Mingwíhɑ́ 10

1Píe tɨ̂, me nzě bee gúú njɨ́h éngeles ɑ́ duho ɨ́ jʉ́ó kʉ́, sulo sí wɨ́. Yé ɑ́ bwɑ̂r ó, jwiné ɨ́ nyʉ̂l mpʉ̌ kɑ́n. Nkulyɛ̂n ɑ́ be lɨ́ elyɛrɑ̌ lʉ́ wé ɨ́ nkɑ́. Mpǒm nyé ɑ́ pɨpɑn ó mpʉ dʉ́o. Mekʉ̌ mé, mé ɑ́ be ó, ɨ́ mpʉ mínjʉl mí siʼe. 2Nye ɑ́ be ó, e mɑ̂ kɑ́lɑr ɨ́ mbô. Mɑ̂ kɑ́lɑr wɑɑ́ ɑ́ be ó mbɔ́ɑ́, mʉr bɛ̌m lɑ́ɑ. Nye ɑ́ si tyêl kʉ̌ éjʉ́m wé témé mɑ̂ŋ. Kʉ̌ émyɛ̌l, wɨ́ɛ, lɨ́ bibwɑ̌h cín. 3Nye nzě bɨ̂n cwíí kʉ́kʉ́. Cwíí nyé, nye ɑ́ jøjø̂ʼ ó, ɨ́ mpʉ nyɑɑ́ ngbɑmpɨɨ ɨ́ jɔʼ wé dí emwóolo yɨ́. Jɔʼ nyé ɑ́ lwib nó yɨ́, me ntɔ̂ʼ jóʼo míndum mi mpíé nzɑɑngbɑ́. 4Jɔʼ míndum mi mpíé myé ɑ́ dumo nó yɨ́, me ɑ́ si gwɑ tile sɑ́ myé ɑ́ lɛ́ɛ yɨ́. Nó ó, me ɑ́ si jóʼo nyʉ́ʉ́ cwíí swîh lɨ́ eduho ɨ́ jʉ́ó kʉ́. Nyɨ́hɑɑ́ lɨ́ elɛ́ɛ e me ó: «Solɨɨ̌ sɑ́ míndum mi mpíé mínɨ̌ lɛ́ɛ́ yɨ́. Atile yê.» 5Éngeles mé ɑ́ bee lɨ́ etyɛ̂b wɨ̂ʼ kʉ̌ cín, wɨ̂ʼ kʉ̌ ɨ́ mɑ̂ŋ nyɑ́, ɑ́ si bɨ̂n mbó éjʉ́m wé kʉ́. 6Nye nzě kɑ́ɑle ɨ́ díé mé Nzyɛ̌m, ebě, nye ó dí e cwǐʼ njʉ̌m dǐ nyɑ́. Nye ó b'ɑ́ kuho kʉ́, ndu e bisɑ́ bíbyɛ̂h bi dí tɨ̂ʼ tʉ́ŋlʉ̌ bí. Nye ó b'ɑ́ kuho sí, ndu e sɑ́ yɨ́yɛ̂h dí tɨ̂ʼ yɨ́. Nye ntémé ó b'ɑ́ kuho mɑ̂ŋ, ndu e sɑ́ yɨ́yɛ̂h dí tʉ́ŋlʉ̌ mɑ̂ŋ yɨ́. Éngeles wɑɑ́, nye ntɔ̂ʼ túno ó: «Jɔʼ éngeles nzɑɑngbɑ́ ólʉ́o sébé wé yɨ́, Nzyɛ̌m, nyé olóŋlo mícíʼɑ́ mí lémé wé nyé ɑ́ gwîh ɨ́ lwǐb ódîm mí. Yé óbe ó mpʉ nyé ɑ́ lɛ́ɛ ogwíhɑ o mílɔ̌b dí eséɑ e né bɑ́ yɨ́. Bisyɛ́ɛlɑ bé ɑ́ gwîh bí, byé mû ó lɨ́ esyɛ́ɛ ɨ́ bɑ́ɑ́nɑ̂.» 8Cwíí mé ɑ́ jóʼo ɨ́ jʉ́ó kʉ́ nyɨ́, nye ɑ́ lɛ́ɛ e me ó: «Tó nʉɑ kɑ́lɑr ɨ́ mbó éngeles, wɑɑ́ dí e gúú kʉ̌ ɨ́ mɑ̂ŋ, gúú cín nyɑ́. Nʉŋɑɑ kɑ́lɑr wɑɑ́. Nye ó mbɔ́ɑ́.» 9Nó ó mé ɑ́ mɔɑ, tô nko éngeles wɑɑ́ ɑ́ be yɨ́. Nó ó mé ɑ́ lɛ́ɛ e né ó: «Jwéʼ mé mɑ̂ kɑ́lɑ̌r nɨ̌.» Nó nyé ɑ́ bɑʼɑ lɛ́ɛ e me ó: «Nʉŋɑɑ kɑ́lɑr. Go ɑ dê. Nye óbe gó ɨ́ num ó, ɨ́ sweh sweh mpʉ̌ kwɑn. Sɑ̂ gwɑ́r, ɨ́ jɔʼ gó ómine nyé yɨ́, nye óbe ɨ́ gwǐh ó, ɨ́ jwie jwie.» 10Me ɑ́ si nʉɑ kɑ́lɑr wɑɑ́ ɨ́ mbó mé éngeles, nzě de nyê. Nye ɑ́ kʉ be ɨ́ num wɑ̂m ó, ɨ́ sweh sweh mpʉ̌ kwɑn. Tó kœb ó, ɨ́ jɔʼ mé ɑ́ mine nye yɨ́, nye ɑ́ be ɨ́ gwǐh ó, ɨ́ jwie jwie. 11Nó ó bé ɑ́ bɑʼɑ lɛ́ɛ e me ó: «Yé jɨ ó, go tôʼ dóló le egwîh mílɔ́ɔ́ Nzyɛ̌m ɑ́ lɛ́ɛ mí, tɑ́ɑre e bikûl bíbyɛ̂h, kɑlɑ e bʉr o mésí mɨ́mɛ̂h, dumlo e bʉr o bílwǐb bíbyɛ̂h, bé le ojǿǿ bɔ́ɔ́.»

will be added

X\