YA NTHANDI 2

1'Yot'wa nunar e̱nxe̱ 'bu̱hnu̱ har nijö Ñ'efeso, ne 'ñembabi: Njanu̱ xi'ahu̱ nö'ö togo hö yoto ya tso̱ hár ñ'e̱i, ne 'yo madeda ya k'axt'abo̱jö mfox'yo: 2Nuga xta pöt'a ri 'be̱fihu̱, ne xta pödi hanja xka umba ri mu̱ihu̱ xka pe̱'su̱ ar ts'e̱ti. Hinxka 'ñet'a ri xu̱thahu̱ nu'u̱ togo o̱t'a ya ts'oki. Xka hñö'sfu̱ majöni nu'u̱ togo eñ'u̱ yá mpo̱te Jö, ne xka pöthu̱ yá nemhñö. 3Xa xka tse̱thu̱ ya thogi. Hinxka wenthu̱ xi za̱'ahu̱ xka mpe̱hu̱, ngetho xka da̱tkagihu̱ majöni ma thuhu. 4Ho̱nse̱ hindi hop'ahu̱ hingi mökagihu̱ ngu ngi möju̱ har ndu̱i. 5Beñhu̱ hangu ngi mökagihu̱. Ntso̱'mhu̱ ne penju̱ gi 'yo̱thu̱ nuya 'be̱fi ngi o̱thu̱ har ndu̱i. Ngetho nu'mu̱ hingi ntso̱'mhu̱, ma ga ehe ne ga hök'a ri mfox'yohu̱ habu̱ 'bu̱i. 6Mödi gi u̱tsabihu̱hmö yá ts'o'be̱fi nu'u̱ togo te̱nga ar Nikola. Nuyá ts'o'be̱fiyu̱ di u̱tsaga n'ehe. 7Nu'u̱ togo tu yá gu, dá 'yo̱xa nö'ö te mönga ár Hñö Jö xipa ya nijö. Nu'u̱ togo da ntöte, ma ga umba ar se̱ki da du̱kwa te unga ar 'ba̱iza unga ar te, 'ba̱ madeda ár nza̱tho hwöhi Jö. 8'Yot'wa nunar e̱nxe̱ 'bu̱hnu̱ har nijö Ñ'esmirna, ne 'ñembabi: Nö'ö togo du̱'mi ne jö'sa xo̱ge, gehnu̱ togo bi du ne bi mengi bi nte man'agi, eñ'ahu̱ njawa: 9Nuga xta pöt'a ri 'be̱fihu̱, ne nuya nt'u̱tsa gi thohu̱, ne ri ñhoyahu̱. Mödi gi pe̱'su̱ nze̱ye̱ ri m'e̱ts'ihu̱ nuya hingi nhekiwa. Di pödi hangu ñömañ'u̱'ihu̱ nuya enö ya xodyo emp'ö, gehyu̱ n'ar mhunts'i ár me̱ti ar ts'ondöhi. 10Yo gi tsuhu̱ gatho nö'ö ma gi thohu̱. Pöhu̱ nunar ts'ondöhi ma da 'ñe'ahu̱ 'ra har fa̱di, ne njap'u̱ da ts'a̱t'ahu̱. 'Re̱t'a mpa ma gi thohu̱ ya thogi. Ze̱ta ri jamfihu̱ 'bu̱tho gi tuhu̱, ha nuga ma ga 'ra'ahu̱ ar te hiñham'u̱ da göts'i ngu ri nthöhöhu̱. 11Nu'u̱ togo tu yá gu, dá 'yo̱xa te mönga ár Hñö Jö xipa ya nijö. Nö'ö togo da ntöte, hinte ma da japa ar ñoho ndöte. 12'Yot'wa nunar e̱nxe̱ 'bu̱hnu̱ har nijö Mpergamo, ne 'ñembabi: Nö'ö togo hö ar ndo̱jwai xa he̱nte gatho yoho yá ñöni, eñ'ahu̱ njawa: 13Nuga xta pöt'a ri 'be̱fihu̱, ne di pödi habu̱ gi 'bu̱hu̱, ka 'bu̱p'u̱ ngu ár ndö ar ts'ondöhi. Mödi njap'u̱, nu'ahu̱ xka da̱hu̱ majöni ne hinxka ko̱ngagihu̱. Hinga 'yo̱thu̱ nuya pa'u̱ ga hyanthu̱ bi thoka ma hoga 'be̱go ar Antipas, ngi 'bu̱hwihu̱nu̱ habu̱ 'bu̱ ar ts'ondöhi. 