AR ROMANU 8

1Nupya hinte ma mfe̱i to̱'ma nu'u̱ togo 'bu̱hwi ar tsi Hmu Hesukristo, ne o̱t'a ngu xipa ár Hñö Jö, hinge ngu nese̱'u̱. 2Ngetho di 'bu̱hwihu̱ ar tsi Hmu Hesukristo, nu ár Hñö Jö togo unga ar te, xi gu̱gagihu̱ ndi ohu̱ hár 'ye̱ ar ts'oki ne ar ndöte. 3Nö'ö himbi tsa̱ bi 'yo̱t'a ya 'be̱pate, ngetho ya meximha̱i himi otho yá ts'e̱di nda 'yo̱t'e, jange gese̱ Jö ba pe̱hna ár T'u̱, jangutho n'ar meximha̱i mi tsa̱hmö nda 'yo̱t'a ar ts'oki. Nunu̱ bi unga ár te bi hñömba ár ts'e̱di ar ts'oki. 4Njap'u̱ bi tsa̱ ndar hogajö'ihu̱ ngu a̱kagihu̱ ya 'be̱pate. Ngetho hindi 'yohu̱ ngu di nese̱hu̱, di 'yohu̱ ngu ne ár Hñö Jö. 5Ngetho nu'u̱ togo 'bu̱ ngu ne yá mfenise̱, ho̱nse̱nu̱ beni. Ha nu'u̱ togo da̱twa yá mfeni ár Hñö Jö, ho̱nse̱nu̱ beñ'u̱ n'ehe. 6Nu'u̱ togo pe̱pa yá mfenise̱, ma da dinga ar ndöte. Ha nu'u̱ togo pe̱pa ár Hñö Jö, ma da dinga ar te ne ar hogam'u̱i. 7Nu'u̱ 'bu̱ ngu ne yá mfenise̱, nto̱xkwi Jö, ngetho hingi ne, ne hingi tsa̱ da 'yo̱twa yá 'be̱pate möñ'ö. 8Ne nu'u̱ togo 'bu̱ ngu ne'u̱, Jö hinda tsa̱ da numañhobi yá te'u̱. 9Ha nu'ahu̱ hingi pe̱fu̱ ri mfenise̱hu̱, gi pe̱fu̱ ár Hñö Jö 'bu̱ ha ri mu̱ihu̱, nu'mu̱ majöni 'bu̱hnu̱. Ha nu'mu̱ n'a hingi pe̱'spa ár Hñö ar tsi Hmu Hesukristo, hingo ár me̱ti'ö. 10Ha nu'mu̱ ar tsi Hmu Hesukristo 'bu̱ ha ri mu̱ihu̱, mödi ri ndo'yohu̱ 'bu̱tho xi du har ts'oki, nuri hñöhu̱ te, ngetho gi 'bu̱hwihu̱ xiñho Jö. 11Nu'mu̱ 'bu̱ ha ri mu̱ihu̱ ár Hñö Jö togo bi ko'spa ár te ar tsi Hmu Hesukristo, Jö, ngu bi gu̱xa ar tsi Hmu, njap'u̱ da umba n'ar 'ra'yo te ri ndo'yohu̱ xi du. Da njap'u̱ ngetho gi 'bu̱hwihu̱ ár Hñö. 12Jange tsi kuhu̱, hindi 'ñepi ga pe̱fu̱ gatho nö'ö ne ma ndo'yohu̱. 13Ngetho nu'mu̱ gi 'bu̱hu̱ ngu xi'ahu̱ ri mfenise̱hu̱, ma gi tuhu̱. Ha nu'mu̱ gi 'bu̱hu̱ ngu ut'ahu̱ ár Hñö Jö, gi jafu̱ da m'e̱ nö'ö ne ar ndo'yo, ne gi pe̱'su̱ ar te. 14Ngetho nu'u̱ togo tsixa ár Hñö Jö, go yá bötsi Jö'u̱. 15Hinxta höñhu̱ ár Hñö Jö ne ga penju̱ ga ntsuhu̱. Xta höñhu̱ ár Hñö Jö xi jakagihu̱ yá tedegihu̱ Jö. Jange di emfu̱pya: Ma tsi Dada'i. 16Ár Hñö Jö da̱twa majöni ma hñöse̱hu̱, ne embabi yá bötsigihu̱ Jö. 17Ha nu'mu̱ yá bötsigihu̱, ma da 'raju̱ nuya ñho xi ñötkagihu̱, ne ga ñhehwihu̱ ar tsi Hmu Hesukristo. Ngetho nu'mu̱ ga thohu̱ ya thogi ngu bi tho'ö, ma ga 'bu̱hwihu̱ hár nsunda. 18Di pöka xiñho, nuya thogi di thohu̱pya, hinter me̱'ö nu'mu̱ ga he̱jwu̱ ar nsunda di to̱'mhu̱ ga hanthu̱ m'e̱fa. 19Gatho nö'ö xi hyoka ár 'ye̱ Jö, to̱'ma ar pa da hyanda ar tsi Dada da ñ'u yá bötsi. 