AR ROMANU 16

1Di xi'ahu̱, nunar ku Febe n'ar hoga ku togo fa̱xte har nijö Nsenkrea. 2Umfu̱ n'ar hoga tsa̱ya̱ ngu n'ar gamfi xi ñ'emu̱i ar tsi Hmu Hesukristo, ngetho njap'u̱ xiñho da 'yo̱t'a ya ku. Fa̱xu̱ ne umfu̱ gatho te k'at'i, ngetho nunu̱ xi ma̱xa nze̱ye̱. Gese̱gi xi ma̱xkagi n'ehe. 3Ze̱ngwagihu̱p'u̱ ar ku Prisila ne ar ku Akila, togo xi ma̱xkagi hár 'be̱fi ar tsi Hmu Hesukristo. 4Nuyu̱ bi 'ye̱nt'a yá te bi ma̱xkagi, jange di umba njamödi. Hinge ho̱nse̱gi, gatho nuya nijö hingya xodyo umba njamödi n'ehe. 5Ze̱ngwagihu̱ ya ku mhunts'a ha yá nguyu̱, ne ma tsi hmöka ku Epeneto. Gehnu̱ m'e̱t'o bi ñ'emu̱i ar tsi Hmu Hesukristo núnu̱ Akaya. 6Ze̱ngwagihu̱ ar ku Maria togo xa xi umba ár mu̱i xi ma̱x'ahu̱. 7Ze̱ngwagihu̱ ar ku Androniko ne ar ku Hunias, po̱ntho ma mëni ne ma ñ'ohu̱ har fa̱di. Gehyu̱ xi nu xiñho ya mpo̱te, ne bi dökagi m'e̱t'o bi ñ'emu̱iyu̱ ar tsi Hmu Hesukristo. 8Ze̱ngwagihu̱ ar Amplia, ma tsi hmöka ku xta jamfihe ar tsi Hmu. 9Ze̱ngwagihu̱ ar ku Urbano ma ma̱xte hár 'be̱fi ar tsi Hmu Hesukristo, ne ze̱ngwagihu̱ ma hmöka ku Estaki. 10Ze̱ngwagihu̱ ar Apele togo bi ze̱ta ya thogi te̱nga ar tsi Hmu Hesukristo. Ze̱ngwagihu̱ nu'u̱ 'bu̱ hár ngu ar Aristobulo. 11Ze̱ngwagihu̱ ar Erodion togo po̱ni ma mëni. Ze̱ngwagihu̱ nu'u̱ 'bu̱ hár ngu ar Xixo xi ñ'emu̱i ar tsi Hmu. 12Ze̱ngwagihu̱ ar ku Trifena ne ar ku Trifosa, togo mpe̱ hár 'be̱fi ar tsi Dada. Ze̱ngwagihu̱ ar hmöka ku Persida togo xa xi me̱pabi ar tsi Hmu. 13Ze̱ngwagihu̱ ar ku Rufo, nza̱da ár m'u̱i ñ'owi ar tsi Hmu. Ze̱ngwabihu̱ ár nönö, po̱ntho ma nönöga n'ehe. 14Ze̱ngwagihu̱ ar ku Asinkrito, ar ku Fregonte, ar ku Herma, ar ku Patroba, ar ku Herme ne gatho ya ku 'bu̱hwinu̱. 15Ze̱ngwagihu̱ ar ku Filologo, ar ku Hulia, ar ku Nereo ne ár njup'u̱, ar ku Olimpa ne gatho ya ku mhuskwinu̱. 16Ne uñhu̱ n'ar ñhu̱fi n'a ngu n'a dar nt'axi ri mfenihu̱. Di ze̱ngwa'ihe gatho nuyá nijögihu̱ ar tsi Hmu Hesukristo. 17Tsi kuhu̱, di a̱'ahu̱ gi hyanthu̱ xiñho togo heka ya ku, ne japi da da̱gi uta ma'ra ya mfeni, ts'oka ar hoga nt'uti xka pöhu̱. Nu xki pöhu̱ togo'u̱, 'wehu̱. 18Ngetho nuya jö'iyu̱ hingi pe̱pa ar tsi Hmu Hesukristo. Pe̱pase̱ yá mu̱i, ne xa nza̱da yá ne ka nu'u̱ o̱xa gatho nö'ö nsipabi. 19Gatho pödi xa gi o̱thwu̱ ár mhö Jö, jange xa di johya. Ne di ne gi pöhu̱ xiñho gi te̱ñhu̱ ar ñho, ne hingi jafu̱masu nö'ö xints'otho. 20Jö togo unga ar hogam'u̱i, ngut'a ma da ze̱'ma ar ts'ondöhi ha ri wahu̱. Ar tsi Hmu Hesukristo da hwëk'ahu̱ ár nt'uni. 21Pe̱ñ'a'ihu̱ ar nze̱ngwa ar ku Timoteo ma ma̱xte, ne nuya po̱ntho ma mëni, ar ku Lusio, ar ku Hason, ne ar ku Sosipater. 22Nuga, ar ku Tersio togo di fa̱xa ar ku Pablo, di ot'a nunar he̱'minu̱, di ze̱ngwa'ihu̱ ngetho xta ñ'emu̱i ar tsi Hmu n'ehe. 23Ze̱ngwa'ihu̱ ar ku Gayo togo 'raka ar se̱ki di kokwa hár ngu, ne ka mhunskwa ar nijö n'ehe. Ze̱ngwa'ihu̱ ar ku Erasto togo tsixa ár bojö ar hnini. Ar ku Kuarto ze̱ngwa'ihu̱ n'ehe. 24Dá hwëk'ahu̱ gatho'ihu̱ ár nt'uni ar tsi Hmu Hesukristo. Dá njap'u̱. 25Nsunda Jö togo tsa̱ da ze̱ta ri ñ'emu̱ihu̱, ngu enga ar hoga mhö di mönga, ne nunar nt'uti no̱nga ar tsi Hmu Hesukristo. Xi t'utkagihu̱pya nö'ö mi 'bu̱i xki jo'mtho nú'mu̱ hinxki thokta ar ximha̱i. 26Ha nupya xi zu̱kagihu̱ nö'ö xi 'yot'a ya m'e̱hni nda thogi, ngu xki mönga Jö togo hö ar te. Ne njap'u̱ xi nu̱nga ha gatho ya ha̱i, ne nda e ya jö'i nda ñ'emu̱i ne nda 'yo̱te. 27Nö'ö ho̱nse̱ n'a Jö 'bu̱i, ne ár me̱ti ar mfödi. Hinda ntsa̱ya̱ da hñönga ar nsunda xi döpa ar tsi Hmu Hesukristo. Dá njap'u̱.

will be added

X\