AR ROMANU 11

1Jange di a̱ñ'ahu̱: Hage Jö xi hye̱p'u̱ ár hnini 'mu̱. Hin'ö, ngetho nuga dar me Israel n'ehe, ár 'be̱togi ar Abra, ne ár bötsigi ar Benjamin. 2Jö hinxi hye̱ ár hnini yanu̱ mam'e̱t'o xi bödi. Ha hinxka nehu̱ tema mönga ar T'ofo habu̱ no̱nga ar m'e̱hni Elia, nú'mu̱ mi ka̱xa Jö tema mi o̱t'a ya me Israel. Mi enga njawa: 3Tsi Hmu'i, xi tho'a gatho ri m'e̱hni, xi thext'a gatho ri 'bo̱xm'o̱ñho̱. Ho̱nse̱ di koka, ne thongagi da thogi n'ehe. 4Ne bi dötwa Jö bi 'ñenö: Xta hwahna hñun'a̱tema're̱t'a ya nthebe togo hinxi nda̱ndihmö xi ndönga ar tsita ár thuhu Bal. 5Njap'u̱ nuya payu̱, 'bu̱ 'ra ya tsi tu̱i xi bongi togo xi hwahna Jö xi hwëkwa ár nt'uni. 6Ha nu'mu̱ xi nhwëkwabi, hinxi dö'u̱ o̱t'a ya hoga 'be̱fi. Ngetho nu'mu̱ xi dö'u̱ di o̱t'a ya hoga 'be̱fi, hingar nthekate 'mu̱ ár nt'uni xi unga ar tsi Dada. 7Xi'mu̱, te ga beñhu̱. Nuya me Israel himbi dinga nö'ö tema mi honi. Ho̱nse̱ nu'u̱ tsi tu̱i xki thahni bi diñ'u̱. Ha nu ma'ra bi njapi bi me yá mfeni hinge nda diñ'u̱. 8Ngu enga har T'ofo: Jö bi 'ñökwa yá mfeni, ne bi gotwa yá da̱ ne yá gu. Njap'u̱tho 'bu̱ nuya payu̱. 9Ne ar Dabi bi 'ñenö njawa: Nuyá ñhuni, dá japi da nts'okse̱, ngu n'ar xögu wa n'ar nt'a̱ts'i habu̱ da zose̱'u̱, gehnu̱ ár mfe̱i'u̱. 10Dá m'e̱xui yá da̱, hinda hyant'u̱, ne hindi tsa̱ya̱ yá xu̱tha di muxa yá 'be̱ni. 11Di a̱ñ'ahu̱ n'ehe: Hage xi mfe'sa ya me Israel ne xi nhwati 'mu̱. Hin'ö, hingi njap'u̱. Ngetho xa ya me̱'sku, bi t'umba ar mpo̱ho̱ nu'u̱ hingya xodyo, ne njap'u̱ nda ts'o̱t'wa yá mu̱i. 12Ha nu'mu̱ nuyá ts'oki'u̱ bi ma̱ts'i da me̱'sa ya ñho gatho ya meximha̱i, ne nú'mu̱ bi da̱hyu̱ bi ma̱xa nu'u̱ hingya xodyo nda zu̱ ar ñho, tenguhmö nú'mu̱ xta mengi da m'u̱hwi Jö man'agi. 13Nuga di zo'ahu̱ hingar xodyohu̱, ngetho dar mpo̱te ar tsi Hmu, xi me̱nkagi ga zo nu'u̱ hingya xodyo, ne di numansu ma 'be̱fi. 14Xömhö njanu̱ ga tso̱t'wa yá mu̱i nuya ma mixodyo'be, ne da mpo̱ 'ra'u̱. 15Ngetho nú'mu̱ mi the̱'u̱, bi ñhogamu̱iwi Jö gatho nu ma'ra 'bu̱ ma'ra ya ha̱i, nu xta mengi da ts'ihi, po̱ntho da mengi da me̱'sa yá te'u̱. 16Njangu nu'mu̱ nor 'be̱t'o xe̱niju̱ni xi nda̱twa Jö, gatho nö'ö man'a xe̱ni n'ehe. Ha nu'mu̱ yá 'yu̱ n'ar za ár me̱ti Jö, gatho yá 'ye̱za n'ehe. 17Nu'mu̱ n'ar hoga 'ba̱i ar njömdo̱ni bi mfe̱kwa 'ra yá 'ye̱za, ne bi thux'a'i nu'ge gar 'ye̱za ar ma̱nga njömdo̱ni, ne gi tsipa ár ngi ar hoga 'ba̱i, 18yo gi exa ri nsu gi ne gi hyo̱maha̱i nuya 'be̱t'o 'ye̱za. Ngetho gi pödi hingi to̱xke ar 'yu̱za, go to̱x'a'i. 19Tsa̱ gi 'ñemhö: Nuya 'ye̱za bi mfe̱ki ne bi thuxkagiga. 