AR ROMANU 15

1Jange nuju̱ xi nze̱di ma ñ'emu̱ihu̱, mahyoni ga pe̱'sfu̱ ar ts'e̱ti ga fa̱xu̱ nu'u̱ togo hingi tse̱ yá ñ'emu̱i, ne hinga honse̱ ma ñhohu̱. 2Ma ga hoñhu̱ n'a ngu n'a ár ñho ma ñ'ohu̱, ga fa̱xu̱ da no̱xka ár ñ'emu̱i. 3Nunar tsi Hmu Hesukristo himbi hyonga ár ñhose̱, jange bi tho'ö ngu enga har T'ofo: Go da nthe̱x'be ya nts'ani mi tho̱x'a'i. 4Ngetho nuya T'ofo bi t'ot'a maham'u̱, xi t'ot'i nda utkagihu̱ nda hñuxa ma ndo̱'mihu̱, ga pe̱'su̱ ar humamu̱i ne ar ts'e̱ti mönga har T'ofo. 5Jö togo ár me̱ti ar ts'e̱ti ne ar humamu̱i, n'at'wu̱ da 'ra'ahu̱ n'adar mfeni n'a ngu n'a gi 'bu̱hu̱ xiñho, ngu benga ar tsi Hmu Hesukristo. 6Njap'u̱ n'adar mfeni ne n'adar mhö gi nsundabihu̱ Jö ár Dada ma tsi Hmuhu̱ Hesukristo. 7Uñhu̱ ar tsa̱ya̱ n'a ngu n'a, ngu ar tsi Hmu Hesukristo bi 'rakagihu̱ n'ar hoga tsa̱ya̱, ne njap'u̱ da t'e'spa ár nsu Jö. 8Di xi'ahu̱, nunar tsi Hmu Hesukristo ba e da me̱pa ya xodyo, ne njap'u̱ bi ñ'udi mönga majöni Jö, ne o̱t'a gatho ngu xki ñöt'wa ma palehu̱. 9Ne nu'u̱ hingya xodyo da nsundabi Jö da bötwa ár döta nhwëki, jangu enga har T'ofo: Ga da̱twa majöni togo'i nu'u̱ hingya xodyo 'mu̱, ne ga tút'a ri thuhu. 10Ne enö n'ehe: Nu'ahu̱ hingya xodyohu̱, njohyawihu̱ ár hnini Jö. 11Ne pengi enö njawa: Gatho'ihu̱ hingya xodyohu̱, nsundahu̱ ar tsi Hmu. Hö, nu'ahu̱ gi 'bu̱hu̱ ma'ra ya ha̱i, 'ñe'sfu̱ ár nsu. 12Ar m'e̱hni Isaia bi 'yot'a njawa n'ehe. Ar Isai ngu n'ár 'ba̱i n'ar za ma da 'ro n'ár 'yu̱, gehnu̱ di o hár 'ye̱ nu'u̱ hingya xodyo. Ja gehnu̱ togo ma da hñuxyá da̱. 13Ha nunar Jö togo unga ar ndo̱'mi, xa da 'ra'ahu̱ ar johya ne ar hogam'u̱i ngetho gi ñ'emu̱ihu̱. Ne da hñus'a ri ndo̱'mihu̱ tsix'ahu̱ ár ts'e̱di ár Hñö Jö. 14Ha nuga di ka̱xmbeni tsi kuhu̱, xa gi pe̱'su̱ ar hogamu̱i, ne hingi k'athu̱ ar mfödi gi hñu'mfu̱ ár mu̱i n'a ngu n'a ri kuhu̱. 15Tsi kuhu̱, xta ot'ahu̱ nunar he̱'minu̱, jar xe̱ni xta top'ahu̱, ngetho hindi ne gi pumhnihu̱. Xta ot'a njap'u̱ ngu xi hwëga Jö ga o̱t'e. 16Dar 'be̱go ar tsi Hmu Hesukristo, di xipa nu'u̱ hingya xodyo ár hoga mhö Jö. Di hö'spa nunar hoga mhönu̱, ne njap'u̱ ga da̱twa Jö nu'u̱ hingya xodyo, ngu n'ar m'o̱ñho̱ thandi xiñho xi xu̱ka ár Hñö Jö. 17Tsa̱hmö ga exa ma nsu, ngetho xi ma̱xkagi ar tsi Hmu Hesukristo xta mpe̱ hár 'be̱fi Jö. 18Ngetho hinte man'a di ne ga mö, ho̱nse̱ nö'ö xi 'yo̱t'a ar tsi Hmu ha ma 'ye̱, njap'u̱ da ts'i nu'u̱ hingya xodyo da 'yo̱twa ár mhö. Gathoyu̱ xi njap'u̱ xi 'yo̱x'u̱ ar mhö xta xipabi, ne xi hyant'u̱ ar hogam'u̱i xta utwabi. 