1 KORINTH 14

1Me moruul er kemiu el mo oltirakl er a bltikerreng, e bo le blak a rengmiu el osiik a ngat er a Chedaol Reng, e a ngar uche er ngii a duch er omelekingel a tekingel a Dios. 2Ele ngikel melekoi el ousbech a ngodech el bedengel omelekoi a diak lolekoi er a re chad; ng melekoi er a Dios, ele ng diak a chad el medenge tekoi el lolekoi, ele ngii el metuchel er a Chedaol Reng el melekoi a tekoi el diak a medengei. 3E ngikel kuk melekoi a tekingel a Dios a melekoi er a re chad a tekoi el olengeseu er tir, e melisiich a rengrir, e mengelaod er tir. 4Ngikel melekoi el ousbech a ngodech el bedengel omelekoi a di ngii el melisiich er ngii, e ngdi ngikel melekoi a tekingel a Dios a melisiich er a Ikelesia. 5Ng soak a cho mrokui el mo melekoi a ngodech el bedengel omelekoi, e ngdi lmuut el bai soak a cho bo molekoi a tekingel a Dios. Ele ngikel melekoi a tekingel a Dios a lmuut el klou a ultutelel er ngikel melekoi a ngodech el bedengel omelekoi, a lsekum ng diak a chad el smaod a belkul a ikel lolekoi el ousbech a ngodech el bedengel omelekoi, me bo le sebechel a ikel ledung el mo ngosuir a Ikelesia. 6Me chelecha e kemiu el odam, chomko kmer kemiu e melekoi a ngodech el bedengel omelekoi, e ng ngera kmo rullii er kemiu? Ng diak a ngera el krellii a lak kucholt er kemiu a belkul a tekoi el lulecholt a Dios, ma lechub e ksaod a osisechakl me bo modengei, ma lechub e kdu er kemiu a tekingel a Dios, ma lechub e ng tekoi er olisichel a reng ma lechub e ng bebil er osisechakl. 7Ng di ua tumetum el diak louteliil, el ua ngaok ma harp, el lak le bleketakl a chelitakl el tuobed er ngii, e ng techa sebechel el mo medenge el kmo ng ngerel a ngeral chelitakl a lorrenges er ngii? 8Ma lsekum a ngerel a trombetang a diak le bleketakl, e ng techa mo sebechel el kudmeklii el kirel a mekemad? 9Me kemiu me ng dirrek el ua isei, el chomko kom melekoi a ngodech el bedengel omelekoi el diak le bleketakl a belkul, e ng techa mo medenge cho molekoi? Ng di mo remiid er a eolt a ikel molekoi. 10Ng ngar ngii a betok el bedengel a tekoi er a beluulchad, e diak a tar ngii el diak lak a belkul. 11E ngdi chomko ng diak kudenge ikel tekoi el lolekoi a chad, e ngii me ngak a di ua ia kim chad er a kakerous el beluu. 12Me kemiu me ng dirrek el ua isei. Me chelechal lesal blak a rengmiu el mo ngma ngat er a Chedaol Reng, e bor a ikel sebechiu el ousbech a ikel mo klungiolel a Ikelesia. 13Ma le ua isei, e ngikel melekoi a ngodech el bedengel omelekoi a kirel el meluluuch el olengit me bo le sebechel el smaod a belkul a ikel lolekoi. 14Ele chomko kmeluluuch el melekoi a ngodech el bedengel omelekoi, e ng di renguk a meluluuch, e a bdeluk ma uldesuek a diak a ngeral le rellii. 15Ma le ua isei, e ng ungil el kukerang? Ak mo meluluuch el ousbech a tekingel a Chedaol Reng, e dirrek el mo meluluuch el ousbech er a bdeluk ma uldesuek. Ak mo mengitakl el ousbech a tekingel a Chedaol Reng, e dirrek el mo melebedebek a belkul a ikel kungitakl. 16Ele chomko ke meluluuch el mereng a sulel a Dios el ousbech er a di reng, e ng mekera di chad el mo onger el kmo, “Amen,” el onger a nglunguchem a lak lodenge ikel molekoi? 17Ele lta e a nglunguchem a kmal ungil, e ngdi diak bo le klungiolel ngikel tar a chad. 18Ak mereng a sulel a Dios, ele klmuut el ngar uche er kemiu el rokui el melekoi a ngodech el bedengel omelekoi. 19E ngdi sel le bo le kldibel a re chad er a ikelesia el kirel a nglunguuch, e ng bai soak el dmu eim el tekoi el bo lodenge re chad er a kdu telal telael el tekoi el melekoi a ngodech el bedengel omelekoi. 20Rudam er ngak, lak mkor a re ngalek er omelebedebekiu. Ng di ungil cho bo mua re ngalek el diak lodenge omerellel a mekngit, e ngdi kom meklou el chad me bo lultebechel omelebedebekiu. 