YA NTHANDI 18

1M'e̱fa mi tho gathoyu̱, da handa man'ar e̱nxe̱ ba kö mhets'i xa mi pe̱'sa ár ts'e̱di, ne gatho ar ximha̱i bi ñuxa ár hyats'i xa már nsunda. 2Xa bi mafi nts'e̱di ne bi 'ñenö: 3Ngetho ya hnini 'bu̱ har ximha̱i xi 'yo̱t'wi ya ts'oki, xi zipa ár kwe̱ Jö. Ne gatho ya ndö 'bu̱ har ximha̱i xi m'e̱ngwi, ha nuya ma̱ 'bu̱ har ximha̱i xi xu yá m'e̱ts'i mi pa̱pa ya ñho nunar hnininu̱. 4Ne da o̱ man'ar mhö ndi 'ñe mhets'i, bi 'ñengagi: 5Ngetho yá ts'oki xi zo̱nga ár ñhets'i mhets'i, ne Jö xi beni da umba ar mfe̱i. 6Ko'spabihu̱ te xi ja'ahu̱ nunar hnininu̱, ne ko'spabihu̱ yo'gi nö'ö tema xi 'yo̱t'ö. Ngu nunar t'e̱ni xi tsit'ahu̱, ko'spabihu̱ yo'gi. 7Ngu xi 'ñexa ár nsu ne xi njohya, njap'u̱tho umfu̱ ar u̱gi ne ar ts'oni. Ngetho xi 'ñense̱: Nuga di huxa ngu n'ar ndö; hindi 'ranxu, ne hinga ma ga nzoni. 8Jange n'apatho ma da epabi ar u̱gi, ar thuhu, ar ts'oni, ar ndöte, nep'u̱ ma da ts'öt'a har tsibi, ngetho xa pe̱'sa ár ts'e̱di Jö ar Hmu togo xi hñö'spa majöni. 9Ne gatho nu'u̱ ya ndö 'bu̱ har ximha̱i xki m'e̱ngwi ne xki njohyawi, xa ma da zont'i nú'mu̱ xta hyandwa ár 'bifi di po̱xa xta tsöt'i. 10Ma da m'a̱ta yap'u̱ ngetho di ntsu, ne ma da 'ñeñ'u̱: 11Ha nuya ma̱ 'bu̱ har ximha̱i, zont'i ne tupyá mu̱i, ngetho hinjo'o togo da da̱mba nuya te pa̱'u̱. 12Nuya pa̱ ya k'axt'abo̱jö, ya t'axbo̱jö, ya nza̱thodo, nuya ngu ya t'axdo xi mhödi, ya hoga dutu nza̱tho, ya hwe̱xka dutu, ya dutu nk'ants'i ne nthe̱nts'i, ya za pe̱'sa ar hogañu̱ni, nuya thoki xi thökwa yá ts'i ya döta zu'we, nuya nju̱ ya nza̱thoza xi nthoki, nu'u̱ nju̱ ya the̱ngabo̱jö xi nthoki, ya bo̱jötho, ne ya do hwe̱xki. 13Mi höx'u̱ gatho ya do̱ni ne ya njots'i mi yu̱ni xi nku̱hi, ar githni, ne ar hogañu̱ni ár thuhu ar mira, ar ixkat'afi, ar nziki, ar hoga ju̱nt'e̱i, ar t'e̱i, ya me̱ti, ya de̱ti, ya fani, ya ntönza, ya 'be̱go, ne yá pa ya jö'i. 14Ne ma da t'emba nunar hnininu̱: 15Nu'u̱ mi pa̱pa gathoyu̱, ne njap'u̱ xki me̱'sa yá ñho, ma da m'a̱ yap'u̱ di tsu ár mfe̱i bi zu̱di, xa di tu yá mu̱i ne di zont'i. 16Ne di eñ'u̱: 17N'apatho bi göxa nze̱da ya ñho. 18Nu mi hyanda ar 'bifi mi po̱ts'e, bi ma'u̱ ne mi eñ'u̱: 19Bi 'yu̱xya fontha̱i ha yá ñö mi tho ar dumu̱i, ne xa mi mar ts'oni mi eñ'u̱: 20Njohyahu̱nu̱ mhets'i gamfihu̱, nu'ahu̱ gár mpo̱tehu̱ ne nu'ahu̱ gár m'e̱hni'ihu̱ Jö. Ngetho Jö xi hñö'spa majöni gatho nö'ö xi ja'ahu̱. 21M'e̱fa da handa man'ar e̱nxe̱ xa mi pe̱'sa ár ts'e̱di, bi gu̱ n'ar döta do ngu n'ar ju̱ni, bi 'ye̱nt'a har ñho̱nthe ne bi 'ñenö: 22Hinda ma da t'o̱hnu̱ togo da mpe̱'mda, hinda t'o̱ nu'u̱ togo ja te zu̱nt'i, ne nu'u̱ togo hu̱xt'a ya thu̱za ne ya k'axt'athu̱xi. Hinda ma da thinga n'a togo di hoka n'ar nza̱tho 'be̱fi, hinda ma da t'o̱ ár nga̱ni n'ar ju̱ni. 23Hinda ma da nhekinu̱ n'ar ñot'i, hinda ma da t'o̱ n'ar ngo nthöti. Nuyá ma̱, gehyu̱ mi dötahmö 'bu̱ har ximha̱i, ne nuyá nt'eteyu̱, bi hya̱t'a gatho ya ha̱i. 24Ha nunar hnininu̱, ja bi thinu̱ yá ji yá m'e̱hni Jö, ya gamfi ne gatho nu'u̱ xi tho har ximha̱i.

will be added

X\