AR ROMANU 10

1Tsi kuhu̱, xa majöni di xi'ahu̱, di umba ma mu̱i di a̱pa Jö da mpo̱ ya me Israel. 2Nuga di da̱majöni, nuyu̱ xa umbyá mu̱i honga Jö, mödi hingi pödi xiñho nö'ö o̱t'u̱. 3Ngetho hinxi bö'u̱ ar hogam'u̱i ungar tsi Dada. Xi umbyá mu̱i da nhumañhobi nö'ö o̱t'u̱, ne njap'u̱ hingi japamasu nö'ö xi 'yo̱t'a Jö nda nhumañhogihu̱. 4Nuyá 'be̱pate ar Moise bi göxa ár ts'e̱di nú'mu̱ ba e ar tsi Hmu Hesukristo, ne njap'u̱ nda nhu hinte ma ts'oki tu gatho nu'u̱ da ñ'emu̱ibi. 5Ngetho nö'ö togo ne da m'u̱i xiñho hár nthandi Jö di te̱nga nö'ö bi 'yot'a ar Moise, enga njawa: Nö'ö togo da 'yo̱t'a gatho nuya 'be̱pateyu̱, ma da me̱'sa ar te. 6Ha nunar nhumañho bi e har ñ'emu̱i, engagihu̱ njawa: Yo ma gi beñhu̱ togo ma da bo̱xa mhets'i da tsiwa ar tsi Hmu Hesu. 7Wa gi 'ñeñhu̱: Togo da gö har 'be̱xui da gu̱xa ar tsi Hmu Hesu habu̱ bi ku̱ nu'u̱ xi du. 8Ne te mönga har T'ofo: Gi pe̱'sp'u̱ get'u̱tho ar mhö, oda ha ri ne, ne ha ri mu̱i. Gehnu̱ ar mhö ñ'emu̱i di da̱he majöni. 9Nu'mu̱ nuna ri ne da̱majöni ar Hesukristo gehnu̱ ar Hmu'ö, ne gi jamfi ha ri mu̱i Jö bi gu̱xa man'agi har ndöte, ma gi mpo̱ho̱. 10Ngetho ha ma mu̱ihu̱ di ñ'emu̱ihu̱, ne njap'u̱ nhugagihu̱ hinte ma ts'oki di tuhu̱. Ha numa nehu̱ da̱majöni nö'ö di ñ'emu̱ihu̱, ne njap'u̱ ga mpo̱hu̱. 11Ngetho har T'ofo enga njawa: Gatho nu'u̱ togo da ñ'emu̱ibi, hinda ma da 'be̱ ár tsa̱. 12Mahye̱tho ya xodyo ne nu'u̱ hingya xodyo, n'adár Hmu gatho'u̱, ne umbabi da bongwatho gatho nu'u̱ togo mat'i. 13Ne enga ar T'ofo n'ehe: Gatho nu'u̱ togo da mat'wa ár thuhu ar tsi Hmu, ma da mpo̱ho̱. 14Ha nu'mu̱ hinxi ñ'emu̱i, hinda tsa̱ da mat'i. Ha nu'mu̱ hinxi 'yo̱de, hanja ma da ñ'emu̱i. Ha nu'mu̱ hinto hö'spa ar hoga mhö, hinda ma da 'yo̱'u̱. 15Ne nu'mu̱ hinto xi m'e̱hni, hanja da mhönga ar hoga mhö. Jangu enga har T'ofo: Nza̱da ár nzo̱ho̱ nö'ö togo mönga ar hogam'u̱i ne ar hoga mhö. 16Mödi hinga gatho xi 'yo̱ta ar hoga mhö xi 'yo̱de. Ngu xi 'ñenga ar m'e̱hni Isaia: Tsi Hmu, hinto xi ñ'emu̱i ar hoga mhö xta möñhe. 17Da thinga ar ñ'emu̱i nu'mu̱ da t'o̱xa ar hoga mhö, ne nunar mhönu̱ no̱nga ar tsi Hmu. 18Ha di a̱ñ'a'ihu̱pya: Hage hinxi 'yo̱'u̱ 'mu̱. Hö, xi 'yo̱de, ngetho enga har T'ofo: Gatho ár nxidi ar ximha̱i xi nu̱nga yá mhö'u̱, ne habu̱ gatho xi zo̱nga nö'ö möñ'u̱. 19Di enga n'ehe: Hage hinxi bö ya me Israel. Hö, xi bödi, ngetho ar Moise bi 'ñenö m'e̱t'o: Nuga ar tsi Dada di enga: Ma ga tso̱t'ahu̱ ri mu̱ihu̱, ga honga man'ar hnini nö'ö hingo ma hnini. Ne ma ga po̱ñ'ahu̱ ri kwe̱hu̱, ga munts'a 'ra ya jö'i te gatho bentho. 20M'e̱fa ar m'e̱hni Isaia himbi ntsu bi 'ñenö: Ar tsi Dada enö: Bi dingagi nu'u̱ togo himi hongagi. Da ñ'udi bi hyandga nu'u̱ himi a̱ngagi. 21Har tsi Hmu emba ya me Israel: Gatho ar pa da tu̱ngwa ma 'ye̱ 'ra ya jö'i xa ya me̱'sku ne ya to̱xte.

will be added

X\