1 KORINTH 15

1Chelechang, e ng soak el omeklatk er kemiu e rudam er ngak er a Ebangkelio el kulemerk er ngii er a delongeliu, me kemiu a ngiluu e mo oumerang el ultuil er ngii. 2Tiaikid a uchul e kom mo suobel, a lsekum kom smisichemiu el orkedii, ele lak e ng di mo diak a ultutelel a kmo kom mlo oumerang. 3Ak uliuelii el ekor kemiu sel kot el klou a ultutelel el tekoi el kngiluu el kmo a Kristus a mlad el kirel a kngtid el di ua ikel ngar a Chedaol Llechukl, 4e meldakl, e a ongedei er a sils e a Dios a ulekisii er a kodall el ua ikel ngar a Chedaol Llechukl, 5e sola e ng mlo duum er a Sefas, e a uriul er itiang e ng mlo duum er a re truich ma terung. 6E dirrek el kuk uriul er itiang e ng di mle ta e mo duum er a re betok er a 500 er a rubengkel, el oumesingd er tir a dirk kiei, e ngdi re bebil er tir a mla mad. 7E sola e ng kuk mlo duum er a Jakobus, e mo duum er a re apostol el rokui. 8E sel kmal mlo uriul er ngii, e ng mle duum er ngak, ngak el kor a ngalek el cherellel a iliit er a belsechel. 9Ele mera er ngii e ngak a kot el ngar uriul er a re apostol, el diak lungil a kmokedong el apostol, ele kuleldechelakl er a Ikelesia er a Dios. 10Ngdi krasia er a Dios a uchul, e ak ua ingak er chelechang, ma krasia er ngii el rirellak el mo apostol a dimlak bo lak a ultutelel. Ngak a bai liluut el meringel el oureor er tirkel bebil er a re apostol, e ngdi mera er ngii a diak le ngak a uchul, ng krasia er a Dios el mlar ngak a uchul. 11Ma ble le ngak ma lechub e ble le tir a ullisechakl er ngii, e tiaikid ia kimolemolem el olisechakl er ngii, me kemiu a oumera er ngii. 12Me chelecha e a lsekum a osisechakl a kmo a Jesus a lulekisii a Dios er a kodall, e ng mekera e sebechir a re bebil er kemiu el kmo ng diak okiis er a kodall? 13A lsekum ng diak okiis er a kodall, e a Dios a dimlak lokisii a Kristus; 14e a lsekum a Dios a dimlak lokisii a Kristus er a kodall, e a tekoi el kim omerk er ngii me kemiu oumera er ngii a diak a belkul. 15E lmuut kung me kemam a mocha chemolt el cheleuid osisecheklam el kirel a Dios, ele ki melekoi el kmo ng ulekisii a Kristus er a kodall, e ngii a dimlak lokisii a lsekum ng meral tekoi el kmo, a re mla mad a diak bo le bekiis er a kodall. 16Ele lsekum a re mla mad a diak bo le bekiis er a kodall, e a Kristus me ng dimlak le bekiis er a kodall. 17A lsekum a Dios a dimlak lokisii a Kristus er a kodall, e a cho moumera er ngii a diak a belkul, me kemiu a dirk rrengodel er a kngtmiu. 18Ng dirrek el belkul a kmo tirkel uluumera er a Kristus e mla mad a dimlak bo le sobel. 19Ma lsekum kede oumera er a Kristus el di kirel tial beluulchad e merekong, e kede kot el chebuul er a re chad el rokui. 20E ngdi mera er ngii a Dios a ulekisii a Kristus er a kodall el ochotii el kmo tirkel mla mad a dirrek el bo lokisterir er a kodall. 21A kodall a mlei el okiu a tal chad, me ng dirrek el ua isei a okiis er a kodall a mlei el okiu a tal chad. 22Ele ng Adam a mlo uchul e a rokui el chad a mor a kodall, me ng dirrek el ua isei el Kristus a mlo uchul e a rokui el chad a mo mekiis er a kodall. 23E ngdi te mo mekiis er a kodall el oltirakl a blechebechir, ng omuchel er a Kristus, el ua kot el rodech, e sel lluut el mei, e te mochu tirkel chedal. 24E sola e ng mei ku ulebongel; e seikid e a Kristus a mo torob a bek el bedengel omerreder, ma klisichel omerreder, ma klisiich, e mo nguu a renged el oiuelii el mor a Dios el Chedam. 25Ele ng kirel a Kristus el oba klisiich el mo lmuut er sel bo le relleterir a re cherrouel el rokui el mo mechitechut el le serrochel er tir er eungel ochil. 26E a cherarou el kmal mo uriul el bo lokngemedii, a kodall. 27Ele Chedaol Llechukl a kmo, “A Dios a riruul a rokui el tekoi el mo chederdellel el ngar eungel ochil.” E ngdi bleketakl el kmo, “A rokui el tekoi el mo chederdall el ngar eungel ochil” a diak luldimukl er ngii a Dios, el ngii a riruul a rokui el tekoi el mor eungel omerrederel a Kristus. 28Me sel le bocha er eungel omerrederel a Kristus a rokui el tekoi, e Ngii el Ngalek a di Ngii el mo rullii el mor eungel a Dios, el riruul a rokui el tekoi el mor eungel omerrederel a Kristus. E seikid e ng di mo Dios a olab a klisiich el kirel a rokui el tekoi er a chelsir a re chad. 29Ele lak le ua isei, e ng ngera ultutelel a re chad a bo le nguu a techolb el kirir a re mla mad? A lsekum a Dios a diak bo lokisterir a re mla mad, e ng ngera ultutelel a re chad a bo lolai er a techolb el kirir tirkel mla mad? 30Me kid me ng ngera me kede di mechelaol er a klengar er kid er a bek el sikang? 