YA NTHANDI 17

1M'e̱fa ba e n'a nuya yoto e̱nxe̱ mi hö ya t'e̱ni, bi zokagi ne bi 'ñengagi: 2Nunar 'be̱hñönu̱ xi m'e̱ngwi ya ndö 'bu̱ har ximha̱i, ne gatho ya jö'i xi 'be̱ yá mfeni 'bu̱tho xi nti o̱t'wi ya ts'oki. 3Ár Hñö Jö xki zinga ha ma te, ha nunar e̱nxe̱ bi zixkagi ha ya ot'at'o̱ho̱, ne ka da handnu̱ n'ar 'be̱hñö mi 'bu̱hnu̱ mi nto̱ n'ar the̱ngats'ozu'we. Nunu̱ mi tu yoto yá ñö, 're̱t'a yá ndöni, ne xa mi ñuxa ya thuhu mi tsanga Jö. 4Nunar 'be̱hñönu̱ mi he n'ar he mar nk'ants'i ne mar nthe̱nts'i, ne mi hö ya k'axt'abo̱jö, ya nza̱thodo ne ma'ra ngu ya t'axdo xi mhödi. Mi hö hár 'ye̱ n'ar k'axt'abo̱jö t'e̱ni mi ñuxa nö'ö hingi ho, ne nö'ö xi nts'otho 'be̱ngwi ya jö'i. 5Ne mi huxa hár dë n'ar thuhu hingi födi te me̱'ö, enö njawa: Ar döta Mbabilonia, ár nönö ya ts'o'be̱hñö ne gatho nö'ö hingi ho jawa har ximha̱i. 6Da handa nunar 'be̱hñö xa xki nti, xki zipa yá ji ya gamfi ne nu'u̱ bi unga yá te mi te̱nga ar tsi Hmu Hesukristo. Núm'u̱ nda handi, xa da 'yo̱tho. 7Ne nunar e̱nxe̱ bi 'ñengagi: 8Nunar ts'ozu'we xka hyandi mi 'bu̱i, nep'u̱ bi njo'o, tx'u̱tho 'be̱di da bo̱nga har nzonganzafi, ne da t'et'a har tsibi. Gatho nuya meximha̱i himi huxa yá thuhu har he̱'mi no̱nga ar te, xki thahna nú'mu̱ hinxki thokta ar ximha̱i, ma da 'yo̱tho xta hyanda nunar ts'ozu'we mi 'bu̱i, nep'u̱ bi njo'o, ne da m'u̱ man'agi. 9Ja mahyoniwa ar mfödi: Nuya yoto yá ñö, gehyu̱ yoto ya t'o̱ho̱ habu̱ huxa nunar 'be̱hñönu̱. 10Ne da 'ñenö n'ehe, gehyu̱ yoto ya ndö. Ku̱t'a xi m'e̱di, n'a pe̱'sta ár ts'e̱di, ne 'be̱ta man'a da ehe. Ha nu xta ehe, hinda ma da m'u̱i yapa da ndö. 11Nunar ts'ozu'we mi 'bu̱i nep'u̱ bi njo'o, gehnu̱ ár hñöto ndö, n'a nuya yoto, ne di ma har tsibi. 12Ha nuya 're̱t'a ya ndöni xka hyandi, gehyu̱ 're̱t'a ya ndö hinxi hñönda yá ts'e̱di, ne 'ra ma da hñönga yá ndö 'ra ya tsi patho mahye̱giwi ar ts'ozu'we. 13Gatho 're̱t'a pe̱'sa n'adar mfeni, ne ma da 'ye̱nt'a yá ndö ne yá ts'u̱t'wi da me̱pa ar ts'ozu'we. 14Gathoyu̱ ma da ntunkwi ar tsi Ntxönandöni, ne ar tsi Ndöni ma da ntöte, ngetho go gehnu̱ ár Hmu gatho ya hmu, ne ár Ndö gatho ya ndö. Ne gatho nu'u̱ togo 'bu̱hwi, xi ts'ohni, xi thahni ne o̱t'a nö'ö nsipabi. 15Ne bi 'ñengagi nunar e̱nxe̱ n'ehe: 16Ne nuyá 're̱t'a ndöni ar ts'ozu'we xka hyandi, ma da u̱tsa ar ts'o'be̱hñö, ma da hñömba gatho yá ñho, ne ma da zo nthe̱mfotho. Ma da zapa yá ngo̱ ne ma da tsöt'a har tsibi. 17Ngetho Jö xi hñu'spa ha yá mu̱i da 'yo̱t'a nö'ö ne'ö. Jange bi me̱'sa n'adar mfeni da 'ye̱nt'a yá ndö ha yá 'ye̱ ar ts'ozu'we, ne njap'u̱ da wadi da tho gatho nö'ö xi mönga Jö. 18Ha nunar 'be̱hñö xka hyandi, gehnu̱ ar döta hnini di ndö gatho ya ndö 'bu̱ har ximha̱i.

will be added

X\