SANTIAGO 1

1Ibat ya iting sulat kang Santiago, ing talasuyu ning Dios at ning Ginung Jesu-Cristo. Pupugayan ku la ngan ding sablang pinili na ning Dios, ding makakalat king mabilug a yatu. 2Kekayu ngan sablang kapatad ku, nung miraras kekayu ing miyayaliwang kapagsubukan, sukat yu iting ibilang antimong tula 3uling balu yu king arapan na ning anti kaniting kapagsubukan, ing maging bunga na ya ing lalu kayung mabiasang mibata. 4At siguraduan yu king ing pamibabata yu asadsad yu angga king wakas; alang kupas ban maging sakdal kayu at ganap, alang kakulangan nanuman. 5Nung kekayu ating mangailangan kabiasnan, sukat nang aduan iti king Dios at ibie na kekayu ning Dios uling maganaka ya ing Dios at e ya mamarsala. 6Oneng sukat kayung maniawad a ating matibe kasalpantayanan at alang duda nanuman. Ing taung magduda mengari yang alun na ning dagat a pitange-tange na ning masikan nang tiup ning angin. 7E na sa isipan ning taung anti kaniti ing tanggap yang nanuman king Ginu 8uli na ning e ya laus at e ya pilmi lub king nanumang daraptan na. 9Sukat nang ikatula ning kapatad a pakakalulu nung tatas ne kabilian ning Dios, 10at sukat nang pasalamatan ning kapatad a mabandi, nung bababa na ne man ning Dios. Uling lilipas kalupa na ning sampaga ning dikut ing nanumang pibandian. 11Kaslag na ning mapaling aldo malalanat ing dikut; matanggal la ding sampaga na at ala na ing sadia rang leguan. Makanyan munaman ing mapalyari king taung atinan: kasalukuyan nang pasulungan ing negosyu na at kabud nia mu lumbug. 12Mapalad ya ing taung manatiling tapat king oras na ning kapagsubukan. Uling nung magtagumpe ya king kapagsubukan, tanggapan ne ing korona. Iti ya ing bie a pengaku na ning Dios karing malugud keya. 13Nung matutuksu ya ing ninuman king anti kaniting kapagsubukan, e na sa sasabian, “Ing tuksung yan manibatan king Dios.” Uling e ya malyaring matuksu ing Dios king e mayap at e na ne man tuksuan ing ninuman. 14Oneng daralan yang kapagsubukan ing tau neng agkatan ne ning sarili nang e mayap a kapagnasan; 15kaybat, ing e mayap nang kapagnasan ibait na ing kasalanan. Ing kasalanan naman magdalang kamatayan. 16Inya e kayu pailinlang, kaluguran kung kapatad! 17Ing sablang mayap at ing sablang ganap a grasya manibat banua; daratang ibat king Ibpa, ing Linalang karing sala king banua, ing e mibabayu ni gugulut pasaring kadalumduman. 18King sarili nang kaburian beit na katamu king kapamilatan na ning amanu ning katutuan ban itamu ding maging mumunang diling bunga na ning sablang lelangan na. 19Tandanan yu ini, kaluguran kung kapatad! Maging matni kayu sana king pamakiramdam, oneng banayad king pamagsalita at mabagal king pamimua. 20Uling e makasaup ing mua na ning tau ban maging matulid ya. 21Inya, ilako yu ing sablang e mayap a panugali at ing e mayap a dapat, at tanggapan king mitmung kababan lub ing amanung tatanam na ning Dios karing pusu yu a makapagligtas kekayu. 22E yu lilinlangan ing sarili yu, nune maging talatupad kayu king amanu na ning Dios at e na mu kabud talapakiramdam. 23Ing makiramdam king amanu at kaybat e na tutuparan, mengari ya king taung lalawe king sarili nang itsura king salamin. 24Kaybat nang ikit king saguling penandit, kakalinguan na nang agad-agad kagulut na, nung nanu ya itsura. 25Oneng ninuman ing susuring masalese at manatiling tutupad king ganap a kautusan a babie kalayaan karing tau, at e nia kabud makiramdam at kaybat mangalinguan, ing taung anti kaniti ya ing bendisyunan na ning Dios king sablang dapat na. 26Nung isipan na ning ninuman king relihiosu ya, oneng e na ne man balung pigilan ing dila na, lilinlangan na mu ing sarili na at alang kabaldugan ing pangarelihiosu na. 27King arapan na ning Dios a Ibpa tamu, ing tune at dalise relihiun ya ini: saupan la ding ulila at ding babaing mebalu king karelang kasakitan, at ingatan ing sarili ban e midinatan king e mayap na ning yatung iti.

will be added

X\