YA NTHANDI 9

1Ar ku̱t'a e̱nxe̱ bi hyu̱xt'a ár k'axt'athu̱xi, ne da handa n'ar tso̱ bi da̱ har ha̱i, ne bi t'umba ár nsoki ar nzonganzafi. 2Nu mi xoka ar nzonganzafi xa ba po̱xa ar 'bifi ngu n'ar t'u, ne nunar 'bifinu̱ bi japi bi boka ar hyadi ne ar ndöhi. 3Har 'bifi ba po̱xkwi ya k'oto, bi nxanga xo̱ge har ximha̱i, ne bi t'umba ar ts'e̱di nda ntsate ngu ya penzu̱. 4Bi nsipabi hinte nda japa ya k'angdo̱ni ne gatho nö'ö xi nk'angi, hinte nda japa ya za. Ho̱nse̱ nda za nuya jö'i hinte mi tu nö'ö ngu ar nthixt'i ár me̱ti Jö ha yá dë. 5Ne bi nsipabi hinge nda hyo, ho̱nse̱ nda japi nda tho ya u̱gi ku̱t'a nzönö. Nu ár ñ'u̱ yá ne nuya k'otoyu̱, jangu ár ñ'u̱ ár mpu̱hni n'ar penzu̱. 6Nuya pa'u̱ ya jö'i di honga hanja da du, ne hinda tsa̱. Xa di nemhö da du, ha nunar ndöte ma da ñ'öni. 7Nuya k'otoyu̱ mi ñhe̱hwi 'ra ya fani xi ñhoki da ntuhni. Mi hu'sa 'ra ngu ya ntsant'i k'axt'abo̱jö. Nuyá hmi mi ñhe̱hwi ngu ár hmi n'ar jö'i. 8Nuyá xtö mi ñhe̱hwi yá xtö n'ar 'be̱hñö, ha nuyá ts'i mi ñhe̱hwi yá ts'i n'ar 'muhu. 9Mi köxa ha yá ndo'yo ngu n'ar ntha̱ki bo̱jö. Nu ár mbu̱ni yá hwa mi ñhe̱hwi ár nga̱ni ya bo̱jö ju̱t'a ya fani nixt'i di ma har tuhni. 10Mi tu yá zu̱ ne yá m'ite ngu ya penzu̱. Nuyá m'ite mi tu ha yá zu̱, mi pe̱'sa ar ts'e̱di nda japa ya jö'i nda tho ya u̱gi ku̱t'a nzönö. 11Nu ár ndö'u̱, gehnu̱ ar e̱nxe̱ 'bu̱ har nzonganzafi. Nu ár thuhu har hñö ebreo Abadon, ha nu har hñö griego ár thuhu ar Apolion (po̱ntho da 'ñenö, ar jö'ste). 12Nunar m'e̱t'o döta thogi xi wahnu̱, ne xi 'ñep'u̱tho ma yoho. 13Nu mi hyu̱xt'a ár k'axt'athu̱xi ar 'rato e̱nxe̱, da o̱ n'ar mhö mi po̱nga madeda nu'u̱ goho ya ndöni mi huxa ha yá ñöni ar m'o̱xant'uts'i xi thoka ar k'axt'abo̱jö, 'bu̱hnu̱ ñhandwi Jö. 14Nunar mhönu̱ bi 'ñemba ar 'rato e̱nxe̱: 15Ne bi nsot'a nuya goho ya e̱nxe̱ xki t'e̱nt'i tema xe̱nimpa, tema pa, tema zönö, tema je̱ye̱ xki thu'spabi nda hyo n'ár hñu xe̱ni gatho ya jö'i 'bu̱ har ximha̱i. 16Da o̱de hangu ya ndogu mi nto̱ ya fani, mi yonthebe ya 're̱t'anthebe ya 're̱t'anthebe. 17Ne da handa ngu n'ar t'i nuya fani ne yá to̱ge. Nuya to̱ge mi hö ya ntha̱ka tiñö mar the̱ni, mar nk'angi ne mar nk'axt'i. Ha nuyá ñö ya fani mi ñhe̱hwi ár ñö n'ar 'muhu. Ha yá ne mi po̱nga ar tsibi, ar 'bifi, ne ar k'axt'ado mi zo̱. 18Nuya döta thogiyu̱, ar tsibi, ar 'bifi, ne ar k'axt'ado zo̱ mi po̱nga ha yá ne ya fani, bi the ár hñu xe̱ni ya jö'i mi 'bu̱ har ximha̱i. 19Nuya faniyu̱ mi pe̱'sa ár ts'e̱di ha yá ne, ne ha yá zu̱, ngetho yá zu̱ mi hñe̱hwi ya k'eñö mi tu yá ñö ne mi pu̱hna ya jö'i. 20Ha nu ma'ra ya jö'i bi k'ont'i, himbi du ha ya döta thogiyu̱. Mödi njap'u̱, himbi 'yo̱t'wa yá ntso̱'mi. Ne himbi hye̱p'u̱ mi ndönga nö'ö mi hokase̱'u̱, ne ya ts'ondöhi, ya tsita emp'ö xi thoka ar k'axt'abo̱jö, ar t'axi, ar k'axt'i xi mpots'i, ya do, ya za. Nuyu̱ hingi tsa̱ da hyandi, hingi o̱de, ne hingi 'yo. 21Himbi 'yo̱t'wa yá ntso̱'mi ma ya hyote, ya 'ñete, togatho mi 'be̱ngwi, ne himbi hye̱p'u̱ yá mfë.

will be added

X\