AR TITO 2

1Ha nu'ge mönga ho̱nse̱ ngu mönga ar hoga nt'uti. 2Xipa nuya dönzia, di pödi tema di pe̱fi, di pe̱'sa ar nsu, di nhumañho ár hyoya. Di pe̱'sa n'ar hoga ñ'emu̱i, n'ar hoga mhöte, ne di tse̱ta gatho nö'ö di 'ñepabi. 3Nuya tsi txu n'ehe, mahyoni di pe̱'sa n'ar hogam'u̱i, hindi ju̱xa ya nhemhñö, hindar mihni, di uta ho̱nt'a nö'ö xiñho. 4Da uta nuya 'be̱hñö nxutsitho hanja da mö yá döme ne yá bötsi. 5Da xokwa yá da̱ da bödi teme pe̱fi, da uti hanja da m'u̱i xiñho, da su yá ngu, da ñhogajö'i ne da 'yo̱ta yá döme. Ne njap'u̱ hinto da ñömañ'u̱ ár mhö Jö. 6Xipa ya bötsi da bödi xiñho hanja da ñ'o. 7Jange mahyoni gi 'yoge xiñho da de̱nt'a ri m'u̱i. Nú'mu̱ gi uti, utwabi nö'ö majöni xka jamfi, hinge nö'ö oxta mañö. 8Mönga ar hoga mhö nö'ö hinto tsa̱ da k'ats'i, ne njap'u̱ da 'be̱ yá tsa̱ nu'u̱ to u̱tsagihu̱, ne hinda tsa̱ da ñömañ'u̱gihu̱. 9Xipa ya 'be̱go di pe̱'sa n'ar hogamu̱i da 'yo̱ta yá hmu, ne hinda dötatho nu'u̱ te m'e̱pabi. 10Hinda bëpyá hmu, da supa nö'ö te xi t'e̱nt'wa ha yá 'ye̱, ne njap'u̱ da tsa̱ da ñhömañho ár mhö Jö ma Po̱ho̱tehu̱. 11Ngetho Jö xi ñ'u ár mhöte xi hwëkwa gatho ya meximha̱i da za̱ da mpo̱ho̱. 12Ne utkagihu̱ ga he̱hu̱p'u̱ ar ts'oki ne yá ts'o'be̱fi ar ximha̱i, ga pöhu̱ hanja ga 'bu̱hu̱, ga ñhogajö'ihu̱, ne ga nsundabihu̱ Jö nuya payu̱. 13Ga johyahu̱ ga to̱'mhu̱ ar hoga ndo̱'mi xta penga ma Jöhu̱, gehnu̱ ma Po̱ho̱tehu̱ Hesukristo bi e ha n'ar nsunda. 14Togo ba e bi unse̱ ár te bi zimgagihu̱ xki dökagihu̱ ar ts'oki, ne bi xu̱gagihu̱ ár hnini bi nubgagihu̱ ár me̱ti, jange xa di umba ma mu̱ihu̱ di o̱thu̱ ar ñho. 15Xipa ya ku nuya mhöyu̱, zofo, ne tsu̱i ju̱ nunar ts'e̱di xi 'ra'a Jö, hinto da 'ñenö hinter me̱'ö nö'ö gi utwabi.

will be added

X\