1 KORINTH 1

1Ngak el Paulus, el mle soal a Dios el mekedongak el mo apostol er a Jesus Kristus, ma Sosthenes el tar kid, 2a meluches el ekor a Ikelesia er a Dios el ngar a Korinth, el ouetkeu er kemiu el rokui el mlokedong el mo chedaol el chedal a Dios, me ng uleak a delongeliu kemiu ma Jesus Kristus, el uldimukl er tirkel rokui el chad el ngar ker me ker el mengull er a Jesus Kristus el di dul Rubak er kid me tir. 3Ma Dios el Demad, ma Rubak el Jesus Kristus, le beskemiu a krasia ma budech. 4Ak di blechoel el mereng a sulel a Dios er ngak el kiriu er a krasia el bla le beskemiu el okiu a Jesus Kristus. 5Ko bereked er a Kristus me komla mo meteet er a rokui el tekoi, luldimukl er a rokui el omelekoi ma rokui el klemedengei. 6Ma osisechakl el kirel a Jesus Kristus a mla mo mesisiich er a chelsiu, 7me ng uchul e ng diak a cho mngesonges er ngii er a nglat er a Dios er chelecha el mousumengiil er a Rubak er kid el Jesus Kristus el me duum, 8el ngii a mo omtebechel er kemiu el mo lmuut er a ulebongel, me ng diak a cho bo mobals er ngii er sel sils el le mer ngii a Rubak er kid el Jesus Kristus. 9A Dios a diak leiit a tekingel, ngii el Dios el milekedongemiu el mo chedal a Ngelekel el Jesus Kristus el Rubak er kid. 10E chelechang, e ak uba ngklel a Jesus Kristus el Rubak er kid e mengelechel er kemiu el rokui el odam, me bo le ta tekingiu e lak le ngar ngii a klautok er a delongeliu. Bai bo le ta rengmiu ma uldesuiu. 11Ele kurrenges a chisiu, kemiu el odam er ngak, el louchais a re chad er a blil a Kloe, e ng ngar ngii a klautok er a delongeliu. 12A kulekoi er ngii el tekoi a kmo ng kerous a omelekoi er a delongeliu, ma tang a kmo, “Ngak a oltirakl er a Paulus”; ma tang a kmo, “Ngak a oltirakl er a Apolos”; ma tang a kmo, “Ngak a oltirakl er a Petrus”; ma tang a kmo, “Ngak a oltirakl er a Kristus.” 13Ng mla obii a Kristus el mo telal chelechad! Ng Paulus a mlad er a kerus el kiriu? Ada kom mlo nguu a techolb el oba ngklel a Paulus? 14Ak mereng a sulel a Dios ele ng dimlak a tar kemiu el ktilechelbii, e di mle Krispus ma Gaius e merekong. 15Ma le ua isei, e ng diak a chad el sebechel el kmo ng mlo nguu a techolb el mo oltirakl er ngak. 16(Ak mla obes, e ak dirrek el tilechelbii a Stefanus ma re chad er a blil, e dikea ngodech el kdebedebekii el ktilechelbii.) 17A Kristus a dimlak loderchak el mo melecholb. Ng bai ulderchak el mo omerk er a Ungil Chais, mak umerk er ngii el diak kuba llemesel a klechad, ele ng diak el soak a bo lak a belkul a kodellel a Kristus er a kerus. 18Ele osisechakl el kirel a kodellel a Kristus er a kerus a klebelung el tekoi er a rengrir a re mocha medebeakl, e ngdi kid a re mocha suobel a mesa klisichel a Dios er ngii. 19A ngar a Chedaol Llechukl a kmo, “Ak mo oturk a llemesir a re mellomes a rengrir el chad, e mo torob a uldesuir a re bekudasu.” 20Me ng ngar ker a urebetellel a mellomes a rengul? Ng ngar ker a urebetellel a ngar ngii a skulel? Ng ngar ker a urebetellel a meduch el mengaititekangel er tial beluulchad? A Dios ng diak bla lochotii el kmo ng chelsengsang a llomeserreng er tial beluulchad? 21Ele ka mesang, a Dios er a llemesel a rengul a milechititerir a re chad er a beluulchad me ng dimlak bo lodengelii el okiu a llemesel a rengrir, e bai tilbir el okiu tial leko ng tekoi el klebelung el kim omerk er ngii el olsobel er tirkel oumera er ngii. 22A re chad er a Judea a mengerchir a omes a tekoi el chelid, ma re chad er a Gris a mengerchir a uklemesel a reng. 23E ngdi kemam a omerk er a chisel a Kristus el mlo mad er a kerus, el diak le sorir a re chad er a Judea el orrenges er ngii, ma kor a tekoi el klebelung er a rengrir tirkel diak le chad er a Judea. 24E ngdi tirkel bla lokedongeterir a Dios, el chad er a Judea ma re diak, a mesa er a kerus er a Kristus a klisichel a Dios ma llemesel a Dios. 25Ele tial kor a klebelung el tekoi el le ngar ngii a Dios a lmuut el ngar uchei er a llemesir a re chad, ma kor a chelitechetul a Dios a lmuut el mesisiich er a klisichir a re chad. 26Ka di momes er kemiu el odam, er uche er a lokedongemiu a Dios. Ng diak le betok er kemiu a mle mellomes a rengrir er a tekoi er a klechad, ma ka le betok er kemiu a mle mesisiich, ma ka le betok er kemiu a ngelekir a re mesiich. 27E ngdi Dios a ngililt a ikel leko ng tekoi el klebelung er tial beluulchad el olab el omekrur er tirkel leko ng mellomes a rengrir, e ngililt a ikel leko ng chelitechut er tial beluulchad el olab el omekrur er tirkel leko te mesisiich. 28Ng dirrek a Dios el ngililt a ikel leko ng ngariou a deruchellel e chetirir a re chad el leko ng diak a belkul, el olab el meruul a ikel leko ng meklou a ultutelel el mo diak a ultutelel. 29Tia ia uchul e ng diak a chad el sebechel el ngar medal a Dios e meruul er ngii el leko ng ngarbab er a tar a chad. 30A Dios a uchul a klengar er kemiu el oltirakl er a Kristus, e ngii el Dios a rirellii a Kristus el mo rolel a llemesed, e roled el mo melemalt er medal a Dios, e roled el mo chedaol el chedal, e rolel a olbeteled er a klengit. 31Ma le ua isei, e a Chedaol Llechukl a kmo, “Ngikel soal el meruul chisel, loruul chisel er a ikel bla leruul a Rubak.”

will be added

X\