AR TITO 1

1Nuga dar Pablo, ár 'be̱gogi Jö ne ár mpo̱tegi ar tsi Hmu Hesukristo. Gehnu̱ xi me̱nkagi ga tsi da ñ'emu̱i nu'u̱ togo xi hwañ'ö da bö nö'ö majöni, ne da m'u̱ n'ar hogam'u̱i. 2Ne di to̱'ma ar te hiñham'u̱ da göts'i, ngu xi ñötkagihu̱ Jö nú'mu̱ hinxki hyokta ar ximha̱i, ha nö'ö hingar kate. 3Nu mi zo̱ ar pa bi ñ'udi nö'ö xki ñötkagihu̱ Jö ma Po̱ho̱tehu̱, bi 'be̱nkagi ga mömba nunár mhönu̱. 4Nu'ge Tito, di pe̱ñ'a nunar he̱'minu̱, ngu di 'ñenö ma t'u̱'i, ngetho go da 'ra'a nunar mhönu̱ di jamfihu̱. Jö ar Dada ne ar tsi Hmu Hesukristo ma Po̱ho̱tehu̱, da hwëk'a yá ñho, ne da ko ár mu̱i da ma̱x'i gi 'bu̱ n'ar hogam'u̱i. 5Nú'mu̱ nda tsok'a'i núnu̱ Nkreta, da jap'u̱ ngi jwata nunar 'be̱fi mi 'be̱di, ne ngi 'ñexa ya ndö ha ya nijö ha gatho ya hnini, ngu da xi'a'i ngi 'yo̱t'e. 6Nuya ku togo gi 'ñets'i, mahyoni hinte di pe̱'sa te da nk'a'spabi, di 'ñe n'adar 'be̱hñö, nuyá bötsi di ñ'emu̱i xiñho, hindar nts'o ne di o̱ta yá dada. 7Ngetho mahyoni nunár 'be̱go Jö di 'bu̱ n'ar hogam'u̱i, hindar ñ'ets'i, hindar kwe̱, hingar nti, hindi ntuhni, hindar nzibjö. 8Di pödi da unga nse̱ki hár ngu, ar hogajö'i, di pödi te di pe̱fi, di o̱t'a nö'ö xiñho, di pe̱'sa ar mfeni xint'axi, di pödi da nsuse̱. 9Mahyoni di pödi da su nö'ö ar mhö majöni ngu bi nsipabi. Njap'u̱ da 'yot'wa ar 'ñu ma'ra di uta n'ar hoga nt'uti, ne da hñu'mba yá hmi nu'u̱ togo to̱xa nunar mhönu̱. 10Ngetho pongda nze̱ye̱ togo hingi ne da 'yo̱t'a nö'ö nsipabi, hingi pödi te möñ'u̱ ne njap'u̱ ka ma'ra, töte nu'u̱ te̱mda yá nt'umbi ya xodyo. 11Nuya jö'iyu̱ mahyoni da jotwa yá ne, ngetho ts'omba yá mfeni ya jö'i ne gatho nu'u̱ 'bu̱ ha yá nguyu̱. Utwa nö'ö hingi ho, ne njap'u̱ da tsa̱ da gu̱kwa ar bojö. 12N'ár m'e̱hni yá jö ya me Nkreta bi 'ñembase̱'u̱: Nuya me Nkreta, xa ya nemhñö, ñhe̱hwi yá nts'o ya ma̱ngazu'we, te yá ts'o'yo ne xa thotyá döhñe. 13Nuna bi mönga nor m'e̱hni'ö, majöni. Jange tsu̱ ya ku ne to'mbabi, xipabi da hye̱p'u̱ nö'ö hingi ho, ne da de̱nga ar ñ'emu̱i majöni. 14Hinda de̱mba yá 'bede xi bense̱ ya xodyo, ne hinda de̱mba yá 'be̱pate ya jö'i xi hye̱p'u̱ ar 'ñu majöni. 15Nu'u̱ xint'axi, gatho handi xint'axi, ha nu'u̱ xi nts'omba yá mfeni ne hinxi jamfi, gatho handi xi nts'otho, ngetho xi ts'okyá mfeni, ne hingi pödi da hyanda ndana xiñho ne ndana hingi ho. 16Eñ'u̱ xi bö Jö, ha nu ha yá ts'o'be̱fi nheki hin'ö. Ngetho ya ts'om'u̱i, ne hingi ne da 'yo̱de, jange hinte mañho tsa̱ da 'yo̱t'e.

will be added

X\