AR ROMANU 7

1Tsi kuhu̱, gi pöhu̱ ya 'be̱pate, jange gi pöhu̱ nuya 'be̱pateyu̱ ho̱nse̱ pe̱'sa ar ts'e̱di ha n'ar jö'i tetho. 2Njangu n'ar 'be̱hñö, nuya 'be̱pate hingi umba ar se̱ki da hye̱ ár döme nú'mu̱ tetho. Ha nu'mu̱ da du ár döme, da m'e̱ ár ts'e̱di nunar nkohi mi te̱t'ö. 3Jange nu'mu̱ 'bu̱ta ár döme, ne da me̱wi man'ar ñ'o̱ho̱, da nhu ngu n'ar zinganthöti. Ha nu'mu̱ da du ár döme, ne da me̱wi man'ar ñ'o̱ho̱, njap'u̱ hingi ts'oka nor nkohi'ö, hinda nhu ngu n'ar zinganthöti. 4Njap'u̱pya tsi kuhu̱, nú'mu̱ nga tuwihu̱ ár ndo'yo ar tsi Hmu Hesukristo, ga hye̱hu̱p'u̱ ngi te̱ñhu̱ ya 'be̱pate. Gi 'bu̱hwihu̱pya man'a nunu̱ togo bi mengi bi nte, ne da tsa̱ gi 'yo̱thu̱ ya hoga 'be̱fi gi e̱nthwu̱ Jö. 5Ngetho nú'mu̱ ndi 'bu̱hu̱ nga o̱thu̱ gatho nö'ö ndi nehu̱, ar ts'o'yots'oki mi jakagihu̱ nga o̱thu̱ nö'ö mi högagihu̱ ya 'be̱pate. Ne nuya ts'o'be̱fiyu̱ ndi o̱thu̱, ho̱nse̱ ndi to̱'mhu̱ ar ndöte nda t'akagihu̱ ngu ma njut'ihu̱. 6Ha nupya hindi ohu̱ hár 'ye̱ ya 'be̱pate, ngetho po̱ntho xta tuhu̱, ne hinte tsa̱ te da jakagihu̱. Jange di pe̱fu̱ Jö ha nunar 'ra'yo m'u̱i bi 'rakagihu̱ ár Hñö Jö, ne hindi te̱nthu̱ nuya 'be̱pate xi t'ot'i xi ndönziatho. 7Te da tsa̱ ga möñhu̱ 'mu̱. Hage n'ar ts'oki da t'o̱t'a ya 'be̱pate 'mu̱. Hin'ö, hingi njap'u̱. Ho̱nse̱ nuga, nuya 'be̱pate bi utkar ts'oki. Ngetho hinga pöhmö ga 'be̱nte nu'mu̱ hinxi xika ya 'be̱pate: Yo ma gi 'be̱nte. 8Ha nor ts'oki bi gu̱ ar 'be̱pate ne bi jakagi da 'be̱nte. Ngetho nu'mu̱ hindi othohmö ar 'be̱pate, ar ts'oki xi m'e̱tho. 9Nuga ndi tehmö 'ra ya tsi pa, hinge ndi pöta ya 'be̱pate. Ha mi zo̱ ya 'be̱pate, da pödi tema ar ts'oki. Ne po̱ntho da tuga, ngetho da ts'oka ya 'be̱pateyu̱. 10Ne da timbi nunar 'be̱pate xki ñötkagi ar te, bi jakagi da tu. 11Ngetho ar ts'oki bi gu̱ ar 'be̱pate bi kakagi, ne njap'u̱ bi hyogagi. 12Xa majöni ar t'ofo ne ya 'be̱pate xint'axi, o̱t'ar ñho ne fa̱xkagihu̱. 13Hage nö'ö mar ñhomhö bi jakagi da tu 'mu̱. Hin'ö, hingi njap'u̱. Nunar ts'oki bi ñ'udi tengu'ö, bi gu̱ nö'ö mar ñho, bi jakagi da tu. Ne njap'u̱ nunar 'be̱pate bi utkagi hangu ár nts'otho ar ts'oki. 14Ngetho di pöhu̱, nuya 'be̱pate xpa e mhets'i, ha nuga dar meximha̱i, di pe̱par ts'oki. 15Hindi pödi tema di pe̱fi. Ngetho hindi o̱t'a nö'ö di ne, ne di o̱t'a nö'ö di u̱tsa ga o̱t'e. 16Nu'mu̱ nö'ö hindi ne ga o̱t'e, go di pe̱'ö, di et'a ma mu̱i xiñho ya 'be̱pate. 17Hingo geke togo te gatho o̱t'mu̱, go o̱t'a ar ts'oki di pe̱'sa mbo. 18Ne di pödi hingi 'bu̱ ar ñho ha ma ndo'yo, ngetho di bemhö ga o̱t'a xiñho, ne hindi o̱t'a njap'u̱. 19Ngetho hindi o̱t'a nö'ö ar ñho di nemhö ga o̱t'e. Ha xa di o̱t'a nö'ö hingi ho, hindi nemhö ga o̱t'e. 20Nu'mu̱ di o̱t'a nö'ö hindi ne, hingo di o̱tga 'mu̱, go o̱t'a ar ts'oki di pe̱'sa mbo. 21Ngetho di nemhö ga o̱t'a nö'ö xiñho, ne di handi 'yoda ar ts'oki ha ma mu̱i. 22Ngetho mbo ha ma mu̱i xa di johya di ne ga te̱mba ár 'ñu Jö. 23Ne di handi n'ehe, nuna ma ndo'yo nto̱xkwi ma mfeni, ne tsixkagi hár 'ye̱ ar ts'oki di 'bu̱'be. 24Hwëkategi. Togo da gu̱gagi ga he̱ nunar ndo'yonu̱ tsixka har ndöte. 25Di umba njamödi Jö, bi ñöngagi har 'be̱fi bi me̱ ma tsi Hmuhu̱ Hesukristo. Gekase̱, ha ma mfeni di pe̱pa Jö, mödi ma ndo'yo pe̱pa ar ts'oki.

will be added

X\