YA NTHANDI 4

1Da jwadi da handa gathoyu̱, m'e̱fa da handa n'ar goxthi mi xo mhets'i. Ne da pengi da o̱twa ár mhö nö'ö togo bi zokagi m'e̱t'o, mi ñhe̱hwi ár ñheti n'ar k'axt'athu̱xi, ne bi 'ñengagi: 2M'e̱fa ár Hñö Jö bi hyexkagi ne bi utkagi n'ar thuxandö mi 'bu̱hnu̱ mhets'i, ne mi huxhnu̱ n'a. 3Nö'ö togo mi huxnu̱ har thuxandö, mi hyats'i ñhe̱hwi n'ar hoga hyasdo ne n'ar hoga the̱nts'ado. Ne hár nthet'i mi kot'atho n'ar 'be̱jni mi hwe̱xka ngu n'ar hoga k'angdo. 4Hár nthet'i ar thuxandö mi 'bu̱ ma n'a̱temagoho ya thuxandö. Ne ka mi huxhnu̱ n'a̱temagoho ya tsi dönzia, mi hö ya t'axhe, ne mi hu'sa ya fu̱indö ma ya k'axt'abo̱jö. 5Har thuxandö mi 'bu̱ madetho mi po̱nga ya hwe̱i, ya ñu̱ni ne ya ñheti. Ne mi ñhandwi n'ehe yoto ya ñot'i mi zo̱, gehyu̱ nuya yoto ya hñö pe̱pa Jö. 6Mi ñhandwi nunar thuxandö n'ehe n'ar ñho̱nthe ngu ar doxito. Ne mi 'ba̱hnu̱ get'u̱ hár nthet'i ar thuxandö goho ya zu'we pe̱'sa yá te, xa mi ñuxa ya da̱ habu̱ mi nheki ne mo̱te. 7Nor m'e̱t'o zu'we mi ñhe̱hwi n'ar 'muhu, ár ñoho mi ñhe̱hwi n'ar boi, ár hñu mi pe̱'sa ár hmi ngu n'ar jö'i, ár goho mi ñhe̱hwi n'ar nxu̱ni nsa̱ni. 8Nuya goho ya zu'weyu̱ mi pe̱'sa yá te, mi tu 'rato yá hwa n'a ngu n'a, ne ha yá hwa xa mi ñuxa ya da̱ mañö ne mbo. Nuyu̱ parxui hingi tsa̱ya̱ eñ'u̱: Xint'axi, xint'axi, xint'axi, hinter ñhembibi da 'yo̱t'a ma tsi Hmuhu̱, nö'ö togo mi 'bu̱i, 'bu̱pya, ne hiñham'u̱ da göxa ár te. 9Nuya goho ya zu'weyu̱ mi pe̱'sa yá te, mi e'spa ár nsu, mi nsundabi ne mi umba njamödi nö'ö togo huxa har thuxandö, hiñham'u̱ da göxa ár m'u̱i. 10Nú'mu̱ mi o̱t'a njap'u̱yu̱, nuya n'a̱temagoho ya tsi dönzia mi nda̱ndihmö hár wa nö'ö togo huxa har thuxandö, ne mi nsundabi nö'ö togo hiñham'u̱ da göxa ár te. Ne mi po̱kwa yá fu̱indö ñhant'u̱ har thuxandö, ne mi eñ'u̱: 11Ma tsi Hmu'ihe, di 'ñep'a'i da nsunda'i, da t'es'a ri nsu, ne da föt'a ri ts'e̱di. Ngetho go ga hyoka gatho nö'ö te ja, ne ngu ga nege, njap'u̱ xi nja.

will be added

X\