YA NTHANDI 3

1'Yot'wa nunar e̱nxe̱ 'bu̱hnu̱ har nijö Nsardi, ne 'ñembabi: Nö'ö togo tsixa nuya yoto ya hñö pe̱pa Jö, ne hö yoto ya tso̱, enö njawa: Di pöt'a gatho ri 'be̱fihu̱. Thus'ahu̱ gi tehu̱, ha nuga di xi'ahu̱ xka tuhu̱. 2Zo̱t'a ri da̱hu̱ ne suhu̱ nö'ö tema gi pe̱'su̱ 'bu̱tho da göts'i. Ngetho xta timp'ahu̱, nuya ri 'be̱fihu̱ hints'u̱ xiñho hár nthandi Jö. 3Jange beñhu̱ tema xka hñöñhu̱, tema xka 'yo̱hu̱, ne gi kwathu̱ xiñho, ne 'yo̱thwu̱ ár ntso̱'mi. Ngetho nu'mu̱ hingi ndo̱'mhu̱, xki tha̱ñhu̱ ga tso̱ho̱ ngu n'ar bë hingi to̱'mhu̱ ham'u̱. 4Ha gi 'ñep'u̱ 'ranu̱ Nsardi togo hinxi ja̱xt'a yá t'axhe. Ma ga ñ'o'bega'u̱ di he ya t'axhe, ngetho njap'u̱ di 'ñepabi'u̱. 5Nu'u̱ togo da ntöte, ma da theta ya t'axhe, hinda thökwa yá thuhu har he̱'mi no̱nga ar te, ne ma ga mömba yá thuhu hár nthandi ma Dada ne yá e̱nxe̱. 6Nu'u̱ togo tu yá gu, dá 'yo̱xa te mönga ár Hñö Jö xipa ya nijö. 7'Yot'wa nunar e̱nxe̱ 'bu̱hnu̱ har nijö Mfiladelfia, ne 'ñembabi: Njanu̱ xi'ahu̱ nö'ö togo xint'axi, gehnu̱ majöni, ne hömpa yá nsoki ar ndö Dabi. Nu'mu̱ kot'ö hinto tsa̱ da xoki, ha nu'mu̱ xok'ö hinto tsa̱ da got'i. 8Nuga di pöt'a ri 'be̱fihu̱. Mödi tx'u̱da ri ts'e̱dihu̱, hinxka ko̱mju̱ ma thuhu, ne xka 'yo̱tju̱ ma mhö. Jange nuga xta xok'ahu̱ n'ar goxthi hinto tsa̱ da got'i. 9'Yo̱hu̱. Nuya xi mhunts'i, yá me̱ti ar ts'ondöhi, ne kate eñ'u̱ ya xodyo, ma ga japi da nda̱ndihmö ha ri wahu̱. Njap'u̱ da bö'u̱ di mö'ahu̱. 10Ngetho xka tse̱thu̱ xka sukagihu̱ ma mhö, nuga n'ehe ma ga su'ahu̱ xta 'ñep'u̱ ya ts'othogi da zu̱ gatho nu'u̱ 'bu̱ hár nxidi ar ximha̱i, njap'u̱ da ts'a̱ta gatho ya meximha̱i. 11Pöhu̱, 'ba̱p'u̱tho ar pa ma ga ehe. Kwathu̱ xiñho nö'ö gi pe̱'su̱, ne hinto da hñömp'a ri nthöhöhu̱. 12Nu'u̱ togo da ntöte, ma ga huts'i da do̱'spa ár nijö Jö, hiñham'u̱ ma da nju̱knu̱. Ne ma ga ot'wabinu̱ ár thuhu Jö ne ár thuhu ár hnini'ö, gehnu̱ ar 'ra'yo Herusalen di gö mhets'i habu̱ bi 'bu̱ Jö, ne ga ot'wabinu̱ ma thuhu n'ehe. 13Nu'u̱ togo tu yá gu, dá 'yo̱xa te mönga ár Hñö Jö xipa ya nijö. 14'Yot'wa nunar e̱nxe̱ 'bu̱hnu̱ har nijö Nlaodisea, ne 'ñembabi: Nö'ö togo ar Njap'u̱, da̱majöni xiñho, ne ja ba po̱nu̱ ar mfeni nda hyoka Jö gatho nö'ö bi hyoki, eñ'ahu̱ njawa: 15Nuga di pöt'a ri 'be̱fihu̱ xi ndupatho. Xiñhohmö nu'mu̱ dá ntse̱tho wa dá mpa. 16Ngetho gar ndupathohu̱, hingar ntse̱ ne hingar mpa, ngu ar dehe ma ga ju̱ka ha ma ne, ga tsok'ahu̱. 17Nu'ahu̱ gi ense̱hu̱: Hinte di k'athe, xa di pe̱'se ya ñho. Ha hingi pöhu̱ gar hwëkate'ihu̱, gar hyoyahu̱, hinte gi pe̱'su̱, gar goda̱hu̱, hinte gi köhu̱ n'ar xe̱ni ar dutu. 18Jange di xi'ahu̱ gi ta̱mgagihu̱ ar k'axt'abo̱jö nö'ö xi tho har tsibi, ne hinte gi k'athu̱. Ne gi ta̱ñhu̱ ya t'axdutu, hingi 'be̱ ri tsa̱hu̱ xta thant'ahu̱ hinte gi köhu̱ n'a xe̱ni. Ne xithu̱ ar 'ñethi ri da̱hu̱, da xogi ne gi hyanthu̱. 19Nuga di tsu̱i ne di fe̱i gatho nu'u̱ togo di mödi, jange 'yo̱thwu̱ ár ntso̱'mi, ne umba ri mu̱ihu̱ gi pe̱pkagihu̱. 20Pöhu̱ 'mu̱, nuga di 'ba̱ har goxthi di mafi. Nö'ö togo da 'yo̱tka ma mhö, ne da xoka ar goxthi da thogagi hár ngu, ga ku̱t'i ga ñum'e. 21Nu'u̱ togo da ntöte, ma ga ets'i ga hux'be ngu ar ndö, ngu xta ntötega, ne xta hux'be ma Dada hár thuxandö. 22Nu'u̱ togo tu yá gu, dá 'yo̱xa te mönga ár Hñö Jö xipa ya nijö.

will be added

X\