1 KORINTH 2

1Ngak er ser a kmei er a delongeliu, kemiu el odam, el me omerk er a mle berrotel el klemera el kirel a Dios, e ng dimlak kuusbech a mengasireng el tekoi ma llomeserreng. 2Ele ktilbir er a renguk a obes a rokui el tekoi er a kngar a delongeliu, e di melebedebek er a di tal Jesus Kristus ma kodellel er a kerus. 3Me ser a kngar a delongeliu e ak mlo mechitechut e ulemritel er a dakt, 4ma kungedecheduch ma kulisechakl e ng dimlak kuusbech a duch er omelekoi el ultuil er a llemesel a klechad, e bai millisiich a tekingek el ultuil er a klisichel a Reng er a Dios. 5Me kemiu a oumera er chelechang el diak multuil er a llemesel a klechad e bai ultuil er a klisichel a Dios. 6Me ng ua isei, e ngdi ngak a ngar ngii a llomeserreng el kumerk er ngii er a delongelir tirkel mla mo mesisiich el oumerang. Ngii el llomeserreng a diak el llomeserreng er tial beluulchad, ma ka le llemesir a re mengeteklel tial beluulchad el oketa di mo nguemed. 7Ngii el llomeserreng el kumerk er ngii a llomeserreng er a Dios el mle berrotel, el lulterkeklii el mo uchul a klebkelled er uche er a lokedbechii a beluulchad. 8Ng diak a tar a re mengeteklel tial beluulchad el mle medengelii tial llomeserreng. Ele chomko te mle medengelii, e ng dimlak le nguu a Rubak el oba klebkellel a Dios el mo mekodir er a kerus. 9E ngdi Chedaol Llechukl a kmo, “A ikel dimlak a chad el mes, ma lechub e te remenges, ma lechub e te mdasu el tekoi a le kildmokl a Dios el kirir tirkel betik a rengrir er ngii.” 10E ngdi tiaikid el llomeserreng el mle berrotel a lulechotii er kid a Dios el okiu a Chedaol Reng, ele Chedaol Reng a mengetiit a rokui el tekoi el mo lmuut er a ngar emel er a uldesuel a Dios. 11Ele ng techal chad a medengei a uldesuel a tar a chad. Ng di rengul ngii el chad e merekong. Ng dirrek el ua isei el diak a chad el medengei a uldesuel a Dios; ng di Chedaol Reng er a Dios a medenge ngar a rengul. 12Me chelechang, e a reng el bla de nguu a diak le reng er a beluulchad; ng bai Reng el mlar a Dios el mei, el uchul e kede mo medengei a ikel bla leruul a Dios el kired. 13Me sel dongedecheduch el mesaod a tekoi er a reng er tirkel ngar ngii er tir a Reng er a Dios, e kedousbech a tekoi el dimlak de mosisechakl er ngii er a llomeserreng er a klechad, e bai mlosisisechakl er ngii er a Reng er a Dios. 14Me ngikel chad el diak er ngii a Reng a diak el sebechel el ngmai a ikel lomsa Dios el okiu a Reng er ngii. A choua isel chad a diak lomtab a belkul a ikel lomsa Dios, me ng di chelsengsang er a rengul, ele ng di reng a dousbech er ngii el merriter a belkul a ikang. 15E ngikel chad el ngar ngii er ngii a Chedaol Reng a sebechel el tiriter a belkul a bek el tekoi, e diak a chad el sebechel el merriter er ngii el chad. 16Ng di ua ia ikel lolekoi a Chedaol Llechukl el kmo, “Ng techa medenge ngar a rengul a Dios? Ma techa sebechel el olisechakl er ngii?” Kid a ngar ngii er kid a Reng er a Kristus.

will be added

X\