19Xi nheki ya döta nt'udi, ne ár ts'e̱di ár Hñö Jö, xi ma̱xkagi xi 'yo̱ ya me Herusalen ne gatho ár nthet'i. Da tso̱nga Iliriko habu̱ xa mi yap'u̱, gathonu̱ xta mömba ár hoga mhö ar tsi Hmu Hesukristo. 20Njanu̱ xa da umba ma mu̱i da mönga ar hoga mhö, hinge habu̱ xki mhömba ár thuhu ar tsi Hmu Hesukristo, ne hinge nga mfis'be̱fi'be ma'ra. 21Nö'ö da pe̱fi, ngu enga har T'ofo: Nu'u̱ togo hiñham'u̱ xki nsipabi togo'ö, ma da bödi. Ha nu'u̱ hiñham'u̱ xi 'yo̱de, ma da zo yá mfeni. 22Hangu xta nemhö ma ga k'ös'ahu̱, ha nuya 'be̱fiyu̱ xi k'askagi ga map'u̱. 23Ne nupya hindi pe̱'sa ma'ra ya 'be̱fi ha ya ha̱iyu̱, ha xta to̱'ma nze̱ye̱ ya je̱ye̱ di ne ga 'bu̱hwihu̱. 24Jange nú'mu̱ xka ma España, ma ga thop'u̱tho. Di ne ga nu'ahu̱, ne gi fa̱xkagihu̱ ga ju̱ ma 'ñu man'agi xka jwahu̱ ga njohyahu̱. 25Nupya gar ma Herusalen, ma ga hö'spa ár mfa̱ts'i m'e̱mpa ya gamfi bi 'bu̱hnu̱. 26Ngetho nuya ku me Nmasedonia ne Akaya, bi beñ'u̱ xiñho nda me̱mpa n'ar mfa̱ts'i nu'u̱ ya gamfi hyoya 'bu̱hnu̱ Herusalen. 27Nuya kuyu̱ bi numañho nda 'yo̱t'a njap'u̱, ne xiñho, ngetho po̱ntho tupabi'u̱. Nu'mu̱ ya xodyo bi mfa̱xkwi yá ñho umba Jö di 'ñe mhets'i, xiñho nuya hingya xodyo da ñhehwi yá ñho pe̱'skwa har ximha̱i n'ehe. 28Di xi'a'ihu̱ 'mu̱, nu xka jwadi ga tso nunar mfa̱ts'inu̱, ga tso̱ñ'ahu̱ xka ma España. 29Di beni xka map'u̱, ma ga hös'ahu̱ ár ñho ár hoga mhö ar tsi Hmu Hesukristo, ne xa ga höñhu̱ ar njöpi. 30Di a̱'ahu̱ tsi kuhu̱, hár thuhu ar tsi Hmu Hesukristo ne hár mhöte ár Hñö Jö, gi fa̱xju̱ ga a̱fu̱ Jö da zixkagi xiñho, 31hinte da jakagi nuya hingi ñ'emu̱i 'bu̱hnu̱ Nhudea. Ne nunar mfa̱ts'inu̱ bi t'akagi ga höts'i, da numañho ya gamfi me Herusalen. 32Ne xa ga njohya ga tso̱ñ'ahu̱ nu'mu̱ njap'u̱ ne Jö, ne ga tsa̱ya̱wihu̱ mahye̱gi. 33Jö togo unga ar hogam'u̱i, gi 'bu̱hwihu̱ hyax'mu̱. Da njap'u̱.

will be added

X\