21A Chedaol Llechukl a kmo, “A Rubak a kmo ak uusbech er a re chad el melekoi a ngodech el bedengel omelekoi, el mo mengedecheduch er a re chedak. Ak mo ousbech a ngerir a re chad er a ngodech el beluu el mo melekoi a tekingek, e ngdi re chedak a diak bo lorrenges er ngak.” 22Ma le ua isei, e a ngodech el bedengel omelekoi a olangch el diak le kirir a ruumerang, ng bai kirir a re diak loumerang. E a omelekingel a tekingel a Dios a diak le kirir a re diak loumerang, ng bai kirir a ruumerang. 23Ma lsekum a ikelesia el rokir a mo kldibel, e a re bek el chad a mo tmaut el melekoi a ngodech el bedengel omelekoi, e te me soiseb a re di chad ma lechub e te chad el diak loumerang, e ng diak bo ledu el kmo kom mla mo mekebelung? 24E ngdi chomko te mo melekoi a tekingel a Dios el rokui, e ng me soiseb a chad el diak loumerang ma lechub e ng di chad, e ng okiu a ikel lorrenges el mo omtab a kngtil, ma tekingir el rokui a mo dmidichii, 25me ng mo chemolt a ikel berrotel er a rengul, me ng mo terrob e mengull el meluluuch er a Dios, e mo dmu el kmo, “A Dios a meral ngar a delongeliu.” 26Kemiu el odam, ng ungil dokerang? Sel bo mkldibel, e a tar a chad bo loba chelitakl, ma tang bo loba osisechakl, ma tang bo loba ochotel a tekingel a Dios, ma tang bo loba ngodech el bedengel omelekoi, ma tang bo losaod a ikel medung. A ikel rokui el moruul bo luchul a klungiolel a ikelesia. 27A lsekum ng ngar ngii a mo melekoi a ngodech el bedengel omelekoi, e di bo le terung ma lechub e longemekang e di bo le tedei, e le kauderta er tir el mo melekoi, e a tar a chad bo losaod a belkul a ikel mo medung. 28E a lsekum ng diak a chad el mo mesaod a belkul a ikel mo medung, e ngikel mo melekoi a ngodech el bedengel omelekoi le btekii a ngerel er a chelsel a ikelesia, e di le ngii el melekoi a tekingel er a Dios er a chelsel a rengul. 29Di bo le terung ma lechub e le tedei er tirkel melekoi a tekingel a Dios bo longedecheduch, e tirkel bebil bo lorriter a ikel bo ledung. 30E a lsekum a chad el dengchokl a mo chemolt er ngii a tekingel a Dios, e ngikel mengedecheduch le terbengii a cheldechedechal. 31Ng sebechiu kemiu el rokui el mo melekoi a tekingel a Dios, el kauderta er kemiu, me ng mo sebechir a re bek el chad el mo ngma klubelir ma kirel olisichel a rengrir. 32E a ngat er omelekoi el tekingel a Dios a kirel ngikel chad el omtebechel er ngii, 33ele Dios a diak le Dios er a klaiueong, ng Dios er a budech. A doltirakl a blekeradel er a rokui el ikelesia er a re chedal a Dios, 34e ng diak le kirir a redil el morenges a ngerir er a chelsel a ikelesia, ele ng mekull er tir a mengedecheduch, e diak le kirir el mo oungerachel el ua ikel lolekoi a llach el mlar a Moses el mei. 35Ma lsekum ng ngar ngii a sorir el mo medengei, e loker er a re becherir er a rekeblirir, ele kede merur er ngikel redil el omok er a ngerel er a chelsel a ikelesia. 36A cho momdasu e a tekingel a Dios ng mlar kemiu el mei? Ma lechub e ng di mler kemiu el tang e merekong? 37A lsekum ng ngar ngii a chad el omdasu el kmo ng melekingel a Dios, ma lechub e ng oba tar a ngat er a klereng, e ng kirel el medengei el kmo a ikal tekoi el kuluches el ekor kemiu a tekingel a Rubak el kired el oltirakl. 38Ma lsekum ng ngar ngii a chad el diak lomekerreu a ikang, e ngii me lak a chad el mo omekerreu er ngii. 39Ma le ua isei e rudam er ngak, mnga rengmiu el mor omelekoi el tekingel a Dios, e ngdi diak bo molekebai er a re chad a lolekoi a ngodech el bedengel omelekoi. 40Di moruul a rokui el tekoi el ungilbesul e ulengeasek a blekerdelel.

will be added

X\