YA NTHANDI 21

1Nep'u̱ da handa n'ar 'ra'yo mhets'i ne n'ar 'ra'yo ximha̱i, ngetho nunar 'be̱t'o mhets'i ne ar 'be̱t'o ximha̱i bi göts'i, ha nu ar ñho̱nthe bi m'e̱tho. 2Nuga dar Xuwa, da handa ar jöpa hnini, nunar 'ra'yo Herusalen, ba kö'ma Jö mhets'i habu̱ bi 'bu̱'ö, xa mi nza̱tho ngu n'ar 'be̱hñö xi ñhoki da nthötwi ár döme. 3Ne da o̱ n'ar mhö ndi 'ñe mhets'i mi enö: 4Jö ma da dukwa gatho yá gida̱ ha yá da̱'u̱. Hinda ma da nja ar ndöte, ar ts'oni, ar mhafi, ar u̱gi, ngetho nuya 'be̱t'o thogi xi m'e̱di. 5Ha nö'ö togo mi huxa har thuxandö bi 'ñenö: 6Ne bi 'ñengagi man'agi: 7Nu'u̱ togo da ntöte, ma ga hekwabi gatho nuya ñhoyu̱. Ma da nugagi ngu ár Jögi, ne ga nuga ngu ma bötsi. 8Ha nuya tsuzu̱, ya me̱'sku, ya ts'ojö'i, ya hyote, nuya 'be̱ngwi ma'ra ya jö'i, ya 'ñete, nu'u̱ togo ndönga yá tsita emp'ö, ne gatho nu'u̱ mönga ya nhemhñö, ma da t'et'a har ñho̱nthe tsibi zo̱ ku̱ ya k'axt'ado xa xi mpa. Gehnu̱ ar ñoho ndöte. 9N'a mba ep'u̱tho bi zu̱kagi n'a nuya yoto ya e̱nxe̱ mi hö yoto yá t'e̱ni mi ñuxa ya ngöxa mfe̱i. Da ñö'be ne bi 'ñengagi: 10Ár Hñö Jö xki zinga ha ma te, ha nunar e̱nxe̱ bi zixkagi ha n'ar döta t'o̱ho̱ mar ñhets'i, ne bi utkagi ar döta jöpa hnini Herusalen ba kö'ma Jö mhets'i habu̱ bi 'bu̱'ö. 11Nunar hnini'ö xa mi hyats'i mi pe̱'spa ár nsunda Jö. Mi ñhe̱hwi ngu n'ar hya'sdo xi mhödi, mi hya'stho ngu n'ar doxito. 12Mi jot'a n'ar döta jödo xa mar ñhets'i, ne mi tu 're̱t'amayoho ya goxthi, ha n'a ngu n'a ya goxthi mi 'ba̱ n'ar e̱nxe̱. Ne xi t'otnu̱ yá thuhu nu'u̱ 're̱t'amayoho yá t'u̱ ar Hakob, habu̱ xpa e yá m'u̱i ya me Israel. 13Hñu ya goxthi ñhanda mahyats'i, hñu ñhanda mahwifi, hñu ñhanda mampuni, ne hñu ñhanda mak'angi. 14Mi pe̱'sa nunar hnininu̱ 're̱t'amayoho ya mu̱dido, ne n'a ngu n'a nuya doyu̱ mi tu yá thuhu nuya 're̱t'amayoho yá mpo̱te ar tsi Ntxönandöni. 15Nunar e̱nxe̱ ndi ñö'be, mi hö n'ar k'axt'abo̱jö t'o, ma nda 'ye̱nga ar hnini, yá goxthi ne yá jödo. 16Nunar hnininu̱, 'ramangutho ár nxidi, ár ma ne ár ñhets'i. Ha nunar e̱nxe̱ bi gu̱ ar t'o mi hö, ne bi 'ye̱nga ar hnini. Ne nunár ma bi zu̱ ngu madenthebe ya pa da ñ'o n'ar jö'i, njap'u̱tho ár ñhets'i ne ár nxidi. 17Nuya jödo bi zu̱ yon'a̱temahñu ñhu̱fi ár mpidi. Nuya nt'e̱niyu̱ gehyu̱ ar nt'e̱ni pe̱'sa ya jö'i, ha nunar e̱nxe̱ bi de̱ntho. 18Ar jödo ma ya hyasdo, ha nu ar hnini xki thoka ar hoga k'axt'abo̱jö mi hwe̱xki ngu n'ar hya'sa doxito. 19Nuya mu̱dido mi ku̱xa hár wa ar jödo, xki thoki xki thuta tsa̱nt'ö ya nza̱thodo. Nu ar m'e̱t'o mar hya'sdo, nu ár ñoho mar k'angdo, nu ár hñu gehnu̱ n'ar do mi tu yá nhwe̱xki, nu ár goho mar bo̱thedo. 20Nu ár ku̱t'a nza̱thodo mi tu ya m'e̱ts'i, nu ár 'rato mar the̱ngdo, nu ár yoto mar hya'sa k'axt'ado, nu ár hñöto mar k'ants'ado, nu ár gu̱to mar k'axt'ado, nu ár 're̱t'a mar hya'sa bo̱thedo, nu ár 're̱t'aman'a mar do̱nthido, nu ár 're̱t'amayoho mar hya'sa do̱nthido. 21Nuyá goxthi mi 're̱t'amayoho ngu ya t'axdo xi mhödi. N'a ngu n'a ar t'axdo mar goxthi. Ha nu ár 'ñu ar hnini xki thoka ar hoga k'axt'abo̱jö, mi hya'stho ngu n'ar doxito. 22Núnu̱ har jöpa hnini hinda handa xki juxa n'ar nijö, ngetho ka 'bu̱hnu̱ Jö ar tsi Hmu, hinjo'o togo da ñhuxkwi ár ts'e̱di, ne ar tsi Ntxönandöni, gehyu̱ ngu ar nijö. 23Hingi homba ár ñot'i ar hyadi ne ár ñot'i ar zönö, ngetho hexa ar hyats'i ár nsunda Jö, ne ar tsi Ntxönandöni gehnu̱ 'yotwabi'u̱. 24Ne gatho ya jö'i di 'bu̱ hár nxidi ar ximha̱i, ma da ñ'o har ñot'i'ö, ne gatho ya ndö ma da e da da̱twa yá nsu ne yá ñho. 25Nuyá goxthi hinda ma da njot'a 'bu̱ pa, ha nu ar xui hingi födi tengu'ö. 26Gatho yá nsu ne yá ñho ya hnini ma da thöxhnu̱. 27Hinte ma nts'otho ma da yu̱tnu̱, hinda yu̱t'a n'a togo hingi o̱t'a xiñho wa di mönga ya nhemhñö; ho̱nse̱ nu'u̱ togo di huxa yá thuhu har he̱'mi no̱nga ar te, ár me̱ti ar tsi Ntxönandöni.

will be added

X\