14Ho̱nse̱ hindi hop'ahu̱ 'ra gi te̱mfu̱ yá nt'uti ar Balam mi uta ar Balak. Mi tsixa ya me Israel nda zipa yá ñhuni ya tsita emp'ö, ne togatho nda m'e̱ngwi, ne njap'u̱ nda da̱hmö'u̱. 15Ne gi 'ñehu̱p'u̱ 'ra togo te̱mba yá nt'uti nu'u̱ te̱nga ar Nikola. Nuya nt'utiyu̱ di u̱tsaga. 16Jange di xi'ahu̱ gi 'yo̱thwu̱ ár ntso̱'mi. Ngetho nu'mu̱ hin'ö, ma ga ehe ga ntum'e'u̱ ga hö ar ndo̱jwai po̱nga ha ma ne. 17Nu'u̱ togo tu ár gu, dá 'yo̱xa te mönga ár Hñö Jö xipa ya nijö. Nu'u̱ togo da ntöte, ma ga umba da zi ar thuhme ba kö mhets'i xi t'ögi. Ne ga umba n'ar tsi t'axdo habu̱ huxa n'ar 'ra'yo thuhu, ne hinto man'a di pödi, ho̱nse̱ nö'ö togo di hö. 18'Yot'wa nunar e̱nxe̱ 'bu̱hnu̱ har nijö Ntiatira, ne 'ñembabi: Ár T'u̱ Jö togo pe̱'sa yá da̱ ñhe̱hwi ya faspi, ne yá wa ngu ár nt'axi n'ar xiujö o har hwifi, embabi: 19Nuga di pöt'a gatho ri 'be̱fihu̱, ri mhötehu̱, ri ñ'emu̱ihu̱, ri ts'e̱tihu̱, ne hanja gi pe̱pkagihu̱pya, töta ngu ngi pe̱pkagihu̱ maham'u̱. 20Ho̱nse̱ hindi hop'ahu̱ gi 'ñehu̱p'u̱ nunar 'be̱hñö ár thuhu ar Hesabel. Ense̱'ö n'ár m'e̱hni Jö, ne uta nuya ma 'be̱go togatho da m'e̱ngwi, ne da zi ya ñhuni xi m'o̱'spa ya tsita emp'u̱. 21Nunar 'be̱hñönu̱ xta umba 'ra ya tsi pa, ha hinxi 'yo̱t'wa ár ntso̱'mi 'be̱ngwi ya ndo̱. 22Pöhu̱ nunar 'be̱hñönu̱ ma ga ka̱xa nt'oxi, ne ma da tho ya thogi nu'u̱ togo 'be̱ngwi, nu'mu̱ hinda 'yo̱t'wa yá ntso̱'mi n'ehe. 23Ma ga hopa gatho yá bötsi, ne njap'u̱ gatho ya nijö ma da bödi, nuga di hëtwa yá mfeni ne yá mu̱i ya jö'i, ne di umba ár mfe̱i ngu di 'ñepa n'a ngu n'a. 24Ha gatho nu ma'ra gi 'bu̱hu̱ har nijö Ntiatira, hinxka te̱mbabihu̱ yá nt'umbi, ne hinxka pöhu̱ nö'ö eñ'u̱ xi ñhembi da fötwa ar ts'ondöhi, di xi'ahu̱, hinga 'ra'ahu̱ man'ar 'be̱fi. 25Ho̱nse̱ di a̱'ahu̱, yo ma gi hye̱hu̱ nö'ö xka pöhu̱. Ndo̱'mthohu̱ ga pengi. 26Nu'u̱ togo da ntöte ne di pe̱pkatho har ngöts'i, ma ga umba ar ts'e̱di da me̱'sa ár nsu hagatho ya ha̱i. 27Ne ma da hyu̱xtya t'obo̱jö, ne ma da hwata nuya hnini ngu n'ar ts'o̱i bo̱ha̱i. Ma ga umba ar ts'e̱di ngu xta höni xi 'raka ma Dada. 28Ne ga umba ar njötso̱. 29Nu'u̱ togo tu ár gu, dá 'yo̱xa te mönga ár Hñö Jö xipa ya nijö.

will be added

X\