20Nuyu̱ bi mfe̱ki ngetho ma ya me̱'sku, ha nu'ge ngetho gi ñ'emu̱i bi thux'a'i. Jange yo gi exa ri nsu, tsupa Jö. 21Ngetho nu'mu̱ Jö himbi pumbabi nuya 'ye̱za xki bo̱hnu̱, hanja ma da pump'a'ige. 22Jange hyandwa xiñho ár ts'e̱ti ne ár kwe̱ Jö. Hö, ár kwe̱ pe̱'spa nu'u̱ xi da̱gi. Ha nu'ge, pe̱s'a ar ts'e̱ti nu'mu̱ gi pödi gi su nunar ts'e̱tinu̱. Nu'mu̱ hin'ö, ma da me̱k'a'i ngu bi japa nuyu̱ ma'ra ya 'ye̱za. 23Njap'u̱ nu'u̱ xi mfe̱ki, nu'mu̱ da hye̱p'u̱ yá me̱'sku, da mengi da thuta man'agi, ngetho Jö pe̱'sa ar ts'e̱di da mengi da tuta har 'ba̱i man'agi. 24Ngetho nu'ge, ngu n'ar ma̱nga njömdo̱ni bi ts'e̱k'a'i ne bi thut'a'i har hoga njömdo̱ni, ter ñhembibi 'mu̱ da mhenga da thuta man'agi nu'u̱ xki bo̱hnu̱ m'e̱t'o. 25Tsi kuhu̱, di ne gi pöhu̱ nö'ö himi fö mam'e̱t'o, ne hingi 'ñexa ri nsuhu̱: Nuya me Israel bi got'a yá mfeni 'ra ya tsi pa, da do̱'mi da yu̱t'a gatho nu'u̱ hingya xodyo 'bu̱ ma'ra ya ha̱i xi zu̱ ár nhwëki Jö. 26M'e̱fa gatho ya me Israel ma da mpo̱ho̱, ngu enga har T'ofo: Ma da zo̱ n'ar ñönte di 'ñe Sion, ne da paxt'a nö'ö xi nts'otho ha yá 'be̱to ar Hakob. 27Njap'u̱ xta nko'be ma ga hökwa yá ts'oki, ngu xta ñöt'wabi. 28Nuyu̱, yá ñ'u̱ni ar hoga mhö, njapu̱ xok'ahu̱ ar goxthi da tsa̱ gi mpo̱hu̱. Ha Jö mödi, ngetho xki hwampa yá dada mam'e̱t'o. 29Ha nuyá nt'uni ne yá nzote o̱t'a Jö, hinda njap'u̱tho. Jö hingi pa̱ta ár ne. 30Ngu'ahu̱ maham'u̱ hinge ngi o̱thu̱ Jö, ha nupya xka tsu̱hu̱ ár nhwëki, ngetho himbi 'yo̱t'u̱ Jö. 31Njanu̱pya ya me Israel hinxi 'yo̱ta Jö'u̱, njanu̱ da zu̱'u̱ nunar nhwëki xi zu̱'ahu̱ n'ehe. 32Ngetho Jö bi 'ye̱nt'a gatho nda nme̱'sku, ne m'e̱fa nda me̱'spa ar nhwëki xo̱ge. 33Xa nze̱ye̱tho ár mfeni ne ár mfödi Jö. Hinjo'o togo da bödi tema ne da 'yo̱t'e. Hinjo'o togo da xet'wa yá 'ñu'ö. 34Ngetho, togo xi bötwa ár mfeni Jö, wa togo xi uta Jö tema da me̱fi. 35Hage 'bu̱ n'a togo te xi umba Jö m'e̱t'o, ne da ko'spya. 36Ngetho gatho nö'ö te ja, go ár me̱ti'ö, go bi hyok'ö ne 'bu̱i da me̱pabi'ö. Go di 'ñepabi hinda ntsa̱ya̱ da t'umba ar nsunda. Dá njap'u̱.

will be added

X\