YA NTHANDI 20

1Nep'u̱ da handa n'ar e̱nxe̱ ba kö mhets'i mi hömpa yá nsoki ar nzonganzafi, ne mi hö hár 'ye̱ n'ar dönthi bo̱jö. 2Bi gu̱ ar zothe, ge'ö ar k'eñö mi 'bu̱ mam'e̱t'o, get'ö ar ts'ondöhi, ne bi xo̱t'a 're̱t'anthebe ya je̱ye̱. 3Ne bi 'ye̱nt'a har nzonganzafi, bi got'i xiñho, ne hinge nda hye̱gi nda ka ya meximha̱i. M'e̱t'o da tho 're̱t'anthebe nje̱ye̱, ne da the̱ ma'ra ya tsi pa. 4Nep'u̱ da handa ya thuxandö, mi huxnu̱ nu'u̱ togo bi t'ets'i nda hñöxa majöni. Ne da handwa yá pa nu'u̱ togo xki the̱kwa yá 'yu̱ga, ngetho mi da̱majöni ar tsi Hmu Hesu ne ár mhö Jö. Gehyu̱ hinxki ndönga ar ts'ozu'we, hinxki ndönga ar do ndi hñöts'i. Hinxi hñöñ'u̱ ár nthixt'i ha yá dë wa ha yá 'ye̱. Ne bi mengi bi nte'u̱, bi ndöwi ar tsi Hmu Hesukristo 're̱t'anthebe nje̱ye̱. 5Nuyu̱ xi m'e̱t'o xi mengi xi nte. Ha nu ma'ra xki du, m'e̱t'o bi tho 're̱t'anthebe nje̱ye̱, ne ja bi mengi bi nte'u̱. 6Nza̱tho ne xint'axi yá m'u̱i nu'u̱ togo xi t'umba ar se̱ki da m'e̱t'o da mengi da nte. Ar ñoho ndöte hinte da japabi'u̱. Nuyu̱ ma da t'ets'i ngu yá möjö Jö ne ar tsi Hmu Hesukristo, ne da ndöwi 're̱t'anthebe nje̱ye̱. 7Nu xta wadi da tho 're̱t'anthebe nje̱ye̱, ar ts'ondöhi ma da sokwa ár fa̱di. 8Ne ma da bo̱ni da ka ya jö'i 'bu̱ ha gatho ya ha̱i hár nxidi ar ximha̱i, nu'u̱ to̱xa ar tsi Hmu. Ma da munsa har döta tuhni, ne ár nze̱ye̱ ya jö'i ñhe̱hwi ar 'bomu 'bonga har ñönthe. 9Habu̱ gatho ba po̱xa ya jö'i, ne bi hyextar ximha̱i, xa bi got'atho habu̱ mi 'bu̱ ya gamfi ne ar hmöka hnini. Jö ba pe̱hna ar tsibi ba ta̱ mhets'i, ne bi jö'sa xo̱ge. 10Nunar ts'ondöhi mi ka ya jö'i, bi nju̱ ne bi t'e̱nt'a har ñho̱nthe tsibi mi zo̱ mi ku̱ ya k'axt'ado, ka mi ku̱nu̱ ar ts'ozu'we ne ar hya̱te m'e̱hni. Ma da tho nunar u̱ginu̱ parxui ne hiñham'u̱ da göts'i. 11M'e̱fa da handa n'ar döta t'axthuxandö, ne hár hmi nö'ö togo mi huxhnu̱ bi m'e̱ta ar ximha̱i ne ar mhets'i, himbi födi habu̱ima. 12Ne da handa gatho nu'u̱ togo xki du, ya döta ne ya t'u̱lo, mi 'ba̱'u̱ hár nthandi Jö. Bi ntu̱nga 'ra ya he̱'mi, ne man'ar he̱'mi bi ntu̱ngi, gehnu̱ habu̱ huxa yá thuhu nu'u̱ togo pe̱'sa ar te hiñham'u̱ da göts'i. Nuya xki du bi thö'spa majöni, ne bi t'umbi nö'ö ndi 'ñepi, ngu mi huxa ha ya he̱'mi, ngetho njap'u̱ xki 'yo̱t'u̱. 13Ar döta ñho̱nthe bi da̱ yá jö'i xki dunu̱, ar ndöte ne ar 'be̱xui bi da̱ yá jö'i xki du n'ehe, ne bi thö'spa majöni n'a ngu n'a ngu xki 'yo̱t'u̱. 14M'e̱fa ar ndöte ne ar 'be̱xui bi t'e̱nt'u̱ har ñho̱nthe tsibi. Gehnu̱ ar ñoho ndöte. 15Ha gatho nu'u̱ togo himbi thini mi huxa yá thuhu har he̱'mi no̱nga ar te, bi t'e̱nt'u̱ har ñho̱nthe tsibi.

will be added

X\