1 Xi nhugagihu̱ hinte ma ts'oki di tuhu̱ ngetho di ñ'emu̱ihu̱. Jange di 'bu̱hwihu̱ xiñho Jö, ngetho bi m'a̱ made ma tsi Hmuhu̱ Hesukristo. 2 Núm'u̱ nda ñ'emu̱ihu̱, ba tsigagihu̱ nda zu̱kagihu̱ ár nhwëki Jö. Ne xa xta m'a̱thu̱, ne di johyahu̱ di to̱'mhu̱ ga 'bu̱hu̱ hár nsunda. 3 Hinge ho̱nse̱'ö. Di johyahu̱ nú'mu̱ di thohu̱ ya thogi n'ehe, ngetho di pöhu̱ ar thogi fa̱xkagihu̱ ga pe̱'su̱ ar ts'e̱ti. 4 Ar ts'e̱ti fa̱xkagihu̱ ga thohu̱ xiñho xta ts'a̱tkagihu̱, ha nunar ts'a̱ti fa̱xkagihu̱ ga pe̱'su̱ ar ndo̱'mi. 5 Ha nunar ndo̱'mi hinda 'be̱tka ma tsa̱hu̱, ngetho ár Hñö Jö xi t'akagihu̱ xi ñuska ma mu̱ihu̱ ár mhöte Jö. 6 Ar tsi Hmu Hesukristo nú'mu̱ xki wentkathogihu̱, mi zo̱nga ar pa bi unga ár te bi po̱kagihu̱ ndar ts'oktehu̱. 7 Xi ñhembi da thinga n'a togo ne da unga ár te da po̱ta n'ar jö'i 'bu̱i xiñho. Ha nu'mu̱ di 'bu̱hmö n'a di ñ'e̱nt'i da ne da po̱ta n'a xa dar hogajö'i. 8 Ha Jö bi ñ'use̱ hangu mökagihu̱, ngetho nú'mu̱ ndar ts'oktehu̱, ar tsi Hmu Hesukristo bi unga ár te bi po̱kagihu̱. 9 Xipyahmö, xi nhugagihu̱ hinte ma ts'oki di tuhu̱ ngetho bi nö'ma ár ji, ne gatho nö'ö bi me̱fi da jaju̱ ga k'onthu̱ ár kwe̱ Jö xi 'ñep'u̱. 10 Ngetho nú'mu̱ ndar ñ'u̱nihu̱ Jö, bi ñhogamu̱igihu̱ ár T'u̱ nú'mu̱ mi du. Xipyahmö, xta jwahu̱ xta ñhogamu̱iwihu̱, hage hinda po̱kagihu̱ ár te. 11 Hinge ho̱nse̱'ö, di johyahu̱ di 'bu̱hwihu̱ Jö. Numa tsi Hmuhu̱ Hesukristo go bi m'a̱ made'ö, ne njap'u̱ da ñhogamu̱iwihu̱. 12 Nu'mú̱, n'adar ñ'o̱ho̱ bi ku̱t'a ar ts'oki har ximha̱i, ne har ts'oki bi yu̱t'a ar ndöte. Ne ar ndöte bi nexa gatho ya jö'i, ngetho gatho bi nts'okte. 13 Núm'u̱ hinxki t'unda yá 'be̱pate ar Moise, mi jar ts'oki har ximha̱i. Ho̱nse̱ nu habu̱ hiñ'otho ya 'be̱pate, hinte ma ts'oki tho̱xa n'a. 14 Mödi njap'u̱, ar ndöte xki ntöte mi tsixa gatho nu'u̱ xki nts'okte, mödi nuyu̱ hinxki de̱mbahmö ár mhe̱'sku ar Adan. Bi ndu̱i nuya pa mi 'bu̱ ar Adan, ne mi njap'u̱tho nuya pa mi 'bu̱ ar Moise. Ha nunar Adan nu̱, gehnu̱ ngu n'ar nt'udi nö'ö togo ma nda e m'e̱fa. 15 Nuna ár mhe̱'sku ar Adan himi tsa̱ nda ñhuxkwi ár nt'uni hwëgagihu̱ Jö. Ngetho ár njut'i ar mhe̱'sku, ba e ar ndöte bi zu̱ nze̱ye̱. Ha nunár nhwëki ne ár nt'uni Jö bi hyexta nuya nze̱ye̱yu̱, gehnu̱ ár nhwëki nuna n'adar ñ'o̱ho̱nu̱, ar tsi Hmu Hesukristo. 16 Nunár ts'oki n'adar ñ'o̱ho̱, hingi tsa̱ da ñhe̱xkwi ár nhwëki Jö. Ngetho nunar n'adar ts'okinu̱, ba tsimpar mfe̱i bi zu̱ ya meximha̱i. Ha nuna ár nhwëki Jö ba e bi zu̱ ya meximha̱i, ne bi t'embi hinte ma ts'oki tu, mödi xi 'yo̱t'a nze̱ye̱ ya ts'oki. 17 Nunár ts'oki nuna n'adar ñ'o̱ho̱, bi japi bi ntöte ar ndöte. Ha nunár 'be̱fi nuna man'a n'ase̱ ar ñ'o̱ho̱, japi da m'u̱ xiñho ya meximha̱i, nu'u̱ togo xi hyexta ár nhwëki Jö ne ár nt'uni, gehyu̱ xi numañho Jö. Nuna n'ase̱ ar ñ'o̱ho̱nu̱, gehnu̱ ar Hesukristo. 18 Nunár ts'oki n'adar ñ'o̱ho̱ bi ku̱t'a ar mfe̱i, bi zu̱ gatho ya meximha̱i. Njap'u̱tho n'ehe, nunár hogam'u̱i n'adar ñ'o̱ho̱, nda nhu hinte ma ts'oki tu gatho ya meximha̱i n'ehe, ne da me̱'syu̱ ar te. 19 Ngetho njangu ár mhe̱'sku n'adar ñ'o̱ho̱, gatho ya jö'i bi t'embabi ya ts'okte. Njap'u̱tho n'ehe nunár nt'o̱de n'ar ñ'o̱ho̱, gatho bi nhu hinte ma ts'oki mi tu. 20 Nuya 'be̱pate bi t'uni, ne njap'u̱ nda xönda ar ts'oki. Ha nú'mu̱ mi xönda ar ts'oki, xa bi ntöte bi xu ár nze̱ye̱ ár nhwëki Jö. 21 Njangu ar ts'oki bi ntöte, bi nja ar ndöte, njap'u̱ ár nhwëki Jö bi ntöte, bi nhu hinte ma ts'oki tu ya jö'i. Ne da me̱'sa ar te hiñham'u̱ da göts'i har 'be̱fi bi 'yo̱t'a ma tsi Hmuhu̱ ar Hesukristo.
