YA NTHANDI 19

1M'e̱fa da o̱ ra nze̱ye̱ togo mi ñönu̱ mhets'i, ne mi eñ'u̱: Dár nsunda Jö ma tsi Hmuhu̱. Gor me̱ti'ö ar mpo̱ho̱, ar nsunda, ne ar ts'e̱di. 2Ngetho nö'ö o̱t'a ar hoga ts'u̱t'wi ne majöni. Gehnu̱ xi umba ár mfe̱i ar ts'o'be̱hñö togo xi ts'ot'a ar ximha̱i to gatho 'be̱ngwi, ne xi got'wabi ár ji yá 'be̱go xi hyo nunar 'be̱hñönu̱. 3Man'agi bi 'ñeñ'u̱: 4Nuya n'a̱temagoho ya tsi dönzia ne nuya goho ya zu'we mi te, bi nda̱ndihmö ne bi ñ'ani bi me̱ yá hmi har ha̱i. Ne bi nsunda Jö huxa har thuxandö, mi eñ'u̱: 5Bi bo̱nga n'ar mhö har thuxandö mi enö njawa: Ndöñhu̱ Jö ma tsi Hmuhu̱, gatho yá 'be̱go'ihu̱, ya t'u̱lo ne ya döta, togo gi tsufu̱ Jö. 6Ne da o̱ 'ra ya mhö ngu ra nze̱ye̱ ya jö'i, ngu ár ñheti ya nzo̱the, ngu ya ñu̱ni, ne mi enö: Dá nsunda Jö, ngetho Jö ma tsi Hmuhu̱ hinjo'o togo da hñuxkwi, go ar ndö'ö. 7Ma ga njohyahu̱, hö xa ga njohyahu̱, ne ga umfu̱ ar nsunda, ngetho xi da̱t'a ár nthöti ar tsi Ntxönandöni, ne nunár 'be̱hñö xi ñhoki. 8Ne xi t'umba ar se̱ki da hye ya hoga dutu xint'axi ne xi nhwe̱xki. 9M'e̱fa bi 'ñenga ar e̱nxe̱: 10Nuga da nda̱ndihmö hár wa nga ndöni. Ha nö'ö bi 'ñengagi: 11Nep'u̱ da nu mi xo mhets'i, ne da handa n'ar t'axfani. Nu ár to̱ge mar thuhu Majöni ne o̱t'a nö'ö te mö, ne hö ar hoga ts'u̱t'wi höxa majöni ne ntuhni. 12Nuyá da̱ ar to̱ge mi ñhe̱hwi ya faspi. Mi huxa hár ñö nze̱ye̱ ya fu̱indö, ne xki t'otnu̱ n'ar thuhu hinto man'a mi pödi tema mi mö, ho̱nse̱nu̱ mi pödi. 13Mi he n'ar dutu xa xki m'ahna ya ji, ha nu ár thuhu gehnu̱: ÁR MHÖ JÖ. 14Ha nuya ndogu me mhets'i mi he ya hoga dutu xint'axi, ne mi 'be̱fa'u̱ mi te̱ni mi nto̱ ya t'axfani n'ehe. 15Hár ne ar to̱ge 'be̱t'o, po̱nga n'ar ndo̱jwai he̱nte nuya yoho yá ñöni, da su̱'sa ya meximha̱i. Ne ma da 'yo̱t'a ar ts'u̱t'wi di hö n'ar t'obo̱jö. Ne da ne'ma ya jö'i ngu nhe'ma ya obxi the̱'mi, ne da di'spa ár kwe̱ Jö togo hinto tsa̱ da ñhuxkwi. 16Hár he ne hár xinthe tu nunar thuhunu̱: ÁR NDÖ YA NDÖ NE ÁR HMU YA HMU. 17Nep'u̱ da handa n'ar e̱nxe̱ mi to̱ har hyadi, ne bi mafi nts'e̱di bi 'ñemba gatho ya zu'we nsa̱nga madeda mhets'i: 18Tsafu̱ yá ngo̱ ya ndö, ya ndöndogu ne ya jö'i tse̱di, yá ngo̱ ya fani ne yá to̱ge, yá ngo̱ tsa̱nt'ö ar jö'i, ya 'be̱go ne nuya hingya 'be̱go, ya t'u̱lo ne ya döta. 19Ne da handa ar ts'ozu'we ne gatho ya ndö 'bu̱ har ximha̱i ne yá ndogu, xki mhunts'i nda ntunkwi ar to̱ge nto̱ ar t'axfani ne yá ndogu ñ'owi n'ehe. 20Ar ts'ozu'we bi nju̱, ne bi nju̱ ar kate m'e̱hni n'ehe, togo xki 'yo̱t'a ya nt'udi bi hya̱t'a nu'u̱ bi hñömba ár nthixt'i ar ts'ozu'we, ne bi ndönga ar do ndi hñöts'i. Gatho yohoyu̱ bi nju̱ bi t'et'a tetho ha n'ar tsibi ngu n'ar ñho̱nthe, habu̱ zo̱ ku̱ ya k'axt'ado xa xi mpa. 21Ha nu ma'ra bi hyo ar ndo̱jwai mi po̱nga hár ne ar to̱ge, ne gatho ya zu'we nsa̱ni bi niñö bi zipa yá ngo̱'u̱.

will be added

X\