AR TITO 3

1Bemba ya ku da 'yo̱ta ya nza̱ya̱ ne ya ts'u̱t'wi, da 'yo̱ta nö'ö nsipabi, ne di netho da 'yo̱t'a gatho nö'ö xiñho. 2Hinda ñömañ'u̱ ma'ra, hinda ntunkwi yá ñ'ohu̱, mahyoni da me̱'sa ar mhöte ne da numañho gatho nu ma'ra. 3Ngetho nuju̱ n'ehe, mam'e̱t'o te gatho ndi benthu̱, hinge ndi o̱thu̱ Jö, ndi m'e̱thohu̱ ha ya ts'oki. Ya ts'omfeni mi jakagihu̱ nga o̱thu̱ gatho nö'ö mi ne'ö. Ndi 'bu̱hu̱ har ts'om'u̱i, ndi hyo̱kwabihu̱ nö'ö te pe̱'sa ma'ra, ndar ñ'u̱tsatehu̱, n'a ngu n'a ndi ñ'u̱tsahu̱. 4Ha nú'mu̱ mi nheki ár nhwëki Jö ma Po̱ho̱tehu̱, ne bi utwa ár mhöte ya meximha̱i, 5bi po̱kagihu̱, mödi hinge ndi o̱thu̱ ar ñho. Bi po̱kagihu̱ ngetho xa döta ár nhwëki. Bi xu̱gagihu̱ ma ts'okihu̱ ne njap'u̱ da m'u̱hu̱ man'agi, ne hár Hñö Jö bi 'rakagihu̱ n'ar 'ra'yo m'u̱i. 6Jö ba pe̱nkagihu̱ ár Hñö, ne bi gobgathogihu̱ ár ts'e̱di, ngetho da ñ'emu̱ihu̱ ar tsi Hmu Hesukristo togo bi po̱kagihu̱. 7Bi hwëgagihu̱ da thanju̱ hinte ma ts'oki di tuhu̱, ne di to̱'mhu̱pya ar te hiñham'u̱ da göts'i, ngu to̱'mi da t'umba yá ñho n'ar t'u̱. 8Majöni nunar mhönu̱ di xi'i. Jange xa gi xipa ya ku, ne njap'u̱ gatho nu'u̱ xi ñ'emu̱i Jö, da umba yá mu̱i da 'yo̱t'a nö'ö xiñho, gehyu̱ da ma̱xa gatho da 'ñepabi nö'ö xiñho. 9Yo ma gi ntsa̱hñökiwi nu'u̱ xi 'be̱ yá mfeni ne no̱ñ'u̱ yá pale mam'e̱t'o. Yo ma gi ntsa̱wi, hingi nto̱xkwi nu'u̱ no̱mba yá 'be̱pate ar Moise, ngetho hinte mañho, ne hinte gi ju̱ju̱. 10Nö'ö ar ñ'o̱ho̱ 'weka ya ku, nu'mu̱ xka zofo yo'gi ne hingi o̱de, 'ye̱nga har nijö. 11Ngetho gi pödi nunar ñ'o̱ho̱'ö xi hye̱p'u̱ nö'ö majöni ne o̱t'a ar ts'oki, zo̱ ár da̱ ñho̱t'a ar tsibi. 12Nú'mu̱ xka pe̱ñ'ap'u̱ ar ku Artemas wa ar ku Tikiko, já gi 'ñehnu̱ ngut'a Nikopolis ne ga nthe̱winu̱, ngetho xta beni ma ga 'bu̱hnu̱ nuya pa ya tse̱. 13Fa̱xa ar ku Sena nö'ö pötwa yá 'be̱pate ya ndö, ne ar ku Polo. Fa̱ts'i da mengi da ne yá 'ñu, ne hinte da k'at'wi. 14Uta njap'u̱ ya ku da bödi da 'yo̱t'wa n'ar ñho nu'u̱ thor k'at'i, ne hinda m'u̱tho hindi pödi da 'yo̱t'a n'ar ñho. 15Pe̱ñ'a nze̱ngwa gatho ya ku 'bu̱kwa. Ze̱ngwagihep'u̱ nuya gamfi mökagihe. Ar tsi Dada da hwëk'ahu̱ yá ñho gi gathohu̱. Dá njap'u̱.

will be added

X\