kurriter a blekerdelek. 4Ng diak a ngeral kudengelii el sebechek el mo mukerrekeriil er ngii. E ngdi diak kulekoi el ua isei el meledaes er ngak. A Rubak ingii ngikel merriter er ngak. 5Me lak morriter a blekerdelel a ngii di le chad er uche er a belsechel, er uche er a le me Rubak. Ng ngii ia mo meketakl a ikel berrotel er a ilkolk e mo ocholt a ikel ngar ngii er a rengrir a re chad. E seikid e a re bek el chad a mo ngma odanges er a Dios el oltirakl a blekerdelir. 6A ikal tekoi a kuleltaut er ngak ma Apolos el kiriu, kemiu el odam, me ng mo sebechiu el mesuub er kemam, me ng diak bo mengelakl er a llechukl el rolel a tekoi, me lak a tar kemiu el metuchel el mo oltirakl er a tar a chad e omtok er a tang. 7Ng techa rirellemiu el mor bab er a re bebil er a re chad? A ikel ngar ngii er kemiu ng diak le bilskemiu a Dios? Ma le ua isei, e kom mekera e olengesechekl er kemiu el ua di ble le kemiu a uchul e ng ngar ngii er kemiu? 8Kemiu er chelechang kom mla mo ungilbesmiu? Kom mla mo meteet? E mla mo king e kemam a diak? Chulekum me kom meral mla mo king, maki mo king el obengkemiu. 9Ele kumdasu el kmo a Dios a rirellemam a re apostol el kmal mor iou, el di ua ia re chad el mla obals el mor a kodall, ele ki mla mo ongengael er a beluulchad er a re anghel ma re chad. 10Aki mekebelung, el Kristus a uchul; e kemiu a mellomes a rengmiu, ele kom oumera er a Kristus. Aki mechitechut, e kemiu a mesisiich. Kemiu a longull er kemiu a re chad, e kemam a diak. 11Aki di songerenger e meched a rengmam el me lmuut er chelechang, e di kermechut a bilam, e di chelsuar, e diak a ultebechel el delengcheklam, 12e di meringel el oureor el olab a chimomam. E a lolebeakl er kemam a re chad, e aki omekngeltengat er tir; ma loldechelakl er kemam, e aki di outekangel; 13ma lolekoi a mekngit el kiram a re chad, e aki melekoi a ungil er tir. Aki di cheitel kung er a rengrir a re chad er tial beluulchad, e di mengelengalek er a rengrir el rokui el me lmuut er chelechang. 14Ng diak kuluches a ikal tekoi el mer kemiu el omekrur er kemiu; ak bai olisechakl er kemiu el di ua ia cho mngelekek el betik er a renguk. 15Ele chomko te kmal betok a rumesiur er kemiu el oltirakl er a Kristus, e ngdi diak le betok a re demmiu. Ele ng di ngak a mlo demmiu er a klengar er kemiu el oltirakl er a Jesus Kristus, ngak el ngiluu osisecheklel a Ebangkelio el mer kemiu. 16Mak mengelechel er kemiu me mosuub er ngak. 17Tiaikid ia uchul e ak ulderechii a betik er a renguk e blak a rengul el ngelekek el oltirakl er a Rubak, el Timothy el me omeklatk er kemiu er a rolel otireklel a Krisrus el kultirakl er ngii, e olisechakl er ngii er a Ikelesia er ker me ker. 18A re bebil er kemiu a mla mo medeomel, ele tomdasu el kmo ng diak kikong. 19E ngdi bo le soal a Rubak, e ak di mereched el me oldingel er kemiu, me sel kmermang, e ak mo meche tekingir e bai mo tirterii a klisichir itirkeikid el chad el mla mo medeomel. 20Ele Rengedel a Dios a diak di lomelekoi, e ng klisiich. 21Me ng ngera somiu? Ak mer kemiu el oba chelebed, ada kmei el oba bltikerreng ma delemedemekerreng?

will be added

X\