AR ROMANU 4

1Te ga beñhu̱ bi dinga ar Abra 'mu̱, ma palehu̱ mi 'bu̱ mam'e̱t'o. 2Nu'mu̱ ar Abra bi nhu hinte ma ts'oki mi tu ngetho bi 'yo̱t'a ya hoga 'be̱fi, tsa̱ da 'ñexhmö ár nsu, ha nunu̱ hingi tsa̱ te da netebi Jö. 3Ngetho te mönga har T'ofo. Ar Abra bi ñ'emu̱ibi Jö, ne njap'u̱ bi nhu hinte ma ts'oki mi tu. 4Ha nu'u̱ togo o̱t'a ya hoga 'be̱fi, nunar nthöhö t'umbabi, hinge nt'untho 'mu̱, ngetho xi döhö, ne da njut'wabi ngu n'ar tha̱i. 5Ha nu'u̱ togo ñ'emu̱ibi Jö togo hökwa yá ts'oki ya ts'okte, nunar ñ'emu̱inu̱ ma da japi da nhu hinte ma ts'oki tu, mödi hinte ma hoga 'be̱fi xi 'yo̱t'e. 6Jangu ar Dabi bi no̱nga yá nza̱thom'u̱i nu'u̱ bi numañhobi Jö, mödi hinte ma hoga 'be̱fi xi 'yo̱t'e. 7Bi 'ñenö njawa: Nza̱thom'u̱i pe̱'sa nu'u̱ togo xi mpumbabi yá ts'oki, ne xi njut'wabi yá ts'om'u̱i. 8Nza̱tho nu'u̱ togo ar tsi Hmu hinte ma ts'oki ho̱ts'e. 9Hage nunar nza̱thom'u̱inu̱ ho̱nse̱ xi t'e̱kwa ya xodyo togo xi thu'spa ar nse̱gi, wa da tsa̱ da hñönga nu ma'ra hingya xodyo n'ehe. Jangu xta eñhu̱, ar Abra bi ñ'emu̱ibi Jö, jange bi nhu hinte ma ts'oki mi tu. 10Hanja bi nhumañho 'mu̱. Hage bi nhumañho ngetho xki thu'spa ar nse̱gi wa hin'ö. Bi nhumañho hinxki thu'spatho. 11Ar Abra m'e̱t'o bi gamfi, m'e̱fa bi hñönga ar nse̱gi. Gehnu̱ n'ar nt'udi da̱majöni xki nhu hinte ma ts'oki mi tu ngetho xki ñ'emu̱i nú'mu̱ hinxki thu'spatho ar nse̱gi. Njap'u̱ ar Abra bi t'embabi ár dada gatho nu'u̱ hinxki thu'spa ar nse̱gi xta ñ'emu̱i, ne nunar ñ'emu̱inu̱ japi da nhu hinte ma ts'oki tu n'ehe. 12Njap'u̱ ár dada n'ehe gatho nu'u̱ hinge ho̱nse̱ xi thu'spa ar nse̱gi, te̱mba ár m'u̱i xa mi ñ'emu̱i ndu ma dadahu̱ ar Abra nú'mu̱ hinxki thu'spathobi ar nse̱gi. 13Himbi ñhöt'wabi ar Abra ne yá 'be̱to nda hñönga ar ximha̱i nu'mu̱ nda de̱nga ya 'be̱pate. Bi ñhöt'wabi nú'mu̱ mi nhumañhobi ár ñ'emu̱i. 14Ngetho nu'mu̱ ma da t'umba ar ximha̱i nu'u̱ te̱nga ya 'be̱pate, hinter me̱'ö ar ñ'emu̱i 'mu̱, ne xi 'be̱ ár ts'e̱di ár ñhöt'i Jö. 15Nu habu̱ ja ya 'be̱pate, ja bi ehnu̱ ár kwe̱ Jö. Ne habu̱ hiñ'otho ya 'be̱pate, hiñ'otho hanja da me̱'sku. 16Jange gatho nu'u̱ togo ñ'emu̱i, ma da t'umba nö'ö xi hwëkwa Jö, ne njap'u̱ gatho yá 'be̱to ar Abra da zu̱ ar ñhöt'i. Nunar ñhöt'inu̱ ma da hñönga nu'u̱ yá 'be̱to te̱nga ya 'be̱pate, ne nu'u̱ te̱mba ár ñ'emu̱i ar Abra togo ár dada n'a ne man'a. 17Ngu xi nt'ot'i: Nuga xta ex'a'i ngu ár dada nze̱ye̱ ya jö'i. Jange nuju̱ yá bötsigihu̱ ar Abra hár nthandi Jö togo bi ñ'emu̱i'ö. Gehnu̱ ju̱xa nu'u̱ xi du, ne handa nö'ö hinxi thoktho wande xi thoki. 18Mödi mar ñhembi nda ñ'emu̱i, ar Abra bi do̱'mi nda tho ngu xki ñhöt'wabi. Njap'u̱ bi thuts'i ár dada nze̱ye̱ ya jö'i. Bi t'embabi: Ma da njap'u̱ ár nze̱ye̱ ri 'be̱to. 19Ne himbi went'a ár ñ'emu̱i nú'mu̱ mi hyandi bi za̱ ár ndo'yo, mi pe̱'sa ngu n'anthebe nje̱ye̱, ne mi pödi himi tsa̱ nda ñ'o̱nte ar Sara. 20Himbi ts'oka ár mfeni nda 'ñenö hinge nda 'yo̱t'a Jö ngu xki ñöt'wabi. Nö'ö bi me̱'ö, bi no̱xka ár ñ'emu̱i, ne njap'u̱ bi nsundabi Jö. 21Xa xki zo hár mu̱i xiñho, mi pe̱'sa ar ts'e̱di Jö nda 'yo̱t'a gatho nö'ö xki ñöt'wabi. 22Jange bi nhu hinte ma ts'oki mi tu, ngetho mi pe̱'sa nunar ñ'emu̱inu̱. 23Hinge ho̱nse̱ nda zu̱ ar Abra nö'ö xi t'ot'i bi nhu hinte ma ts'oki mi tu. 24Da nhugagihu̱ hinte ma ts'oki di tuhu̱ n'ehe, nú'mu̱ di ñ'emu̱ihu̱ togo bi ko'spa ár te ar Hesu ma tsi Hmuhu̱. 25Gehnu̱ bi nda̱, ne njap'u̱ bi gut'a ma ts'okihu̱. Ne bi mengi bi nte, njap'u̱ bi nhugagihu̱ hinte ma ts'oki di tuhu̱.

will be added

X\