1 Te ga möñhu̱ 'mu̱. Hage ga 'bu̱hu̱ har ts'oki, ga to̱'mhu̱ da hyexkathogihu̱ ár nhwëki Jö. 2 Hin'ö, hinga njahu̱p'u̱. Ngetho ar ts'oki handgagihu̱ wande xta tuhu̱, hage ma ga 'bu̱thu̱ ga o̱thu̱ nö'ö hingi ho 'mu̱. 3 Wa hingi pöhu̱, gatho nu'u̱ xi xixthegihu̱, di n'at'wihu̱ ar tsi Hmu Hesukristo. Po̱ntho da nxixthewihu̱ nú'mu̱ mi du, ne da tuhu̱ n'ehe. 4 Ngetho nú'mu̱ da nxixthehu̱, po̱ntho bi thogagihu̱ mahye̱giwi ar Kristo. Ha nú'mu̱ mi mengi bi nte man'agi, bi gu̱xa ár ts'e̱di ár Dada, njap'u̱ nuju̱ n'ehe, ga 'bu̱hu̱ n'ar 'ra'yo m'u̱i. 5 Ngetho nú'mu̱ ndi hñöxkagihu̱ hár ndöte, njap'u̱ ndi hñöxkagihu̱ hár menga nte n'ehe. 6 Di pöhu̱ 'mu̱, numa 'be̱t'o m'u̱ihu̱ bi ts'u̱ta har pont'i mahye̱giwi'ö. Ne njap'u̱ nunar m'u̱inu̱ bi nhwati, hinda mengi da me̱pa ar ts'oki. 7 Jangu nu'u̱ xi du, hinte tsa̱ te da japabi ar ts'oki. 8 Ha nu'mu̱ xta tuwihu̱ mahye̱gi ar tsi Hmu Hesukristo, di ñ'emu̱ihu̱ ma ga 'bu̱hwihu̱ n'ehe. 9 Di pöhu̱, ar Kristo mi nte man'agi, hinda mengi da du. Ha nunar ndöte hinte tsa̱ te da japabi. 10 Ngetho nunár ndöte bi hwata ar ts'oki n'agitho. Ha nupya te, 'bu̱hwi Jö. 11 Njap'u̱ nu'ahu̱, beñhu̱ nunar ts'oki hant'a'ihu̱ wande xka tuhu̱. Ne gi tehu̱ gi pe̱fu̱ Jö, gi 'bu̱hwihu̱ ma tsi Hmuhu̱ Hesukristo. 12 Yo ma gi ñhe̱hu̱ da dö ar ts'oki ri ndo'yohu̱ tso̱nga ár ngöts'i. Jange yo gi o̱thwu̱ ya ts'oki ne. 13 Hingi 'ye̱nthu̱ ri ndo'yohu̱ da me̱pabi ar ts'oki. 'Ye̱nt'ase̱ ri tehu̱ hár 'ye̱ Jö, ngu n'a xi mengi xi nte, ne japi da me̱ nö'ö xiñho. 14 Ngetho ar ts'oki hinda hyo̱p'ahu̱ ha̱i. Hingi gu̱ñ'ahu̱pya yá 'be̱pate ar Moise. Nupya tsix'ahu̱ ár nhwëki Jö. 15 Xi'mu̱, hage ga o̱thu̱ ya ts'oki ngetho hindi 'bu̱hu̱ ha yá 'be̱pate ar Moise, di 'bu̱hu̱ hár nhwëki Jö. Hin'ö, hingi njap'u̱. 16 Hage hingi pöhu̱, nu'mu̱ gi ñhe̱hu̱ gi m'e̱gohu̱ gi pe̱fu̱ n'a, go ár 'be̱go'ihu̱ togo gi o̱thu̱. Wa ar ts'oki tsix'ahu̱ har ndöte, wa Jö da ma̱x'ahu̱ gi 'bu̱hu̱ xiñho. 17 Jamödi Jö, mödi ngar 'be̱go'ihu̱hmö ar ts'oki, xka umba ri mu̱ihu̱ xka te̱ñhu̱ nunar mhönu̱ xi t'a'ahu̱. 18 Ne bi nju̱k'ahu̱ har ts'oki, ne gi pe̱fu̱ ar ñhopya. 19 Xta he̱kwa nö'ö gi hanthu̱ hyax'mu̱, ne njap'u̱ da zo ri mfenihu̱. Maham'u̱ ngi e̱nt'a ri ndo'yohu̱ nda me̱pa nö'ö hingi ho ne nö'ö xints'otho. 'Ye̱nthu̱pya da me̱pa nö'ö xiñho, ne njap'u̱ gi 'bu̱hu̱ n'ar m'u̱i xint'axi. 20 Ngetho nú'mu̱ ngi pe̱fu̱ ar ts'oki, hinge ngi pe̱fu̱ ar ñho. 21 Tema ñho ga ju̱jwu̱ nö'ö ngi pe̱hu̱ 'be̱t'a ri tsa̱hu̱pya. Ngetho nunar njut'i ngi to̱'mhu̱, gehnu̱ ar ndöte. 22 Ha nupya xi nju̱k'ahu̱ har ts'oki, ne ár 'be̱go'ihu̱ Jö, gi pe̱'su̱ ar m'u̱i xint'axi ngu ri nthöhöhu̱. Ne ár ngöts'i gi to̱'mhu̱ ar te hiñham'u̱ da thege. 23 Nunár njut'i ar ts'oki, ar ndöte. Ha nor nt'uni Jö, ar te hiñham'u̱ da göts'i, ngetho di 'bu̱hwihu̱ ma tsi Hmuhu̱ Hesukristo.
