YA NTHANDI 13

1Ndi 'ba̱ har ñönthe, n'a nda handatho ba po̱xa har ñho̱nthe n'ar ts'ozu'we mi tu yoto yá ñö, 're̱t'a yá ndöni, ne ha n'a ngu n'a yá ndöni mi hu'sa n'ar ntsant'i. Ne ha n'a ngu n'a yá ñö mi huxa n'ar thuhu mi tsanga Jö. 2Nunar zu'we da handi mi ñhe̱hwi n'ar döta ma̱ngamixi. Nuyá wa mar nxaki yá xi ne yá xa̱, ngu n'ar döta zu'we ár thuhu ar oso. Nu ár ne mi ñhe̱hwi ár ne n'ar 'muhu. Ar zothe bi umba ár ts'e̱di, ne bi 'ñexa hár thuxandö nda ndöwi. 3Ne da handa n'a nuyá ñö xki ts'e̱ni 'bu̱tho nda du, ha bi k'ont'a ar ndöte ne bi dits'i. Gatho nuya jö'i bi hyandi, xa bi 'yo̱tho ne bi de̱ni. 4Bi ndöñ'u̱ ar zothe togo xki umba ar ts'e̱di ar ts'ozu'we. Hinge ho̱nse̱ bi ndönga ar zothe, bi ndönga ar ts'ozu'we n'ehe, ne bi 'ñeñ'u̱: 5Ar ts'ozu'we bi t'umba ar se̱ki n'ehe nda ñ'exase̱ ne nda ñömañ'u̱bi Jö. Nunar ts'e̱dinu̱ ma da göxa xta zo̱nga hñu nje̱ye̱ made. 6Ne bi zanga Jö, bi zamba ár thuhu, bi zamba ár nijö habu̱ 'bu̱'ö, ne bi zanga gatho nu'u̱ bi 'bu̱ mhets'i. 7Bi t'umba ar se̱ki nda ntunkwi ya gamfi ne nda ntöte'ö. Bi t'umba ar se̱ki n'ehe nda ndö ha gatho ya m'u̱i, ya hnini, ya hñö ne ya ha̱i. 8Bi ndönga ar ts'ozu'we gatho nu'u̱ ya jö'i himi huxa yá thuhu har he̱'mi no̱nga ar te, ár me̱ti ar tsi Ntxönandöni, xki thuts'i nda tho nú'mu̱ hinxki thoktho ar ximha̱i ne ar mhets'i. 9Nu'u̱ togo tu yá gu, dá 'yo̱xa nö'ö di mö. 10Nu'u̱ togo kote, ma da jot'u̱ n'ehe. Ha nu'u̱ togo ju̱ ar ndo̱jwai hote, ma da tho ndo̱jwaitho n'ehe. Ka nhekiwa yá ts'e̱ti ne yá ñ'emu̱i ya gamfi. 11M'e̱fa da handa man'ar ts'ozu'we bi bo̱nga har ha̱i, mi tu yoho yá ndöni ngu n'ar de̱ti, ne mi ñö ngu n'ar zothe. 12Ne ju̱mpa ár ts'e̱di ar m'e̱t'o ts'ozu'we hár hmi'ö, ne japa gatho ya meximha̱i da ndönga nor 'be̱t'o ts'ozu'we bi dixa ár nts'e̱ni 'bu̱tho nda du. 13O̱t'a ya döta nt'udi, japa da hyo̱ har ha̱i ya tsibi di 'ñe mhets'i ha yá hmi ya jö'i. 14Ne ka gatho ya meximha̱i, o̱t'a nuya nt'udi xi t'umba ar se̱ki da uta ya jö'i hár hmi nö'ö man'ar ts'ozu'we. Bi 'be̱pa ya jö'i nda hyokwa n'ar do ñhe̱hwi ár 'ba̱i nunar ts'ozu'we mi 'bu̱tho nda du ne bi nte, ne nda 'ñexa ngu yá jö emp'ö. 15Bi t'umba ar se̱ki nda japi nda joxa ár hñö ne nda ñö nunar donu̱ ñhe̱hwi ár 'ba̱i ar ts'ozu'we, ne nda japi nda tho gatho nu'u̱ togo hinge nda ndöni. 16Ne mi japa gatho nda thutwa nö'ö ngu ar nthixt'i ha yá ñ'e̱i wa ha yá dë, nuya t'u̱lo bötsi, ya döta, nuya pe̱'sa yá ñho, nuya hyoya, nuya m'e̱go ne nuya hingi m'e̱go. 17Hinto da tsa̱ da nta̱i wa da mpa̱ nu'mu̱ hindi pe̱'spa nö'ö ngu ar nthixt'i, wa ár thuhu wa ár m'ede ár thuhu. 18Ka mahyoniwa ar mfödi da m'etwa ár m'ede ar ts'ozu'we, ngetho nu ár m'ede'ö, ár m'ede n'ar ñ'o̱ho̱. Gehnu̱ ar m'ede: 'ratonthebe ma hñun'a̱te ne 'rato.

will be added

X\