20Ngetho gatho nö'ö bi hyoka ár 'ye̱ Jö, bi 'be̱ ar 'ñu nö'ö nda me̱fi. Hingo bi nese̱ nda njap'u̱, bi ne Jö togo bi umba ar ndo̱'mi n'ehe. 21Gatho nö'ö bi hyoka ár 'ye̱ Jö, ma da thökwabi nunar ts'e̱di japabi da nhwati, ne da njohyawi xta hñönga ár nsunda yá bötsi Jö. 22Ngetho di pöhu̱, gatho nö'ö bi hyoka Jö, 'rangutho xa hu̱ ár ñö hinxi ntsa̱ya̱ xi nzoñ'u̱, ntsa̱wi ar u̱gi ngu n'ar 'be̱hñö ma da da̱ ár bötsi. 23Ne hinge ho̱nse̱'u̱. Gese̱gihu̱ n'ehe, togo xi t'akagihu̱ ár Hñö Jö ngu n'ar nkohi nö'ö da t'akagihu̱ m'e̱fa. Ne di zoñhu̱ tu ma mu̱ihu̱ di to̱'mhu̱ da tekagihu̱ Jö, ne da 'rakagihu̱ n'ar 'ra'yo ndo'yo hinda du. 24Ngetho nú'mu̱ nda mpo̱hu̱, gehnu̱ di to̱'mhu̱. Ha nu'mu̱ gar hanthu̱hmö, hingar ndo̱'mi. Hinto to̱'ma nö'ö pe̱ts'i. 25Ha nu'mu̱ di to̱'mhu̱ nö'ö hindi hanthu̱, ga tse̱thu̱ ga to̱'mhu̱. 26Njap'u̱tho ár Hñö Jö togo fa̱xkagihu̱ hinte ja ma ts'e̱dihu̱. Ngetho hindi pöhu̱ ga a̱hu̱ ngu di 'ñepi. Gese̱'ö xa hu̱ ár ñö zoni, 'ba̱ made a̱pkagihu̱ tema di hoñhu̱. 27Ne Jö togo het'wa yá mu̱i ya jö'i, pödi tema ne ár Hñö Jö. Ngetho nunu̱ a̱pkagihu̱ ngu benga Jö xiñho da umba yá bötsi xi ñ'emu̱i. 28Di pöhu̱, nu'u̱ togo mö Jö, gatho nö'ö te thogi fa̱ts'i di 'ñepa ar ñho, gehyu̱ togo xi ts'ofo ngu xi benga Jö. 29Nu'u̱ xki bödi nda mpo̱ho̱ nú'mu̱ hinxki thokta ar ximha̱i, gehyu̱ bi hñuts'i nda ñhe̱hwi ár T'u̱, togo nda ñöxhmu gatho ya ku. 30Ha nu'u̱ togo xki hñuts'i, gehyu̱ bi zohni. Ha nu'u̱ togo bi zohni, gehyu̱ bi nu hinte ma ts'oki mi tu. Ha nu'u̱ togo bi nu hinte ma ts'oki mi tu, gehyu̱ togo bi umbi nda m'u̱ hár nsunda. 31Tema da tsa̱ ga möñhu̱ 'mu̱. Nu'mu̱ di 'bu̱hwihu̱ Jö, togo tsa̱ te da jakagihu̱ 'mu̱. 32Jö togo himbi 'yo̱t'a ár 'ñöngi bi da̱ ár T'u̱ bi po̱kagihu̱, hage hinda 'rakagihu̱ mahye̱giwi ár T'u̱ gatho nö'ö di hoñhu̱. 33Togo tsa̱ te da hyo̱xa nu'u̱ togo xi hwahna Jö, nu'mu̱ gese̱ Jö xi nu hinte ma ts'oki mi tu. 34Hage 'bu̱ man'a togo da hñuxhmö ar mfe̱i. Ar tsi Hmu Hesukristo bi unga ár te. Hinge ho̱nse̱'ö, get'ö togo bi mengi bi nte, ne bi huxkwi ár Dada hár ñ'e̱i, habu̱ bi 'ba̱ made a̱pkagihu̱ Jö. 35Hiñ'otho te da japa ma tsi Hmuhu̱ Hesukristo da hye̱gi da mökagihu̱. Wa di thohu̱ ar thogi, ar dumu̱i, ar nt'u̱tsa, ar thuhu, ar k'at'a he. Nú'mu̱ 'bu̱tho da thöga ma tehu̱, wa ñhötju̱ ar jwai. 36Ngu enga har T'ofo: Ngetho di te̱ñ'ahe, hyax'mu̱ 'bu̱tho xta tuhe. Nhugagihe ngu ar tsi de̱ti xi t'e̱nt'i da tho. 37Ha nuju̱ di töhu̱ gatho nuya thogiyu̱, ngetho fa̱xkagihu̱ togo xi mökagihu̱. 38Jange xa di ka̱xmbeni, nunar ndöte, ar te, nuya e̱nxe̱, ya ndö, nu'u̱ ja yá ts'e̱di, nö'ö te japya, nö'ö te di 'ñep'u̱, 39nö'ö te bi ja mañö, nö'ö te bi ja ha̱i, wa man'a tema xi hyoka Jö, hinda tsa̱ da 'wegagihu̱ hár mhöte Jö, bi utkagihu̱ mba pe̱nkagihu̱ ar tsi Hmu Hesukristo.

will be added

X\