1 KORINTH 3

1A dolekoi a klemerang e rudam er ngak, e ng dimlak el sebechek el mengedecheduch er kemiu el ua re chad el ngar ngii er tir a Chedaol Reng. Mak milengedecheduch er kemiu el ua cho mchad er tial beluulchad, el dirk tolechoi er a rolel a doumerang er a Kristus. 2Mak uleltut er kemiu er a milk, e mileche medecherecher el kall, ele ng dimlak el sebechiu el menga medecherecher el kall el me lmuut er chelechang, 3ele blekerdeliu a di ua ia blekerdelir a re chad er tial beluulchad. Ele le ngar ngii a chelechei ma klautok er a delongeliu, e ng diak mchelutel er a re di chad er tial beluulchad el oltirakl a blekerdelir? 4Ele sel ledu tar a chad el kmo, “Ngak a oltirakl er a Paulus,” ma tang a kmo, “Ngak a oltirakl er a Apolos,” e ng diak lochotemiu el kmo kom di oltirakl a di rolel a klechad? 5A Apolos ng techang? Ma Paulus me ng techang? Kemam a di mesiungel a Dios, el di mle roliu el mo oumerang. Maki kerous e meruul a ngerchelam el le bilskemam a Rubak: 6me ngak a mlo dolemii a dellomel, e a Apolos a millubs er ngii er a ralm, e ngdi Dios ingii ia uchul e ng merrael ngii el dellomel el mo klou. 7Me ngikel melalem me ngikel melubs a diak le klou a ultutelir; ng bai di Dios a klou a ultutelel, ele ng ngii ia omekeroul er a dellomel. 8Ngikel melalem me ngikel melubs a di osisiu, me te di dul mo ngma omeksulir el kirel a urerir. 9Ele kemam a di kldemel a Dios er a ureor, e kemiu a sers el loureor er ngii a Dios. Kemiu a dirrek el blai el lomekedechor er ngii a Dios. 10Me ngak a uluusbech a dikesek er a Dios e uluureor el ua dachelbai el chad el meruul er a omekedecheraol, e a kuk tar a chad a omekedechor er a blai er ngiil omekedecheraol. Ma bek el chad bo le kerekikl er a kmo ng mekera bo lomekedechor. 11Ele ng diak a ngodech el omekedecheraol el sebechel a chad el meruul er ngii el ngodech er sel mla meruul, el ngii a Jesus Kristus. 12Te ngar ngii a re mo omekedechor er bebul tial omekedecheraol el olab a kolt, ma lechub e ng silber, ma lechub e ng meringelchad el bad, ma lechub e ng kerrekar, ma lechub e ng chudel, ma lechub e ng chelechedal a beras, 13e a klungiolel a urerir a mo measem er a ngau me ng mo chemolt a meral klungiolel. Ele sel Sils e a ngau a mo ocholt a urerir a re bek el chad; ng mo measem er a ngau me ng mo chemolt a meral klungiolel er sel Sils er a Kristus. 14A lsekum sel mlo meteketek er omekedecheraol a diak le mekesakl er a ngau, e ngikel rirellii a mo nguu omeksullel. 15E ngdi lsekum sel le rirellii a nguemed er a ngau, e ng mo metom er ngii, e ngdi ngii a mo suobel el di ua ia le chiliis er a ngau. 16Kemiu a ulterekokl el medenge el kmo kom templo er a Dios, ma Chedaol Reng a kie er a chelsiu. 17Ma lsekum a chad a tomellii tial templo er a Dios, e a Dios a mo meringel el melsii ngii el chad. Ele templo er a Dios a chedaol, e kemiu ngii el templo. 18Lak a chad el di ngii el mengeblad er ngii. A lsekum ng ngar ngii a chad er a chelsiu el omdasu el kmo ng mellomes a rengul er a tekingel tial beluulchad, e le rellii el mor a belsachel er a re mekebelung, me le meral mo mellomes a rengul. 19Ele llomeserreng er tial beluulchad a chelsengsang er medal a Dios. Ng di ua ikel lolekoi a Chedaol Llechukl el kmo, “A Dios a omdechem er a re mellomes a rengrir el chad er a llemesir.” 20Ma lmuut el tar a bades a kmo, “A Dios a medenge el kmo a uldesuir a re mellomes a rengrir el chad a di chelsengsang.” 21Ma le ua isei, e lak a chemat er a ikel sebechir a re chad el remuul, ele rokui el tekoi a di kiriu. 22A re bek el chad, a Paulus, ma Apolos, ma Petrus, a rokui el di kiriu; ma rokui el tekoi, a beluulchad, ma klengar, ma kodall, me chelechang, ma ngar medad, me ng rokui el di kiriu. 23Me kemiu a kirel a Kristus, ma Kristus a kirel a Dios.

will be added

X\