1 KORINTH 16

1Chelechang, e kuk bo kiuul el mor sel tekoi el kirel a tenget el mo ngiuul el mo olengeseu er a re chedal a Dios el ngar a Judea. A ikel mle tekingek el mor a ikel ikelesia er a Galatia a dirrek el cho bo moltirakl. 2Me sel uchelel a bek el sandei, e a ta ma tar kemiu a kirel el mo imakl a bebil er a udoud, el mor a ikel sebechel el oltirakl a ikel me soiseb er ngii e kudmokl, me lak bo le ngiuul a tenget sel kikong. 3Sel kikong e ak mo mesterir tirkel chad el bla mngilteterir, a babier el mo olecholt er tir, me te mo ngmai a tengetengiu el uldak er ngii el mor a Jerusalem. 4E a lsekum ng ngar ngii a ultutelel a kbong, e te mo obengkek el mong. 5Ak eko oldingel er kemiu er uriul er a kbo er a Masedonia, ele kmelebedebek a mo okiu a Masedonia. 6Ak locha mo telkib el ngar tilecha el obengkemiu, el sebechel el rokir a belsechel a kerrasem, me seikid e ng mo sebechiu el ngosukak er a omerolek el mor sel kuk kumdasu el mor ngii. 7Ng diak el soak er chelechang el di touchakl el mesekemiu e merael, mak melebedebek a mo telkib el ngar tilechang el obengkemiu, a bo lungilbesul er a rengul a Rubak. 8Ak umdasu a di ngar tie er a Efesus el mo lmuut er a Pentekost, 9ele te betok a rumtok er ngak er tiei, e ngdi ngar ngii er itiei a klou el techellek el remuul a meklou a ultutelel el tekoi. 10A lsekum a Timothy ekong, e bo mungil er ngii, me lak bo louedikel a rengul er a delongeliu, ele ng dirrek el oureor el kirel a Rubak el ua ingak. 11Lak a chad el mo kor a metetoech a medal er ngii, e bo mungil el ngosuir me le chelellakl omerolel, me bo le sebechel el lmuut el mer ngak, ele kmengiil er ngii el obengterir a re bebil er kid el Kristiano el mei. 12E a Apolos el tar kid a ksilal melekoi er ngii me leko loldingel er kemiu el obengterir tirkel bebil er kid, e ngdi ngii a mle metacherbesul er a rengul a eko er chelechang. Me sel le bor ngii a techellel, e ng echikung. 13Di mchelellakl el mengiil er a ulebongel, e bo mesisiich el oumerang, e le mesisiich a rengmiu, e lak kom tuchakl. 14E a ikel rokui el cho moruul, moruul el oba bltikerreng. 15Kom medengei kemiu el odam er ngak el kmo a Stefanas ma re chad er a blil a mle kot el obult el mo Kristiano er a Akaia, e kmal mle kerekikl el mengedmokl er a re chedal a Dios, 16mak mengelechel er kemiu me morrenges a tekingir choua itirkal chad ma ngii di le chad el ledak el oureor. 17Ng kmal ungil a renguk ele ng mlei a Stefanas, ma Fortunatus, ma Akaikus, ele te mlo mtechikemiu el mle dibus, 18e rirellak el mo kie renguk, el mo ua ikemiu er iser a leko er kemiu. Alii kom mo ungil el orrenges er choua itirkal chad. 19A ikelesia er a Asia a mesumech a yorosku er tir el ekor kemiu. Ma Akuila ma Prisila ma ikelesia el me kldibel er a blirir me te mesumech a mekeald el yorosku er a klekristiano. 20A rokui el Kristiano el ngar tiei a mesumech a yorosku er tir. Me kemiu me bo mkautkeu el ngar sel ungil el rolel er a ruumerang er a Kristus. 21Chelechang e ngak el Paulus a meluches er tiang el kmo: Ak uuetkeu er kemiu. 22A lsekum ng ngar ngii a diak le betik a rengul er a Rubak e bo le delebeakl. Maranatha—Rubak er kemam, mei! 23A krasia er a Rubak el Jesus bo lobengkemiu. 24Ma bltikerreng er ngak lekor kemiu el rokui el okiu a Kristus Jesus. Amen.

will be added

X\