AR ROMANU 9

1Nuga, nö'ö di mö majöni, ngetho di n'at'be ar tsi Hmu Hesukristo. Ne hinte di pe̱ts'i te ga ntsa̱, ngetho ár Hñö Jö da̱tka majöni. 2Xa tu ma mu̱i, ne xa di tsa̱mañ'u̱. 3Nuga di ne nu'mu̱ da tsa̱hmö, go ga m'e̱ka, hinga 'bu̱'be ar tsi Hmu Hesukristo, nu'mu̱ njap'u̱ da tsa̱ da mpo̱ nu'u̱ ma mixodyo'be. Gehyu̱ ma ku di pe̱s'be n'adar ji. 4Nuya me Israel gehyu̱ yá tede Jö, bi utwa ár nsunda. Bi umbabi ya nkohi ne ya 'be̱pate. Bi xipa hanja nda nsundabi, ne bi umba yá ñhöt'i. 5Ka ba ehnu̱ yá pale mi te̱nga Jö, ne ha yá 'be̱toyu̱, ka ba m'u̱hnu̱ ngu n'ar ñ'o̱ho̱ ar tsi Hmu Hesukristo. Gese̱nu̱ Jö, go ár me̱ti gatho tema ja, hindi tsa̱ya̱ di t'umba ar nsunda. Dá njap'u̱. 6Hinge xi njap'u̱tho ár mhö Jö. Ho̱nse̱ hinga gatho nu'u̱ yá 'be̱to ar Hakob gehyu̱ ár hnini Jö. 7Hinda tsa̱ ga eñhu̱ gatho nu'u̱ yá 'be̱to ar Abra yá bötsi Jö n'ehe. Hin'ö, ngetho bi xipabi: Ho̱nse̱ yá 'be̱to ar Isa gi 'ñembabi ri 'be̱to. 8Nu'mú̱, hinge gatho yá bötsi ar Abra yá bötsi Jö n'ehe. Ho̱nse̱ nu'u̱ xi zu̱ ár ñhöt'i Jö, gehyu̱ xi t'embabi yá bötsi ne yá 'be̱to ar Abra. 9Ngetho njanu̱ enga ár ñhöt'i ar tsi Dada: Ga penga ri je̱ye̱ ngu nuya payu̱, ne ar Sara ma da 'yo̱nga ár bötsi. 10Hinge ho̱nse̱'ö, man'a te bi thogi. Núm'u̱ mi dinga yoho yá bötsi ar Rebeka, n'ase̱ ár dada, gehnu̱ ar Isa ma palehu̱. 11Núm'u̱ hinxki m'u̱ta nuya yoho yá bötsi, ne hinxki 'yo̱t'atho ar ñho wa ar ts'oki, Jö xki hwahna n'a'u̱. Hinxki hyandwa yá hoga 'be̱fi, ngetho njap'u̱ xki beñ'ö nda 'yo̱t'e. 12Bi 'ñembabi ar Rebeka: Ri 'be̱t'o t'u̱ ma da me̱pa ar 'be̱fa. 13Ngu enga har T'ofo: Nuga da mö ar Hakob, ne da u̱tsa ar Esau. 14Tema tsa̱ ga möñhu̱ 'mu̱. Hage hingi o̱t'a xiñho Jö. Hin'ö, hingi njap'u̱. 15Ngu bi 'ñemba ar Moise: Nuga ga hwëka togo di nega, ne ga pe̱'spa ar ts'e̱ti togo di nega n'ehe. 16Hinge nu'mu̱ da nese̱ ar jö'i, wa nú'mu̱ xa umbár mu̱i da thahni. Jö go da möñ'ö togo da me̱'spa ar ts'e̱ti. 17Har T'ofo huxa tema nsipabi ar ndö Ehipto: Nuga xta ju̱x'a'i ga ñ'u ma ts'e̱di, ne da nu̱nga ma thuhu gatho ár nxidi ar ximha̱i. 18Nu'mú̱, Jö pe̱'spa ar ts'e̱ti togo ne'ö, ne nö'ö togo ne da japabi da nme̱'sku, tsa̱ da 'yo̱t'e. 19Nu'mú̱, da tsa̱ gi 'ñengagihu̱: Hanja Jö umba ár mfe̱i ya jö'i 'mu̱. Ngetho hinjo'o togo da do̱spa ár mfeni Jö. 20Ha nuga ga thöt'ahu̱ njawa: Tsi jö'i'i, togo'i gi ne gi ntsa̱wi Jö. Hage n'ar 'bada tsa̱ da 'ñemba ar gö, yo'ö xka hyogagi njawa. 