31Rudam er ngak, ngak a di chemau a kodall er a bek el sils. Ng smiich a renguk er kemiu el oumerang e bereked er a Kristus Jesus el Rubak er kid, ma uchul mak melekoi er kemiu el ua isei. 32Ng ngera ultutelel er ngak, a lsekum ak di uleldechelakl a “tebelik el charm” er ser a kngar a Efesus, el di omdasu a tekingel a klechad e merekong? A lsekum ng diak a okiis er a kodall, e bochu doltirakl er sel omelekoi el kmo, “Di dongang e dolim ele kede mad er a klukuk.” 33Lak kom mecheblad. “A dobengkel a dengerenger el chad, e kede mo chelutel er ngii.” 34Bo le mutebechel a rengmiu, e mcheridemiu er a klengit. Ele re bebil er kemiu a urriid er a rengrir a Dios. Ak melekoi er tiang el omekrur er kemiu. 35E ngdi ngar ngii a mo oker el kmo, “Te mekera e mo mekiis er a kodall a re mla mad? A le mei e ng ua ngera bedengir? 36Ke kebelung! A tane el bo mdelemii a diak le dubech a lak le kot e le mad el mo diak le tane. 37E sel bo mdelemii a diak le sel dellomel el mo duubech er a uriul. Ng di tane el ua redechel a wheat ma lechub e ng kuk tar a dellomel. 38Ngdi Dios omsa chelechedal a tane er a dellomel. Ng omsa derta ma tal tane sel soal bedengel. 39Ma tech el rokui me ng diak di losisiu. Ng ngar ngii a techel a chad ma kuk techel a charm, ma techel a suebek el charm, ma techel a ngikel. 40Ma ngar ngii a chelechad er a eanged ma chelechad er a chutem el kakerous, ma klebekelel a chelechad er a eanged a tang, ma klebekelel a chelechad er a chutem a kuk tang. 41Me ng ngar ngii a klebekelel a sils el tang, ma klebekelel a buil el kuk tang, me ng di btuch e kakerous a klebekelel a tang er a tang. 42Ng dirrek el ua isei a okiis er a kodall er tirkel mla mad. Sel bo le medakl a bedengel a chad, e ng mlad e mo mechut, e sel bo le bekiis er a kodall, e ng me ngar el dikea bo le mechut. 43Me sel bo le medakl, e ng mengelengalek e mechitechut; e sel le bekiis er a kodall, e ng klebokel e mesisiich. 44Sel bo le medakl e ng chelechad er a tech, e sel le bekiis er a kodall e ng chelechad er a reng. 45Ele Chedaol Llechukl a kmo, “Ngikel mle kot el chad el Adam a mlo chad el ngar ngii a klengar er ngii”; e ngikel mlo uriul el Adam ingikel Reng el uchul a klengar. 46A mle kot el mei a dimlak le klengar er a reng, ng klengar er a klechad. E a uriul er ngii e ng mle klengar er a reng el mo mtechir. 47Ngikel mle kot el Adam a mle duubech er tial beluulchad el mlengai er a chutem; e ngikel ongerul Adam a mlar a eanged el mei. 48Me tirkel me duubech el okiu a rolel tial beluulchad a chelutel er ngikel mle duubech el mlengai er a chutem. E tirkel me duubech el okiu a tekoi er a reng a chelutel er ngikel mlar a eanged el mei. 49Me kid el ua isei el bliull er okesiul ngikel chad el mlengai er a chutem a dirrek el mo bliull er okesiul ngikel chad el mlar a eanged el mei. 50A kulekoi er ngii el tekoi e rudam a kmo, a tech ma rasech a diak el sebechel el mediukes er a Rengedel a Dios, me sel mad a diak el sebechel el otekur sel diak le mad. 51Morrenges e kdelii er kemiu tial tekoi el mle berrotel. Ng diak de rokui el mor a kodall, e ngdi kede rokui el mo obult, 52el kmal di mereched, el ua tal busechmad, sel le mekimd a ulebongel el ngerel a trombetang. Ele ng mor ngii a trombetang, e a re mla mad a mo mekiis er a kodall el dikea bo le mad, e seikid e kede mo mengodech. 53Ele tial klechad er kid el sebechel el mo mechut a kirel el obult el mo diak bo le mechut; me tial klechad er kid el mo mad a kirel el obult el mo diak le mad. 54Me sel lobult el mocha ua isei, e ng mo tmaut sel ngar a Chedaol Llechukl el kmo, “A kodall a mla remiid a klisichel el mla meterob el rokir!” 55“Kau el Kodall, ng ngar ker a klisichem? Kau el Kodall, ng ngar ker orsum el omekoad?” 56A orsul a kodall el omekoad a klengit, e a klisichel a klengit a ngar a Llach el mei. 57E ngdi kmal mesaul a Dios el rullid el mo mesisiich el okiu a Rubak er kid el Jesus Kristus. 58Ma le ua isei, e kemiu el betik er a renguk el odam er ngak, mutebechelemiu me lak mesim, e bo le blak a rengmiu el oureor el kirel a Rubak, ele kom medenge el kmo a ureriu el kirel a Rubak a diak bo lak a ultutelel.

will be added

X\