AR ROMANU 3

1Nu'mú̱, hage töte ár mfa̱ts'i pe̱'sa n'ar xodyo. Wa tema ñho japabi da tuta ar nse̱gi hár ndo'yo. 2Nze̱ye̱ ya mfa̱ts'i pe̱'sa ya xodyo, ne töte ár hño. Gehyu̱ m'e̱t'o bi t'e̱nt'wa ha yá 'ye̱ ár mhö Jö. 3Nu'mu̱ 'rayu̱ hinxi ñ'emu̱i, hage njap'u̱ Jö hinda 'yo̱t'a nö'ö xi mö. 4Hö, da 'yo̱t'e. Mödi gatho ya jö'i da mönga ya nhemhñö, Jö hin'ö. Ngu enga har t'ofo: Ma da födi gi mönge majöni, ne ma gi ntöte nú'mu̱ theñ'a ya jö'i. 5Nu'mu̱ ma ts'okihu̱ japi da nheki ár hogajö'i Jö, hage hingi njap'u̱ nö'ö o̱t'a Jö 'rakagihu̱ ar mfe̱i 'mu̱. (Di te̱nda nö'ö mönga ya jö'i.) 6Hin'ö, hinda njap'u̱. Ngetho hanja da hñö'spa majöni ya meximha̱i 'mu̱. 7Tsa̱ da 'ñenga ya jö'i n'ehe, nu'mu̱ ma nhemhñö japi da nheki nö'ö majöni mönga Jö, ne njap'u̱ da t'e'spa ár nsu, yo'ö ma da t'aka ar mfe̱i ngu n'ar 'yo̱t'ats'oki 'mu̱. 8Ha nu'mu̱ njap'u̱, yo'ö hinga eñhu̱ 'mu̱ n'ehe: Ma ga o̱thu̱ ar ts'oki ga to̱'mhu̱ ar ñho, ngu ho̱xkagihe 'ra, thengagihe eñ'u̱ di uthe njap'u̱. Nuya xi mönga njap'u̱, to̱'ma yá mfe̱i di 'ñepabi. 9Te ga möñhu̱pya. Hage nuju̱ dar xodyohu̱ di tötehu̱ di 'bu̱hu̱ xiñho. Hin'ö, hingi njap'u̱, ngetho xta möñhu̱, mahye̱gi di ohu̱ hár 'ye̱ ar ts'oki, ya xodyo ne nu'u̱ hingya xodyo. 10Ngu enga har t'ofo: Hinjo'o n'ar hogajö'i, hinjo'o n'amhö. 11Hinjo'o togo o̱de, hinjo'o togo honga Jö. 12Gatho bi hye̱p'u̱ ar hoga 'ñu, n'at'wu̱ bi nts'oki. Hinjo'o togo da 'yo̱t'a ar ñho, hinjo'o n'amhö. 13Ngu n'ar t'a̱gi xoxtho, njap'u̱ yá ne'u̱. Nuyá jöhne kate, ha yá ne thente, ñhe̱hwi ár ngi n'ar k'eñö po ha yá ne. 14Nuyá ne odar ts'ate ne ar tso̱t'amu̱i. 15Nuyá wa ntihi ma da xangar ji. 16Habu̱ gatho thogi, tso ar dumu̱i ne ar ts'oni; 17ne hinxi bö'u̱ tengu ar hogam'u̱i. 18Hingi tsupa Jö. 19Ne di pöhu̱, gatho nö'ö mönga yá 'be̱pate ar Moise, xipa nu'u̱ togo te̱ni. Njap'u̱ gatho hinte da tsa̱ te da dödi nú'mu̱ xta thö'spa majöni. 20Hinto tsa̱ da t'embabi, hinte ma ts'oki tu hár nthandi Jö ngetho o̱t'a ngu mönga yá 'be̱pate ar Moise. Nuya 'be̱pate ho̱nse̱ jakagihu̱ ga pöhu̱ ma ts'okihu̱. 21Ha nupya xi t'utkagihu̱ hanja ga 'bu̱hwihu̱ xiñho Jö. Hinge ga 'bu̱hu̱ ga o̱thwu̱ yá 'be̱pate ar Moise, mödi ja mönu̱, ne ha ya he̱'mi bi 'yot'a ma'ra yá m'e̱hni Jö. 22Gatho nu'u̱ xi ñ'emu̱i ar tsi Hmu Hesukristo, 'bu̱i xiñho hár nthandi Jö. Nö'ö handgagihu̱ mahye̱gi di gathohu̱. 23Ngetho gatho xi nts'okte ne hindi 'ñepi da hyandwa ár nsunda Jö. 24Ha Jö xi ñ'u ár nhwëki, ne bi nhugagihu̱ hinte ma ts'oki di tuhu̱. Gehnu̱ bi t'akthogihu̱, ngetho ar tsi Hmu Hesukristo bi zimgagihu̱ ha yá 'ye̱ ar ts'oki. 25Gehnu̱ Jö bi 'ye̱nt'a ngu n'ar m'o̱ñho̱, da gut'wa yá ts'oki ya meximha̱i nu'mu̱ da jamfibi ár ñho ungár ji bi nö'mi. Njap'u̱ bi ñ'u ár ñhogajö'i ne ár ts'e̱ti, himbi umbár mfe̱i ya jö'i xki 'yo̱t'a ya ts'oki mam'e̱t'o. 26Xki beñ'ö nda ñ'udi nuya payu̱ ár hoga ts'u̱t'wi. Njap'u̱ xi nheki ár hogajö'inu̱, ne embabi hinte ma ts'oki tu gatho nu'u̱ ñ'emu̱i ar tsi Hmu Hesukristo. 27Hage da tsa̱ ga ñ'exu̱ 'mu̱ handgagihu̱ xiñho Jö ngetho xta o̱thu̱ ya hoga 'be̱fi. Hin'ö, hinda tsa̱. Jö numañhogihu̱, ho̱nse̱ nuya xta ñ'emu̱ihu̱. 28Jange di pöhu̱, nunar meximha̱i nhu hinte ma ts'oki tu ngetho ñ'emu̱i. Hingi nhumañho ngetho te̱mba yá 'be̱pate ar Moise. 29Hage Jö ho̱nse̱ ár Jö ya xodyo. Hage hinge ár Jö nu'u̱ togo hingya xodyo n'ehe. Hö, majöni yá me̱ti nu'u̱ hingya xodyo n'ehe. 30Ngetho Jö n'ase̱, ne ma da nu hinte ma ts'oki tu nu'u̱ togo pe̱'sa ar nse̱gi ne ñ'emu̱i. Njap'u̱tho ma da numañho nu'u̱ hinte pe̱'sa ar nse̱gi ne da ñ'emu̱i n'ehe. 31Hage nu'mu̱ di ñ'emu̱ihu̱, hinte di nuhu̱ ya 'be̱pate. Hin'ö, di ñ'uhu̱ pe̱'sa yá nsu.

will be added

X\