21Hage hingi pe̱'sa ár ts'e̱di ar gö da hyoka nor 'bada ne'ö. N'adar xe̱ni ar bo̱ha̱i, da tsa̱ da hyoka ya 'bada di 'bo̱xa habu̱ jar nsu, ne ya 'bada di hö har 'be̱fi hyax'mu̱. 22Hage hingi njap'u̱tho Jö n'ehe. Mi nemhö nda ñ'u ár kwe̱, ne nda ñ'u ár ts'e̱di, ha bi me̱'spatho ar ts'e̱ti nu'u̱ xki hñuts'i nda hwati. 23Bi 'yo̱t'a njap'u̱ nda utwabi tengu ár döta ár nsunda nu'u̱ togo xi zu̱twa ár nhwëki, ne xi hñux'ö da m'u̱hwi hár nsunda. 24Ngetho Jö xi zonkagihu̱ ga po̱ñhu̱ madeda ya xodyo ne nu'u̱ hingya xodyo. 25Jangu enga har t'ofo bi 'yot'a ar m'e̱hni Osea, habu̱ enö njawa: Ma ga embabi ma hnini nu'u̱ hingo ma hninihmö, Ne nö'ö ar hnini hingi ndi mödi, ma ga möpya. 26Ne habu̱ xki t'embabi: Nu'ahu̱ hingo ma hnini'ihu̱, ja ma da t'embabinu̱, gehyu̱ yá bötsi Jö hö ar te. 27Ar Isaia mi enö n'ehe, nú'mu̱ mi no̱nga ya me Israel: Mödi mar nze̱ye̱ ngu ar 'bomu 'bonga har ñönthe, ho̱nse̱ n'a tsi tu̱i xi bongi ma da mpo̱ho̱. 28Ngetho ar tsi Hmu ngut'a ma da japi da thokwa har ximha̱i ngu xi möñ'ö. 29Ngu bi 'ñenga mam'e̱t'o ar Isaia n'ehe: Nu'mu̱ ar tsi Dada togo pe̱'sa ar ts'e̱di hinxi 'ye̱gagihu̱ 'ra ma 'be̱tohu̱, xta ñhe̱hwihu̱ ar hnini Sodoma, ne ndi hñöxkagihu̱ ar hnini Gomora. 30Te da tsa̱ ga möñhu̱pya. Nu'u̱ hingya xodyo himi honi nda m'u̱ xint'axi hár nthandi Jö, gehyu̱ xi nhu hinte ma ts'oki tupya ngetho ñ'emu̱i. 31Ha nu ar hnini Israel togo mi umba ár mu̱i bi de̱mba yá 'be̱pate ar Moise, ne njap'u̱ nda nhu hinte ma ts'oki mi tuhmö, himbi zu̱di. 32Yo'ö. Ngetho mi umbyá mu̱i mi honi nda t'axki hinge har ñ'emu̱i. Mi hoñ'u̱ nda t'axka ha ya hoga 'be̱fi mönga ya 'be̱pate, ne bi nto̱xkwi ar do mfets'e. 33Ngu enga har T'ofo: Pöhu̱, nuga di po̱ n'ar do mfets'e ne nt'ent'i núnu̱ Sion. Ha nö'ö togo da ñ'emu̱ibi'ö, hinda ma da 'be̱ ár tsa̱.

will be added

X\